ఇటలీతో బంధం బలమంటున్న భారత్.
ఇటలీ ప్రధాని జార్జియా మెలోనీపై కాంగ్రెస్ నేత రాహుల్ గాంధీ చేసిన వ్యాఖ్యల నేపథ్యంలో కేంద్ర ప్రభుత్వం కీలకంగా స్పందించింది. భారత్–ఇటలీ సంబంధాలు ఎంతో లోతైనవి, బలమైనవని విదేశాంగ మంత్రిత్వ శాఖ స్పష్టం చేసింది. రెండు దేశాల మధ్య స్నేహం, ద్వైపాక్షిక సంబంధాలు పరస్పర గౌరవం, అవగాహన ప్రాతిపదికన కొనసాగాలని పేర్కొంది. రాహుల్ గాంధీ ప్రధాని నరేంద్ర మోదీ విదేశాంగ విధానాన్ని విమర్శిస్తూ ప్రపంచ నేతలను ఆలింగనం చేసుకోవడాన్ని ఎద్దేవా చేశారు. ఢిల్లీలో జరిగిన కాంగ్రెస్ కార్యక్రమంలో పార్టీ నేత సందీప్ దీక్షిత్తో రాహుల్ గాంధీ సరదాగా ఆలింగనం చేసుకున్న సందర్భంలో మెలోనీ పేరు ప్రస్తావనకు వచ్చింది. దీంతో ఈ వ్యాఖ్యలు రాజకీయ వివాదంగా మారాయి.
రాహుల్పై బీజేపీ ఆగ్రహం
కాంగ్రెస్ వ్యాఖ్యలపై బీజేపీ తీవ్ర స్థాయిలో స్పందించింది. ప్రధానిని విమర్శించడం రాజకీయ హక్కే అయినా, విదేశీ మహిళా నేతను రాజకీయ వ్యంగ్యంలోకి లాగడం సరికాదని బీజేపీ నేతలు విమర్శించారు. కేంద్ర మంత్రి ప్రహ్లాద్ జోషి రాహుల్ గాంధీ ఎప్పుడు పరిణతి సాధిస్తారని ప్రశ్నించారు. దేశాన్ని నడిపించేందుకు పరిపక్వ నాయకత్వం అవసరమని, ప్రధానిని అవమానించే భాష దేశ ప్రజలను అవమానించడమేనని ఆరోపించారు. కేంద్ర మంత్రి గిరిరాజ్ సింగ్ కూడా రాహుల్పై తీవ్ర వ్యాఖ్యలు చేశారు. బీజేపీ ఎంపీ బాన్సురి స్వరాజ్ ప్రతిపక్ష నేత పదవికి తగిన గౌరవాన్ని రాహుల్ భాష ప్రతిబింబించలేదని అన్నారు.
దౌత్యానికి రాజకీయ జోక్యం వద్దు
ఈ వివాదంలో కేంద్రం మాత్రం రాజకీయ విమర్శలకు అతీతంగా భారత్–ఇటలీ సంబంధాల ప్రాధాన్యతను ముందుకు తెచ్చింది. రెండు దేశాల మధ్య స్నేహం వ్యక్తిగత రాజకీయ వ్యాఖ్యల వల్ల దెబ్బతినకూడదన్న సందేశాన్ని విదేశాంగ శాఖ ఇచ్చింది. మెలోనీపై వ్యాఖ్యలను బీజేపీ నేతలు రాజకీయంగా తీవ్రంగా తప్పుపట్టగా, కాంగ్రెస్ మాత్రం మోదీ విదేశాంగ విధానంలో ప్రతీకాత్మక చర్యలకు అధిక ప్రాధాన్యత ఇస్తున్నారని విమర్శిస్తోంది. దీంతో ఈ వ్యవహారం కేవలం మెలోనీపై చేసిన వ్యాఖ్యలకే పరిమితం కాకుండా, భారత్ విదేశాంగ విధానం, రాజకీయ భాష, ప్రతిపక్ష బాధ్యతపై కొత్త చర్చకు దారితీసింది. కేంద్రం స్పష్టం చేసిన ‘పరస్పర గౌరవం, అవగాహన’ అనే అంశం ఇప్పుడు ఈ వివాదంలో కీలకంగా మారింది.
#RahulGandhi #GiorgiaMeloni #IndiaItalyRelations #IndiaItalyTies #BJP #Congress #NarendraModi #ForeignPolicy #MEA #PoliticalControversy #Italy #India
