రామజన్మభూమి ట్రస్ట్కు నోటీసు
దోపిడీపై సుప్రీంకోర్టు కీలక ఆదేశాలు
అయోధ్య రామాలయంలో విరాళాల దుర్వినియోగం ఆరోపణలపై సుప్రీంకోర్టు కీలక ఆదేశాలు జారీ చేసింది. ఈ వ్యవహారంపై ఉత్తరప్రదేశ్ ప్రభుత్వం ఏర్పాటు చేసిన ప్రత్యేక దర్యాప్తు బృందం.. సిట్ ప్రస్తుత విచారణ స్థితిపై నివేదిక సమర్పించాలని ఆదేశించింది. ప్రధాన న్యాయమూర్తి జస్టిస్ సూర్యకాంత్ నేతృత్వంలోని ముగ్గురు సభ్యుల ధర్మాసనం విచారణ చేపట్టింది. శ్రీరామ జన్మభూమి తీర్థక్షేత్ర ట్రస్ట్కు కూడా నోటీసులు జారీ చేసింది. కేసు విచారణ కొనసాగుతున్నందున నివేదికను సీల్డ్ కవర్లో సమర్పించాలని స్పష్టం చేసింది.
సీబీఐ దర్యాప్తు కోరుతూ పిటిషన్లు
ఈ కేసులో సీబీఐ దర్యాప్తు చేపట్టాలని కోరుతూ దాఖలైన పిటిషన్లపై ధర్మాసనం విచారణ జరిపింది. విరాళాల వ్యవహారానికి సంబంధించిన ఎలక్ట్రానిక్ ఆధారాలను భద్రపరచాలని కూడా పిటిషనర్లు కోరారు. మరోవైపు ఆర్జేడీ ఎంపీ సుధాకర్ సింగ్ దాఖలు చేసిన పిటిషన్లో రామజన్మభూమి తీర్థక్షేత్ర ట్రస్ట్ పూర్తి ఆర్థిక లావాదేవీల వివరాలను బహిర్గతం చేయాలని విజ్ఞప్తి చేశారు. విదేశీ విరాళాల వివరాలను కూడా వెల్లడించాలని కోరారు. ఈ పిటిషన్లన్నింటినీ కలిపి సుప్రీంకోర్టు విచారిస్తోంది.
జూలై 20లోపు నివేదిక
ఉత్తరప్రదేశ్ ప్రభుత్వం తరఫున హాజరైన సొలిసిటర్ జనరల్ తుషార్ మెహతా, ఎస్ఐటీ నివేదికను జూలై 20లోపు కోర్టుకు సమర్పిస్తామని తెలిపారు. ఎస్ఐటీ సభ్యుల వివరాలతో పాటు ఇప్పటివరకు జరిగిన దర్యాప్తు పురోగతిని నివేదికలో పొందుపరుస్తామని చెప్పారు. విచారణకు భంగం కలగకుండా ఆ నివేదికను పిటిషనర్లకు ఇవ్వాల్సిన అవసరం లేదని ధర్మాసనం స్పష్టం చేసింది.
విరాళాల వివాదం దేశవ్యాప్తంగా చర్చ
రామాలయ విరాళాల దుర్వినియోగం ఆరోపణలు దేశవ్యాప్తంగా తీవ్ర చర్చకు దారితీశాయి. విరాళాల లెక్కింపులో అక్రమాలు జరిగాయని ఎస్ఐటీ ప్రాథమిక నివేదికలో గుర్తించినట్లు ఇప్పటికే వెల్లడైంది. ఆ ఆధారాలతోనే ట్రస్ట్ ఎఫ్ఐఆర్ నమోదు చేయించింది. ఈ కేసులో ఇప్పటికే పలువురిని అరెస్టు చేశారు. ఆలయ విరాళాల భద్రతపై తీవ్ర సందేహాలు వ్యక్తమవుతున్నాయి.
పారదర్శకతపై పెరుగుతున్న డిమాండ్
ఈ వివాదం తర్వాత ఆలయ నిధుల వినియోగంలో పూర్తి పారదర్శకత ఉండాలని రాజకీయ పార్టీలు, పిటిషనర్లు డిమాండ్ చేస్తున్నారు. విరాళాల సేకరణ, లెక్కింపు, భద్రత, వినియోగానికి సంబంధించి కఠిన పర్యవేక్షణ వ్యవస్థ అవసరమని అభిప్రాయాలు వ్యక్తమవుతున్నాయి. మరోవైపు విచారణ పూర్తయ్యే వరకు ఎలాంటి నిర్ణయాలకు వెళ్లకూడదని కోర్టు స్పష్టం చేసింది. ఎస్ఐటీ నివేదిక ఆధారంగా తదుపరి విచారణలో మరిన్ని కీలక నిర్ణయాలు వెలువడే అవకాశం ఉంది.
