సస్పెన్షన్‌ ఉత్తర్వుల్లో కొన్నే..! విచారణలో బయటపడింది మరెన్నో..!

నైట్‌ వాచ్‌మెన్‌ నుంచి ఆలయ ఖజానాపై పట్టు వరకు..!

చెక్కుల నుంచి లాకర్‌ తాళాల దాకా..

భక్తుల వాంగ్మూలాల నుంచి ఆభరణాల కస్టడీ వరకు..!

సస్పెన్షన్‌తో ముగిసే వ్యవహారం కాదిది..

అసలు విచారణ ఇప్పుడే మొదలు!

జూనియర్ అసిస్టెంట్ శివప్రసాద్ సస్పెన్షన్ ఉత్తర్వుల్లోనూ మతలబు.

దేవుడి సన్నిధిలో పనిచేసే ఉద్యోగి చేతిలో ఉండేది కేవలం ఉద్యోగ బాధ్యత కాదు.. భక్తుల నమ్మకం. హుండీలో పడే ప్రతి నాణెం వెనుక ఒక భక్తుడి విశ్వాసం ఉంటుంది. దేవుడికి సమర్పించే ప్రతి బంగారు వస్తువు వెనుక ఒక కుటుంబం భక్తి ఉంటుంది. అభిషేకానికి వచ్చే పాలు, పూజకు వచ్చే పూలు కూడా ఆలయ వ్యవస్థలో పవిత్రమైన సమర్పణలే. అలాంటి ఆలయంలో ఆర్థిక వ్యవహారాలు, ఆభరణాల కస్టడీ, బ్యాంకు లాకర్‌ తాళాలు ఒక ఉద్యోగి చుట్టూ తిరిగాయన్న ఆరోపణలు రావడం సాధారణ పరిపాలనా లోపంగా కొట్టిపారేయలేని విషయం. కడపజిల్లా ప్రొద్దుటూరులోని శ్రీ అగస్తీశ్వరస్వామి (శివాలయం) దేవస్థానానికి సంబంధించి తాజాగా వెలువడిన సస్పెన్షన్‌ ఉత్తర్వులు ఈ వ్యవహారాన్ని మరోసారి ప్రజల ముందుకు తెచ్చాయి. అయితే అధికారిక ఉత్తర్వుల్లో పేర్కొన్నవి కొన్ని అభియోగాలే. ఉన్నతాధికారుల విచారణలో మరిన్ని ఆర్థిక, పరిపాలనా అంశాలు వెలుగులోకి వచ్చినట్లు చెబుతున్న నేపథ్యంలో.. అసలు కథ ఇంతటితో ముగిసిందని అనుకుంటే పొరపాటే. నిజానికి ఈ వ్యవహారంలో మొదట కనిపిస్తున్న ప్రశ్న చాలా చిన్నదిగా అనిపించవచ్చు. ఒక జూనియర్‌ అసిస్టెంట్‌ వద్ద ఆలయ బ్యాంకు లాకర్‌ తాళం ఎందుకు ఉంది? కానీ ఈ ఒక్క ప్రశ్న వెనుక మొత్తం వ్యవస్థను కుదిపే ప్రశ్నలు దాగి ఉన్నాయి. తాళం ఎవరు ఇచ్చారు? ఎప్పుడు ఇచ్చారు? ఎందుకు ఇచ్చారు? తాళం తిరిగి ఎవరి వద్ద ఉండాలి? దాన్ని మరొకరికి అప్పగించే అధికారం ఆ ఉద్యోగికి ఉందా? ఆ తాళంతో లాకర్‌ ఎప్పుడు తెరవబడింది? ఎవరి సమక్షంలో తెరవాలి? ఎవరి సమక్షంలో తెరవలేదు? లాకర్‌ తెరిచినప్పుడు లోపల ఉన్న బంగారం, వెండి, ఇతర వస్తువుల జాబితా తయారైందా? బ్యాంకు రికార్డులు ఏమంటున్నాయి? సీసీ కెమెరా దృశ్యాలు ఏమి చెబుతున్నాయి? ఇవన్నీ తేలితేనే తాళం వ్యవహారం వెనుక అసలు పరిమాణం తెలుస్తుంది.

2026 సెప్టెంబర్‌ 9న జారీ చేసిన అధికారిక సస్పెన్షన్‌ ఉత్తర్వుల్లోనే ఈ వ్యవహారానికి సంబంధించిన కీలక అంశాలు ఉన్నాయి. విచారణ సందర్భంగా 2026 జనవరి 5న అప్పటి ఈవో సి. శంకర బాలాజీ కర్నూలు దేవాదాయశాఖ డిప్యూటీ కమిషనర్‌ ఎదుట ఇచ్చిన వాంగ్మూలంలో, ఆలయానికి సమర్పించిన కొన్ని బంగారు, వెండి వస్తువులను అప్పటి ఈవో కస్టడీకి అప్పగించినట్లు శివప్రసాద్‌ నిరూపించలేకపోయినట్లు పేర్కొన్నారు. 2023 మార్చి 5న రసీదు నంబర్‌ 22కు సంబంధించిన బంగారు గొలుసు, 2022 సెప్టెంబర్‌ 5న రసీదు నంబర్‌ 21కు సంబంధించిన వెండి గొలుసు–డాలర్‌ వ్యవహారాలు ఇందులో ప్రస్తావనకు వచ్చాయి. ఒక ఆభరణం ఆలయానికి వచ్చిన క్షణం నుంచి దాని ప్రయాణం రికార్డులో ఉండాలి. రసీదు.. స్టాక్‌ రిజిస్టర్‌.. కస్టడీ.. లాకర్‌.. భౌతిక తనిఖీ.. తిరిగి ధృవీకరణ. ఈ గొలుసులో ఒక్క లింక్‌ తెగినా అనుమానం మొదలవుతుంది. అధికారిక ఉత్తర్వుల్లో రెండో కీలక అంశం మరింత తీవ్రమైనది. శివప్రసాద్‌ ఆధీనంలో ఉన్న ఇండియన్‌ బ్యాంకు లాకర్‌ తాళాన్ని రిటైర్డ్‌ గ్రేడ్‌–1 ఈవో కె. రామచంద్రాచార్యులుకు అప్పగించారని, ఆయన 2025 డిసెంబర్‌ 22న అధికారిక అనుమతి లేకుండా లాకర్‌ తెరిచారని పేర్కొన్నారు. అదే సమయంలో ఈవో, ఆభరణాల వెరిఫికేషన్‌ అధికారి, కర్నూలు దేవాదాయశాఖ అధికారులు, ఆలయ చైర్మన్‌ వంటి సంబంధిత వ్యక్తులు అక్కడే ఉన్నప్పటికీ వారి సమక్షంలో లాకర్‌ తెరవలేదని ఉత్తర్వులు చెబుతున్నాయి. అంతేకాదు.. లాకర్‌ తాళాన్ని ఈవో వద్ద కాకుండా తన వద్దే ఉంచుకున్నాడన్న అభియోగం కూడా ఉంది. ఇది చిన్న పరిపాలనా తప్పిదమైతే ఇంత సున్నితమైన అంశంగా ఎందుకు మారింది? ఒక లాకర్‌ తాళం ఎక్కడ ఉండాలన్నది కూడా నిబంధనల ప్రకారం నిర్ణయించబడుతుంది. మరి ఆ నిబంధనను ఎవరు పక్కన పెట్టారు?

కానీ ఇక్కడే కథలో మరో పొర తెరుచుకుంటోంది. ఉన్నతాధికారుల ఎదుట జరిగిన విచారణల్లో చెక్కులు, బ్యాంకు లావాదేవీలు, సంబంధిత వ్యక్తుల వాంగ్మూలాలు వంటి అంశాలు కూడా వెలుగులోకి వచ్చినట్లు తెలుస్తోంది. కొన్ని సందర్భాల్లో కుటుంబ సభ్యుల పేర్లతో చెక్కులు రాసినట్లు, మరికొన్ని సందర్భాల్లో భక్తుల పేర్లను ఉపయోగించి నిధులు చెలామణి చేసినట్లు విచారణలో వెల్లడైనట్లు సమాచారం. ఇవి నిజమని తేలాలంటే ఒక్కో చెక్కు వెనుక ఉన్న బ్యాంకు రికార్డును తెరవాలి. చెక్కు నంబర్‌ ఏమిటి? తేదీ ఏమిటి? ఎవరి పేరుతో ఉంది? ఎవరు సంతకం చేశారు? ఏ ఖాతాలో జమ అయింది? ఎవరు నగదు తీసుకున్నారు? ఆ డబ్బు ఎక్కడికి వెళ్లింది? ఆలయ ఖాతా నుంచి బయటకు వెళ్లిన ప్రతి రూపాయికి బిల్లు ఉందా? సేవ లేదా సరఫరా జరిగినట్లు ఆధారం ఉందా? ఇదే అసలు విచారణ. కుటుంబ సభ్యుల పేర్లతో చెక్కులు రాశారన్న ఆరోపణలు ఉన్నాయి వీటిని మరింత లోతైన విచారణకు అధికారులు వెళ్లాల్సిందే. పేరు ఉన్నంత మాత్రాన ఆ వ్యక్తి తప్పు చేసినట్లు కాదు. కానీ ఆలయానికి సంబంధించిన డబ్బు కుటుంబ సభ్యుడి ఖాతాలోకి వెళ్ళడానికి కారణం ఏమిటో నిర్ధారించాలి. సరఫరా చేశారా? సేవ అందించారా? బిల్లు సమర్పించారా? ఆ బిల్లును ఎవరు ఆమోదించారు? చెక్కు ఎవరు జారీ చేశారు? నగదు ఎవరు తీసుకున్నారు? ఆ మొత్తాన్ని చివరికి ఎవరు వినియోగించారు? ఈ ప్రశ్నలకు బ్యాంకు స్టేట్‌మెంట్‌, వౌచర్‌, బిల్లు, రిజిస్టర్‌ సమాధానం చెబుతాయి. మాటలతో కాదు.. రికార్డులతోనే అసలు నిజాలను తేల్చాలి.

భక్తుల పేర్లను ఉపయోగించి చెక్కులు రాయించుకుని, ఆ తర్వాత ఆ నిధులను మళ్లించారన్న ఆరోపణలు కూడా దేవాదాయ శాఖ అధికారులు విచారణలో తేలిన అంశాలే. ఇందులో కీలకమైన అంశం ఏమిటంటే.. సంబంధిత వ్యక్తులు అధికారుల ఎదుట హాజరై తమకు తెలిసిన విషయాలను సైతం వెల్లడించారన్న సమాచారం కీలకమైనది. అయితే అది కేవలం బయట వినిపించే ఆరోపణ కాదు. అధికారిక విచారణ రికార్డులోకి వెళ్లిన అంశం. ఇక దాని తర్వాత చేయాల్సింది చాలా సులువు—వాంగ్మూలాన్ని బ్యాంకు రికార్డుతో సరిపోల్చడం. చెక్కు ఎవరి పేరుతో ఉంది? డబ్బు నిజంగా ఆ వ్యక్తికి చేరిందా? చేరకపోతే ఎవరికి వెళ్లింది? నగదు తీసుకున్న వ్యక్తి ఎవరు? బ్యాంకులో సీసీ కెమెరా రికార్డు ఉందా? ఖాతా నుంచి వెంటనే మరొక ఖాతాకు బదిలీ జరిగిందా? ఒక్కో లావాదేవీని వెనక్కి అనుసరిస్తే డబ్బు మార్గం స్పష్టమవుతుంది. మరో ఆరోపణ మరింత తీవ్రమైనది. గతంలో ఆలయంలో పనిచేసిన ఒక పూజారి పేరుతో చెక్కులు రాసి, ప్రస్తుతం ఆయన పక్షవాతంతో మంచానికే పరిమితమైన పరిస్థితిలో ఉండగా అతని పేరిట చెక్కులు రాసి ఆ నిధులను వినియోగించుకున్నట్లు విచారణలో ప్రస్తావనకు వచ్చినట్లు సమాచారం. ఇది నిజమైతే సంబంధిత పూజారి వాంగ్మూలం అత్యంత కీలకం. ఆయన మాట్లాడలేని పరిస్థితుల్లో ఆ కుటుంబ సభ్యులిచ్చిన వాంగ్మూలం కూడా కీలకమైందే. చెక్కుపై సంతకం చేశారా? డబ్బు అందుకున్నారా? చెక్కు గురించి ఆయనకు తెలుసా? ఆయనకు డబ్బు అందకపోతే ఎవరు తీసుకున్నారు? ఆయన తరఫున ఎవరైనా వ్యవహరించారా? బ్యాంకు రికార్డులో ఏముంది? ఇలాంటి ప్రశ్నలకు సమాధానాలు లభించినప్పుడే దాని అసలు సంగతులకు బలం వస్తుంది. ఒక బలహీన స్థితిలో ఉన్న వ్యక్తి పేరును ఉపయోగించి నిధులు మళ్లించారన్న విషయం రుజువైతే అది అత్యంత తీవ్రమైన అంశంగా పరిగణించాల్సిందే.

పాలు.. పూల వ్యవహారం కూడా ఈ కథలో చిన్న విషయం కాదు. అభిషేకానికి ఉపయోగించే పాలపై నెలనెలా డబ్బులు వసూలు చేశారన్న ఆరోపణలు ఉన్నాయి. పూల సరఫరా విషయంలోనూ అక్రమ వసూళ్లు జరిగాయని విచారణలో వచ్చినట్లు చెబుతున్నారు. ఒక్క నెలలో అది చిన్న మొత్తంగా కనిపించవచ్చు. కానీ సంవత్సరాల లెక్క వేస్తే పరిస్థితి మారిపోతుంది. ప్రతిరోజూ ఎంత పాలు వచ్చాయి? ఎక్కడి నుంచి వచ్చాయి? ఎంత ధరకు కొనుగోలు చేశారు? ఎంత పరిమాణం ఆలయంలో వినియోగించారు? పూల కొనుగోలు రికార్డులు ఎక్కడ ఉన్నాయి? చెల్లింపులు ఎవరికి చేశారు? నెలవారీగా ఎంత మొత్తం వెళ్లింది? ఈ లెక్కలను సరిపోల్చితే అసలు విషయం బయటపడుతుంది. చిన్న చిన్న మొత్తాలే పెద్ద వ్యవస్థలో భారీ మొత్తాలుగా మారుతాయి.
ఇక్కడే అసలు ప్రశ్న ఉద్యోగి దగ్గరికి మాత్రమే పరిమితం కాదు. ఇంతకాలం ఈ వ్యవహారాలు జరిగాయని ఆరోపణలు వస్తే.. పైస్థాయి పర్యవేక్షణ ఏం చేసింది? ఈవోలు ఎక్కడ ఉన్నారు? ఆడిట్‌ ఎక్కడ ఉంది? స్టాక్‌ వెరిఫికేషన్‌ ఎక్కడ ఉంది? బ్యాంకు రీకన్సిలియేషన్‌ ఎక్కడ ఉంది? అప్పటి ఆలయ చైర్మన్‌ పర్యవేక్షణ ఎంతవరకు ఉంది? దేవాదాయశాఖ ఉన్నతాధికారుల తనిఖీలు ఏమి చెబుతున్నాయి? ఒక ఉద్యోగి చేతిలో లాకర్‌ తాళం ఉండే స్థాయికి వ్యవస్థ ఎలా చేరుకుంది? ఇది కేవలం ఒక ఉద్యోగి కథ అయితే ఇన్ని ప్రశ్నలు ఎందుకు తలెత్తుతున్నాయి?

నైట్‌ వాచ్‌మెన్‌గా ప్రారంభించి జూనియర్‌ అసిస్టెంట్‌గా ఎదిగాడన్న విషయం కూడా చర్చకు వస్తోంది. అయితే ఉద్యోగపరమైన ఎదుగుదల స్వతహాగా తప్పు కాదు. పదోన్నతి నిబంధనల ప్రకారం జరిగితే దానిపై అభ్యంతరం ఉండాల్సిన అవసరం లేదు. అసలు ప్రశ్న మాత్రం వేరే. పదోన్నతి తర్వాత అతనికి ఎలాంటి బాధ్యతలు అప్పగించారు? ఆ బాధ్యతలకు అనుగుణంగా పర్యవేక్షణ వ్యవస్థ ఉందా? ఆభరణాలు, లాకర్‌, చెక్కులు, ఆర్థిక రికార్డులు వంటి సున్నితమైన అంశాలు ఒకే వ్యక్తి చుట్టూ ఎందుకు కేంద్రీకృతమయ్యాయి? ఒక వ్యక్తి లేకుండా పని నడవని స్థాయికి వ్యవస్థ ఎందుకు వెళ్లింది? పరిపాలన వ్యక్తుల మీద ఆధారపడితే ఇలాంటి ప్రశ్నలు తప్పవు. ఇంకా కీలకమైన ప్రశ్న—లాకర్‌ తాళం ఎవరి వద్ద ఉండాలి అన్నది. తాళం కస్టడీపై స్పష్టమైన రికార్డు ఉందా? తాళం అప్పగించే సమయంలో హ్యాండ్‌ఓవర్‌ రిపోర్టు ఉందా? మరొక అధికారికి ఇచ్చినప్పుడు రాతపూర్వక అనుమతి ఉందా? 2025 డిసెంబర్‌ 22న లాకర్‌ తెరిచినప్పుడు బ్యాంకు రిజిస్టర్‌లో ఏముంది? ఎవరు సంతకం చేశారు? ఎవరు హాజరయ్యారు? ఎవరు హాజరు కాలేదు? లాకర్‌లోని వస్తువుల జాబితా వెంటనే తయారైందా? ఆ జాబితాను తరువాతి తనిఖీతో సరిపోల్చారా? ఈ ఒక్క రోజును నిమిషం నిమిషంగా పరిశీలిస్తే చాలా ప్రశ్నలకు సమాధానాలు దొరికే అవకాశం ఉంది.

ఆభరణాల విషయంలోనూ విచారణ అదే స్థాయిలో సాగాలి. ఆలయానికి వచ్చిన ప్రతి బంగారు, వెండి వస్తువు రసీదుతో మొదలవుతుంది. ఆ తర్వాత అది స్టాక్‌ రిజిస్టర్‌లోకి వెళ్లాలి. కస్టడీ ఎవరిదో స్పష్టంగా ఉండాలి. లాకర్‌లో ఉంచితే ఎప్పుడు ఉంచారో నమోదు కావాలి. బయటకు తీస్తే ఎందుకు తీసారో రికార్డు ఉండాలి. తిరిగి పెట్టినప్పుడు ఎవరి సమక్షంలో పెట్టారో ఉండాలి. ఈ వ్యవస్థలో ఎక్కడైనా ఖాళీ ఉంటే ఆ ఖాళీని ఎవరు ఉపయోగించుకున్నారన్నదే ప్రశ్న. అధికారిక సస్పెన్షన్‌ ఉత్తర్వుల్లో పేర్కొన్న రెండు ఆభరణాల వ్యవహారం అందుకే ప్రాధాన్యం సంతరించుకుంది. ఇక “విచారణలో అన్నీ బయటపడ్డాయి” అని చెప్పడం ఒక్కటే సరిపోదు. బయటపడ్డాయని చెబుతున్న ప్రతి అంశానికి పత్రం ఉండాలి. వాంగ్మూలం ఉండాలి. చెక్కు ఉండాలి. బ్యాంకు ఎంట్రీ ఉండాలి. ఆడిట్‌ అభ్యంతరం ఉండాలి. అవసరమైతే ఫోరెన్సిక్‌ పరిశీలన ఉండాలి. ఎందుకంటే ఇది కేవలం రాజకీయ ఆరోపణల కథ కాదు. ఆలయ నిధుల వ్యవహారం. ఇక్కడ ప్రతి ఆరోపణకు పత్రం, ప్రతి పత్రానికి లావాదేవీ, ప్రతి లావాదేవీకి బాధ్యత నిర్ధారించాల్సిందే.

ఇంకో ప్రశ్న కూడా తప్పదు. సస్పెన్షన్‌ ఉత్తర్వుల్లో పేర్కొన్న అభియోగాలకే పరిమితమై విచారణ ఆగిపోతుందా? లేక విచారణలో వెలుగులోకి వచ్చినట్లు చెబుతున్న మిగిలిన ఆర్థిక అంశాలపై కూడా ప్రత్యేకంగా దర్యాప్తు జరుగుతుందా? ఒకవేళ చెక్కులు, బ్యాంకు ఖాతాలు, వాంగ్మూలాలు, ఆభరణాల రికార్డులు పరస్పరం ఒకే దిశను చూపిస్తే.. అప్పుడు ఇది కేవలం శాఖాపరమైన క్రమశిక్షణ చర్యగా ఉండదు. చట్టపరమైన చర్య అవసరమా అన్నది సంబంధిత అధికారులే నిర్ణయించాల్సి ఉంటుంది.
అదే సమయంలో ఎవరినైనా ముందుగానే దోషిగా ప్రకటించడం కూడా సరైనది కాదు. సస్పెన్షన్‌ నేర నిర్ధారణ కాదు. ఆరోపణలు నిర్ధారణ కావాలి. విచారణకు అవకాశం ఇవ్వాలి. పత్రాలను పరిశీలించాలి. సాక్ష్యాలను పరీక్షించాలి. నిజం ఏదైనా సరే బయటకు రావాలి. కానీ విచారణ పేరుతో నిజమైన ఆధారాలు దాచిపెట్టడం మాత్రం మరింత ప్రమాదకరం. దేవుడి సొమ్ము విషయంలో విచారణ ఎంత లోతుగా వెళ్లినా ప్రజలు స్వాగతిస్తారు.

తెర వెనుక ఎవరైనా అదృశ్య శక్తులు ఉన్నాయన్న అనుమానాలు ఉంటే వాటినీ ఆధారాలతోనే బయటపెట్టాలి. ఎవరి అండతో ఒక ఉద్యోగి ఇంతకాలం ప్రభావం చూపాడన్న ప్రశ్నకు సమాధానం కావాలంటే ఫైళ్లు చూడాలి. ఎవరు ఏ ఆదేశం ఇచ్చారో చూడాలి. ఎప్పుడు ఎవరు సంతకం చేశారో చూడాలి. తాళం ఎవరికి ఇవ్వాలని ఎవరు చెప్పారు? లాకర్‌ ఎందుకు ఆ విధంగా తెరవబడింది? ఏ ఫిర్యాదుపై ఏ అధికారి ఏ చర్య తీసుకున్నారు? ఇలా పత్రాల గొలుసును అనుసరిస్తేనే తెర వెనుక ఉన్నవారి పాత్ర ఏమైనా ఉందా లేదా అన్నది తేలుతుంది. పేర్లు ఊహించడం కాదు.. ఆధారాలు చూపించడం ముఖ్యం. ఇప్పుడు దేవాదాయశాఖ ముందు ఉన్నది ఒక సస్పెన్షన్‌ ఫైల్‌ మాత్రమే కాదు. ఒక ఆలయ పరిపాలనపై ప్రజల నమ్మకానికి సంబంధించిన ప్రశ్న. గత కొన్నేళ్ల ఆర్థిక లావాదేవీలను సమగ్రంగా ఆడిట్‌ చేయాలి. అన్ని బ్యాంకు ఖాతాలను రీకన్సైల్‌ చేయాలి. అన్ని చెక్కులను పరిశీలించాలి. ఆభరణాల రిజిస్టర్‌ను భౌతిక నిల్వలతో సరిపోల్చాలి. లాకర్‌ యాక్సెస్‌ రికార్డులను పరిశీలించాలి. సంబంధిత వ్యక్తుల వాంగ్మూలాలను లిఖితపూర్వక ఆధారాలతో ధృవీకరించాలి. అవసరమైతే ఫోరెన్సిక్‌ ఆడిట్‌ చేయాలి. అప్పుడే “ఎంత పోయింది?” కంటే ముందుగా “ఏం జరిగింది?” అన్న ప్రశ్నకు సమాధానం వస్తుంది.

ఎందుకంటే అసలు ప్రమాదం డబ్బు పోవడంలో మాత్రమే లేదు. దేవుడి సొమ్ము విషయంలో ఒకసారి విశ్వాసం పోతే దాన్ని తిరిగి సంపాదించడం చాలా కష్టం. భక్తుడు హుండీలో వేసే నోటుకు లెక్క ఉండాలని కోరుకుంటాడు. సమర్పించే బంగారానికి భద్రత ఉండాలని కోరుకుంటాడు. తాను ఇచ్చిన విరాళం నిజంగా ఆలయానికే ఉపయోగపడాలని కోరుకుంటాడు. ఆ నమ్మకాన్ని కాపాడటం దేవాదాయశాఖ బాధ్యత. ఉద్యోగిని కాపాడటం కాదు. వ్యవస్థను కాపాడాలి. తప్పు చేసినవారిని చట్టం ముందు నిలబెట్టాలి. తప్పు చేయని వారిని అనుమానాల నుంచి బయటకు తీయాలి. అందుకే ఈ వ్యవహారంలో ఇప్పుడు అసలు ప్రశ్న—సస్పెన్షన్‌ ఎందుకు? అన్నది కాదు. సస్పెన్షన్‌ తర్వాత ఏమిటి? అన్నదే. అధికారిక ఉత్తర్వుల్లో పేర్కొన్న మూడు అభియోగాలపై శాఖ చర్య మొదలైంది. విచారణలో మరిన్ని అంశాలు బయటపడ్డాయని చెబుతున్నట్లయితే వాటిపై తదుపరి చర్య ఏమిటి? చెక్కుల సంగతి ఏమైంది? బ్యాంకు ఖాతాల సంగతి ఏమైంది? భక్తుల వాంగ్మూలాల సంగతి ఏమైంది? పూజారి పేరుతో జరిగినట్లు చెబుతున్న లావాదేవీల సంగతి ఏమైంది? పాలు, పూల వ్యవహారాల సంగతి ఏమైంది? లాకర్‌ తాళం వెనుక పూర్తి కథ ఏమిటి? ఆభరణాల కస్టడీపై తుది లెక్క ఏమిటి? ఈ ప్రశ్నలకు సమాధానాలు రాకుండా శివప్రసాద్ అనబడే జూనియర్ అసిస్టెంట్ ను సస్పెన్షన్‌తో ఫైల్‌ మూసేస్తే అది పరిపాలనా చర్య మాత్రమే అవుతుంది. కానీ విచారణను చివరి దాకా తీసుకెళ్లి నిజానిజాలు బయటపెడితేనే అది దేవుడి సొమ్ముపై న్యాయం చేసినట్టవుతుంది. తప్పు చేసినవారెవరైనా చట్టం ముందు నిలబడాలి. తప్పు చేయనివారెవరైనా అనుమానాల నుంచి బయటపడాలి. ఎవరి పేరు ఎంత పెద్దదైనా, ఎవరి పదవి ఎంత చిన్నదైనా ప్రమాణం ఒక్కటే ఉండాలి—దేవుడి సొమ్ముకు లెక్క ఉందా? భక్తుడి నమ్మకానికి విలువ ఉందా? సస్పెన్షన్‌ ఉత్తర్వుల్లో కొన్నే కనిపించాయి.. విచారణలో మరెన్నో బయటపడ్డాయన్నది ఇప్పుడు వినిపిస్తున్న ప్రశ్న. ఆ “మరెన్నో”లో నిజం ఎంత? ఆరోపణ ఎంత? ఆధారం ఎంత? బాధ్యత ఎవరిది? అన్నది తేల్చాల్సిన సమయం వచ్చింది. సస్పెన్షన్‌తో ఒక అధ్యాయం ముగిసిందనుకుంటే పొరపాటే. నిజమైన విచారణ మొదలైతేనే అసలు కథ మొదలవుతుంది.

#ProddaturTemple #AgastheeswaraswamyTemple #Sivaprasad #TempleSuspension #TempleInvestigation #TempleFunds #TempleLocker #TempleJewellery #ChequeTransactions #TempleAudit #EndowmentsDepartment #Proddatur #AndhraPradesh