‘ది కాంక్లేవ్ 2026’లో రేవంత్ వ్యాఖ్యలు.
ఢిల్లీలో జరిగిన ‘ది కాంక్లేవ్ 2026’లో తెలంగాణ సీఎం రేవంత్రెడ్డి తన రాజకీయ ప్రయాణాన్ని గుర్తుచేసుకున్నారు. అసెంబ్లీకి వెళ్లిన దానికంటే జైలుకే ఎక్కువసార్లు వెళ్లానని ఆసక్తికరంగా వ్యాఖ్యానించారు. 2014 తర్వాత తెలంగాణ రాజకీయాలు ‘కేసీఆర్ వర్సెస్ రేవంత్’గా మారాయన్నారు. కేసీఆర్ తనను అనేకసార్లు జైలుకు పంపారని ఆరోపించారు. తెలంగాణలో బీఆర్ఎస్ ప్రభుత్వంతో పాటు, కేంద్రంలో ఎన్డీఏతో పోరాడాల్సిన పరిస్థితి ఏర్పడిందని పేర్కొన్నారు.
విద్యార్థి రాజకీయాల నుంచి జాతీయ రాజకీయాల వరకు తన అనుభవాలను వివరించారు.
విద్యకే తెలంగాణలో తొలి ప్రాధాన్యం
నెహ్రూ విద్య, సాగునీటి రంగాలకు ప్రాధాన్యం ఇచ్చారని రేవంత్ పేర్కొన్నారు. అంబేద్కర్ రాజ్యాంగ నిర్మాతగా, మన్మోహన్ సింగ్ ప్రధానిగా, అబ్దుల్ కలాం రాష్ట్రపతిగా ఎదగడానికి విద్యే పునాది అని చెప్పారు. తెలంగాణలో నర్సరీ నుంచి 12వ తరగతి వరకు నాణ్యమైన విద్య అందించడమే తమ ప్రభుత్వ ప్రాధాన్యత అన్నారు. 12వ తరగతి తర్వాత నైపుణ్య శిక్షణకు ప్రాధాన్యం ఇస్తున్నామని తెలిపారు.
స్కిల్స్ యూనివర్సిటీతో ఉద్యోగాలపై దృష్టి
ఇంజినీరింగ్ పూర్తిచేసే లక్షలాది మంది విద్యార్థుల్లో తక్కువ మందికే వారి చదువుకు సరిపోయే ఉద్యోగాలు లభిస్తున్నాయని రేవంత్ చెప్పారు. అందుకే యంగ్ ఇండియా స్కిల్స్ యూనివర్సిటీ ఏర్పాటు చేశామని తెలిపారు. ఆనంద్ మహీంద్రా చైర్పర్సన్గా, శ్రీని రాజు వైస్ చైర్పర్సన్గా వ్యవహరిస్తున్నారని చెప్పారు. ఐటీఐలను ఏటీసీలుగా మార్చి టాటా గ్రూప్తో శిక్షణ కార్యక్రమాలు చేపట్టామని వివరించారు. జర్మన్, జపనీస్, కొరియన్ భాషలతో విదేశీ ఉద్యోగ అవకాశాలను అందిపుచ్చుకునేలా యువతను సిద్ధం చేస్తున్నామని తెలిపారు.
మోదీ ప్రభుత్వంపై తీవ్ర విమర్శలు
తెలంగాణ అభివృద్ధికి కేంద్రం తగిన సహకారం అందించడం లేదని రేవంత్ ఆరోపించారు. రీజినల్ రింగ్ రోడ్డుకు సంబంధించిన అనుమతులను కేంద్రం అడ్డుకుందని అన్నారు. ఇది ఉత్తర-దక్షిణ వివాదం కాదని, గుజరాత్ వర్సెస్ దేశంగా మారిందని వ్యాఖ్యానించారు. జనాభా ఆధారంగా నియోజకవర్గాల పునర్విభజన జరిగితే చిన్న రాష్ట్రాలకు నష్టం జరుగుతుందని పేర్కొన్నారు. ఎస్ఐఆర్ ద్వారా పేదల ఓట్లు తొలగించే ప్రయత్నం జరుగుతోందని ఆయన ఆరోపించారు. 2029 ఎన్నికల కోసం కోట్లాది ఓట్లు తొలగిస్తున్నారన్నది తన అభిప్రాయమని చెప్పారు. సంక్షేమ పథకాలపై పోటీ తప్పదని, ఇచ్చిన హామీలను అమలు చేయడం ప్రభుత్వ బాధ్యత అని స్పష్టం చేశారు.
#RevanthReddy #TheConclave2026 #TelanganaCM #TelanganaPolitics #KCR #YoungIndiaSkillsUniversity #TelanganaEducation #SkillDevelopment #RegionalRingRoad #Delimitation #SIR #VoterRevision #Congress #TelanganaNews
