వైసీపీ నేతల పర్యటనతో అలజడి
అమరావతి రాజధాని ప్రాంతంలో శనివారం ఉద్రిక్త పరిస్థితులు నెలకొన్నాయి. పెనుమాక ప్రాంతంలో పర్యటించేందుకు వచ్చిన వైసీపీ నేతల బృందాన్ని ఉండవల్లి వద్ద రాజధాని రైతులు అడ్డుకున్నారు. వాహనాలు ముందుకు వెళ్లకుండా రోడ్డుపై బైఠాయించి నిరసన తెలిపారు. నల్ల బ్యాడ్జీలు ధరించిన రైతులు వైసీపీ నాయకులకు వ్యతిరేకంగా నినాదాలు చేశారు. రాజధానిపై గతంలో తీసుకున్న వైఖరిని ప్రస్తావిస్తూ వైసీపీ నేతలకు అమరావతిలో పర్యటించే నైతిక హక్కు లేదని పేర్కొన్నారు.
మూడు రాజధానులపై ప్రశ్నలు
అధికారంలో ఉన్న సమయంలో మూడు రాజధానుల విధానాన్ని ముందుకు తీసుకొచ్చిన వైసీపీ ఇప్పుడు అమరావతి అంశంపై కొత్త వైఖరి ప్రదర్శిస్తోందని రైతులు విమర్శించారు. ముందుగా అమరావతినే ఏకైక రాజధానిగా అంగీకరించాలని డిమాండ్ చేశారు. గతంలో అమరావతి అభివృద్ధి నిలిచిపోయేలా నిర్ణయాలు తీసుకున్న నేతలు ఇప్పుడు రైతులను పరామర్శించడానికి రావడం సమంజసం కాదని ఆగ్రహం వ్యక్తం చేశారు. వైసీపీ నేతలు తమ వ్యాఖ్యలను వెనక్కి తీసుకుని రైతులకు క్షమాపణ చెప్పాలని డిమాండ్ చేశారు. రాజధానికి భూములు ఇవ్వమని ఎదురు తిరిగిన గ్రామాల్లో వైసీపీ లీగల్ టీమ్ పర్యటించింది. ఏ రకంగా మద్దతు ఇస్తామో వివరించి ఆ టీమ్ సభ్యులు వచ్చారు. ఇదే సందర్భంలో రాజకీయంగా అండగా వుంటామని, అలాగే వారి ఇబ్బందుల్ని ప్రత్యక్షంగా తెలుసుకోడానికి ఇవాళ ఎమ్మెల్సీలు లేళ్ల అప్పిరెడ్డి, అరుణ్, మాజీ మంత్రులు అంబటి రాంబాబు, పేర్ని నాని తదితరులు వెళ్లారు.
ఇరు వర్గాల మధ్య తోపులాట
ఇదే సమయంలో ఉండవల్లి సెంటర్ వద్ద వైసీపీ నేతలపై టీడీపీ సానుభూతిపరులు ఒక్కసారిగా రాళ్లు, కర్రలు, కోడిగుడ్లతో దాడికి తెగబడ్డారు. గో బ్యాక్ వైసీపీ అంటూ నల్లబ్యాడ్జీలతో టీడీపీ అనుకూలురు ఆందోళనకు దిగారు. ఈ సందర్భంగా వైసీపీ నాయకుల వాహనాలను అడ్డుకున్నారు. ఆందోళనకారుల రాళ్ల దాడిలో పోలీస్ తలకు తీవ్రగాయమైంది. అపస్మారక స్థితిలోకి వెళ్లిన అతన్ని సమీపంలోని ఆస్పత్రికి తరలించారు. వైసీపీ నేతలు ముందుకు వెళ్లేందుకు ప్రయత్నించగా రైతులు అడ్డుకోవడంతో ఇరు వర్గాల మధ్య తోపులాట జరిగింది. పరిస్థితి ఒక్కసారిగా ఉద్రిక్తంగా మారింది. కొద్దిసేపటికే పరస్పరం రాళ్లు విసురుకున్న ఘటన కూడా చోటుచేసుకుంది. ఈ ఘటనలో ఒక కానిస్టేబుల్ గాయపడినట్లు సమాచారం. ఆయనను వెంటనే ఆసుపత్రికి తరలించి చికిత్స అందించారు.
పోలీసుల జోక్యంతో అదుపు
ఘటన తీవ్రరూపం దాల్చడంతో పోలీసులు వెంటనే రంగప్రవేశం చేశారు. ఇరు వర్గాలను చెరో వైపునకు పంపించి పరిస్థితిని అదుపులోకి తీసుకొచ్చారు. మరింత ఉద్రిక్తత నెలకొనకుండా వైసీపీ నేతలను అక్కడి నుంచి వెనక్కి పంపించారు. అమరావతి ప్రాంతంలో భారీ పోలీసు బందోబస్తు ఏర్పాటు చేసి భద్రతను కట్టుదిట్టం చేశారు. శాంతియుతంగా నిరసన తెలుపుతున్న తమపై వైసీపీ శ్రేణులే కోడిగుడ్లతో దాడి చేశాయని రైతులు ఆరోపించారు. రాజధాని ప్రాంతంలో విభేదాలు సృష్టించే ప్రయత్నాలు జరుగుతున్నాయని విమర్శించారు. అమరావతి అంశంపై తమ పోరాటం కొనసాగుతుందని స్పష్టం చేశారు. రైతుల అభిప్రాయాలను పక్కనపెట్టి ఎలాంటి రాజకీయ కార్యక్రమాలు నిర్వహించరాదని పేర్కొన్నారు.
ఘటనపై పోలీసులు కేసు నమోదు చేసి దర్యాప్తు ప్రారంభించారు. రాళ్ల దాడులు, తోపులాటకు కారణమైన పరిస్థితులపై ఆధారాలు సేకరిస్తున్నారు. ప్రస్తుతం పరిస్థితి అదుపులో ఉన్నప్పటికీ అమరావతి ప్రాంతంలో ఉద్రిక్త వాతావరణం కొనసాగుతోంది. ఈ ఘటన రాజకీయంగా కూడా తీవ్ర చర్చకు దారితీసింది.
#Amaravati #AmaravatiFarmers #YSRCP #TDP #CapitalIssue #Penumaka #Undavalli #APPolitics #AndhraPradesh #PoliticalClash #AmaravatiCapital #CapitalFarmers #Police #BreakingNews #LatestNews #PoliticalNews #AndhraNews #TeluguNews #YSRCPLeaders #AmaravatiProtests
