నిబంధనలు బేఖాతర్ చేస్తున్నారంటూ కాంగ్రెస్ ఫైర్!
కడప జిల్లా వేంపల్లెలో మద్యం దుకాణాలు ప్రభుత్వ నిబంధనలను ఉల్లంఘిస్తున్నాయని కాంగ్రెస్ పార్టీ పులివెందుల సమన్వయకర్త మూలం రెడ్డి ధృవకుమార్ రెడ్డి ఆరోపించారు. రాష్ట్ర ప్రభుత్వం నిర్దేశించిన నిబంధనల ప్రకారం ఉదయం 10 గంటలకు తెరిచి రాత్రి 10 గంటలకు మూసివేయాల్సిన బ్రాందీ షాపులు, వేంపల్లెలో మాత్రం తెల్లవారుజామునే కార్యకలాపాలు ప్రారంభిస్తున్నాయని అన్నారు. బుధవారం విలేకరులతో మాట్లాడుతూ, ఉదయం 5 గంటలకే మద్యం విక్రయాలు జరుగుతున్నప్పటికీ పోలీసులు, ఎక్సైజ్ అధికారులు చూసీ చూడనట్లు వ్యవహరిస్తున్నారని విమర్శించారు.
కూలీల జీవితాలపై తీవ్ర ప్రభావం
వేకువజామునే మద్యం విక్రయాలు జరగడం వల్ల కూలీలు పనులకు వెళ్లకుండా మద్యం సేవిస్తున్నారని ధృవకుమార్ రెడ్డి ఆందోళన వ్యక్తం చేశారు. మద్యం మత్తులో రోడ్లపై పడిపోతున్న ఘటనలు పెరుగుతున్నాయని, ఇది కుటుంబాలపై తీవ్ర ప్రభావం చూపుతోందని అన్నారు. నిబంధనలను అమలు చేయాల్సిన అధికారులు చర్యలు తీసుకోకపోవడం బాధాకరమని విమర్శించారు. మద్యం దుకాణాల యాజమాన్యాలు యథేచ్ఛగా వ్యవహరించే పరిస్థితి ఏర్పడిందని ఆరోపించారు.
చర్యలు తీసుకోకపోతే ధర్నా హెచ్చరిక
వేంపల్లెలో బ్రాందీ షాపులు నిబంధనల ప్రకారం ఉదయం 10 గంటలకు మాత్రమే తెరుచుకునేలా పోలీసులు, ఎక్సైజ్ శాఖ అధికారులు వెంటనే చర్యలు తీసుకోవాలని ధృవకుమార్ రెడ్డి డిమాండ్ చేశారు. తెల్లవారుజామునే మద్యం విక్రయాలు కొనసాగితే కాంగ్రెస్ పార్టీ ఆధ్వర్యంలో మద్యం దుకాణాల ఎదుట ధర్నా నిర్వహిస్తామని హెచ్చరించారు. ప్రజల ఆరోగ్యం, జీవనోపాధిని దృష్టిలో పెట్టుకుని నిబంధనలను కఠినంగా అమలు చేయాలని అధికారులను కోరారు.
