తెలంగాణ, ఏపీలో ఇంకొకరికి ఛాన్స్?
మోదీ 3.0 కేబినెట్లో తెలంగాణ నుంచి ప్రస్తుతం జి. కిషన్రెడ్డి కేబినెట్ మంత్రిగా, బండి సంజయ్ సహాయమంత్రిగా ఉన్నారు. ఇప్పుడు తెలంగాణకు మరో కేంద్ర మంత్రి పదవి దక్కవచ్చన్న ప్రచారం ఊపందుకుంది. ఆదిలాబాద్ ఎంపీ నగేశ్ పేరు మంత్రి రేసులో వినిపిస్తోంది. అయితే మంత్రి పదవిని ఆశిస్తున్న నేతల జాబితా పెద్దగానే ఉంది. ఈటల రాజేందర్, ధర్మపురి అర్వింద్, డీకే అరుణ వంటి సీనియర్ నేతల పేర్లు కూడా రాజకీయ వర్గాల్లో చర్చకు వస్తున్నాయి. దీంతో కేబినెట్ విస్తరణ జరిగితే తెలంగాణ నుంచి ఎవరికి అవకాశం దక్కుతుందన్న అంశం ఆసక్తికరంగా మారింది. ఎంపీల రాజకీయ ప్రాధాన్యం, పార్టీకి చేసిన సేవలు, సామాజిక సమీకరణాలు కీలకంగా మారే అవకాశం ఉంది.
ఏపీ నుంచి మరో నేతకు అవకాశం?
ఆంధ్రప్రదేశ్ నుంచి ప్రస్తుతం ఎన్డీఏ ప్రభుత్వంలో కింజరాపు రామ్మోహన్ నాయుడు కేబినెట్ మంత్రిగా, పెమ్మసాని చంద్రశేఖర్ సహాయమంత్రిగా, బీజేపీకి చెందిన భూపతిరాజు శ్రీనివాస వర్మ సహాయమంత్రిగా ఉన్నారు. రామ్మోహన్ నాయుడుకు పౌర విమానయాన శాఖ, పెమ్మసానికి గ్రామీణాభివృద్ధి శాఖలో సహాయమంత్రి బాధ్యతలు దక్కగా, శ్రీనివాస వర్మకు భారీ పరిశ్రమల శాఖ సహాయమంత్రి బాధ్యతలు లభించాయి. ఇప్పుడు ఏపీ నుంచి కూడా కొత్తగా మరో నేతకు అవకాశం దక్కుతుందా అన్న చర్చ మొదలైంది. ఇద్దరు ముఖ్య నేతలు మంత్రి పదవిపై ఆశలు పెట్టుకున్నట్లు రాజకీయ వర్గాల్లో ప్రచారం జరుగుతోంది. అయితే కేబినెట్ విస్తరణపై తుది నిర్ణయం కేంద్ర నాయకత్వం తీసుకోవాల్సి ఉంది. తెలంగాణ, ఏపీ నుంచి కొత్త ముఖాలకు అవకాశం ఇస్తారా, ప్రస్తుత ప్రాతినిధ్యాన్నే కొనసాగిస్తారా అన్నది ఇప్పుడు ఆసక్తికరంగా మారింది.
#Modi3Cabinet #CabinetExpansion #CabinetReshuffle #TelanganaPolitics #AndhraPradeshPolitics #TelanganaBJP #AndhraPradeshBJP #UnionCabinet #UnionMinister #NarendraModi #GKishanReddy #BandiSanjay #Nagesh #EtelaRajender #DharmapuriArvind #DKAruna #RamMohanNaidu #PemmasaniChandrasekhar #SrinivasaVarma #NDAGovernment
