తక్సింగ్లో విద్యార్థుల జాతీయ సంకల్పం.
అరుణాచల్ ప్రదేశ్లోని సున్నితమైన భారత్–చైనా సరిహద్దు ప్రాంతం తక్సింగ్ ఇప్పుడు దేశవ్యాప్తంగా చర్చనీయాంశంగా మారింది. ఆల్ అరుణాచల్ ప్రదేశ్ స్టూడెంట్స్ యూనియన్ (ఏఏపీఎస్యూ) సరిహద్దు పరిస్థితులను స్వయంగా అంచనా వేసేందుకు బృందాన్ని అక్కడికి పంపింది. చైనా పీపుల్స్ లిబరేషన్ ఆర్మీ కార్యకలాపాలు, సరిహద్దు భద్రత, రహదారులు, మౌలిక వసతుల పరిస్థితిని పరిశీలించడమే పర్యటన లక్ష్యమని సంఘం అధ్యక్షుడు మెజే టాకు తెలిపారు. ‘తక్సింగ్ చలో.. భారత్ బచావో’ పేరుతో చేపట్టిన ఈ కార్యక్రమం ఆగస్టు 15న తక్సింగ్లో జాతీయ జెండా ఎగురవేయడంతో ముగియనుంది. సరిహద్దు ప్రాంతాలపై దేశ ప్రజల దృష్టిని ఆకర్షించడమే తమ ఉద్దేశమని ఏఏపీఎస్యూ తెలిపింది.
చైనా ఆక్రమణపై ఆరోపణలు
ఈ పర్యటనకు నేపథ్యం అరుణాచల్కు చెందిన పీపుల్స్ పార్టీ ఆఫ్ అరుణాచల్ చేసిన ఆరోపణలే. 2023లో భారత సైన్యం ఖాళీ చేసిన సరిహద్దు పెట్రోలింగ్ పాయింట్ను చైనా సైనికులు ఆక్రమించారని ఆ పార్టీ పేర్కొంది. షెరా 5 పాయింట్ వద్ద భారత సైనికుల ఆనవాళ్లను పీఎల్ఏ ధ్వంసం చేసి, అప్పటి నుంచి భారత పెట్రోలింగ్ బృందాలను అక్కడికి వెళ్లనివ్వడం లేదని పీపీఏ ఆరోపించింది. నంగా పహార్ ప్రాంతాన్ని కూడా స్థానికులకు నిషేధిత ప్రాంతంగా మార్చినట్లు తెలిపింది. అయితే చైనా సైనికులు భారత భూభాగంలోకి చొరబడ్డారన్న ఆరోపణలను భారత ప్రభుత్వం, సైన్యం ఖండించాయి. ఈ నేపథ్యంలో ఆరోపణలను స్వయంగా పరిశీలించి వాస్తవ పరిస్థితిపై నివేదిక రూపొందించాలని ఏఏపీఎస్యూ నిర్ణయించింది.
పటిష్ఠ భద్రతకు డిమాండ్
సరిహద్దు ప్రాంతాల్లో నిరంతర పహారా, మెరుగైన రవాణా సౌకర్యాలు, వేగంగా మౌలిక వసతుల అభివృద్ధి అవసరమని విద్యార్థుల సంఘం డిమాండ్ చేస్తోంది. అరుణాచల్ ప్రదేశ్ భారతదేశంలో అంతర్భాగమేనని, దేశ ప్రాదేశిక సమగ్రతను దెబ్బతీసే ప్రయత్నాలను అంగీకరించబోమని ఏఏపీఎస్యూ అధ్యక్షుడు స్పష్టం చేశారు. సరిహద్దు గ్రామాల ప్రజలు, సైనికులకు అండగా నిలుస్తామని తెలిపారు. పీపీఏ ప్రకారం ప్రతికూల వాతావరణం కారణంగా శీతాకాలంలో భారత పహారా తగ్గిపోతుండగా, చైనా సైన్యం ఏడాది పొడవునా పహారా కొనసాగిస్తోందన్న ఆరోపణలు ఉన్నాయి.
#Taksing #ArunachalPradesh #IndiaChinaBorder #ChinaBorder #AAPSU #TaksingChaloBharatBachao #BorderSecurity #PLA #IndiaChinaTensions #NationalFlag #ArunachalBorder #India
