ఆందోళన కలిగిస్తున్న రోడ్డు ప్రమాదాలు
దేశంలోనే తెలంగాణలో అత్యధికం
రాష్ట్రంలో రికార్డు స్థాయిలో యాక్సిడెంట్లు
దేశంలోని పెద్ద రాష్ట్రాలన్నింటికంటే తెలంగాణలో రహదారి ప్రమాదాల సంఖ్య అత్యంత వేగంగా పెరుగుతోందని కేంద్ర రోడ్డు రవాణా, రహదారుల మంత్రిత్వ శాఖ తాజా నివేదికలో వెల్లడించింది. దేశ జాతీయ సగటు ప్రమాదాల వృద్ధి రేటు కేవలం 1.5 శాతంగా ఉండగా, తెలంగాణలో అది ఏకంగా 13.5 శాతానికి చేరింది. 2023 సంవత్సరంలో రాష్ట్రంలో 22,903 రోడ్డు ప్రమాదాలు నమోదు కాగా, 2024 నాటికి ఆ సంఖ్య 25,986కు పెరిగింది. అంటే కేవలం ఒక్క ఏడాదిలోనే అదనంగా 3,000 ప్రమాదాలు సంభవించాయి. మహారాష్ట్ర, తమిళనాడు, కర్ణాటక, మధ్యప్రదేశ్ వంటి పెద్ద రాష్ట్రాలలో ఈ ప్రమాదాల పెరుగుదల రేటు 5 శాతం కంటే తక్కువగానే ఉంది. కొన్ని ఈశాన్య రాష్ట్రాలు మినహా దేశంలో ఏ పెద్ద రాష్ట్రం కూడా ప్రమాదాల వృద్ధిలో తెలంగాణ కంటే ముందు లేదు.
మరణాలు, అతివేగం ప్రధాన కారణాలు
ప్రమాదాలతో పాటు రహదారిపై ప్రాణాలు కోల్పోతున్న వారి సంఖ్య కూడా ఆందోళనకరంగా మారింది. దక్షిణ భారతదేశంలోని అన్ని రాష్ట్రాల కంటే తెలంగాణలోనే రోడ్డు ప్రమాదాల మరణాల రేటు అత్యధికంగా పెరిగింది. 2024లో రాష్ట్రంలో 7,900 మంది రోడ్డు ప్రమాదాల వల్ల మరణించారు, ఇది గత ఏడాది కంటే 3.7 శాతం ఎక్కువ. ఈ ప్రమాదాలకు అతివేగమే అత్యంత ముఖ్యమైన కారణమని గణాంకాలు స్పష్టం చేస్తున్నాయి. కేవలం అతివేగం వల్లనే 7,500 కంటే ఎక్కువ ప్రమాదాలు జరిగాయి, వీటిలో సుమారు 2,760 మంది ప్రయాణికులు ప్రాణాలు కోల్పోయారు. నిబంధనలు పాటించకుండా వాహనాలు నడపడం వల్లే ఈ ఘోరాలు ఎక్కువగా జరుగుతున్నాయి.
హిట్ అండ్ రన్ కేసుల తీవ్రత
రాష్ట్రంలో హిట్ అండ్ రన్…ఢీకొట్టి ఆపకుండా వెళ్లే కేసుల సంఖ్య కూడా సమాంతరంగా పెరగడం తీవ్ర కలవరపాటుకు గురిచేస్తోంది. గత 2022 నుండి 2024 వరకు మూడేళ్ల వ్యవధిలో 2,500 మందికి పైగా ప్రజలు హిట్ అండ్ రన్ ప్రమాదాల్లో మరణించారు. కేవలం 2024 సంవత్సరంలోనే దాదాపు 2,400 హిట్ అండ్ రన్ కేసులు నమోదయ్యాయి. ప్రమాదం జరిగిన తర్వాత నిందితులు వాహనాలతో పారిపోతుండటంతో బాధితులకు సకాలంలో వైద్యం అందక ప్రాణాలు పోతున్నాయి. వీటితో పాటు వాహనాల వెనుక భాగం, పక్క భాగాల నుండి ఢీకొట్టడం వల్ల జరిగిన 8,200 ప్రమాదాల్లో సుమారు 2,000 మంది మరణించారు. చివరకు రహదారి పక్కన నిలిపి ఉంచిన వాహనాలను ఢీకొట్టడం వల్ల కూడా 140 మంది వరకు చనిపోవడం గమనార్హం.
నివేదికల మెరుగుదల, ఆర్టీఏ వివరణ
ప్రమాదాల సంఖ్య ఈ స్థాయిలో పెరగడానికి పోలీసుల రికార్డింగ్ వ్యవస్థ మెరుగుపడటం కూడా ఒక కారణమని రవాణా శాఖ, ఆర్టీఏ అధికారులు చెబుతున్నారు. గతంలో చిన్న చిన్న ప్రమాదాలను నమోదు చేసేవారు కాదని, ఇప్పుడు ప్రతి చిన్న ప్రమాదాన్ని కూడా పోలీసులు ఆన్లైన్లో నమోదు చేయడం వల్ల సంఖ్య పెరిగినట్లు కనిపిస్తోందని వివరించారు. రోడ్డు భద్రతను పర్యవేక్షించడానికి ప్రభుత్వం అన్ని జిల్లాల్లో ప్రత్యేక కమిటీలను ఏర్పాటు చేసింది. ఈ కమిటీలు ఇంజనీరింగ్ లోపాలు సవరించడం, చట్టాల అమలు, ప్రజల్లో అవగాహన పెంచడం, అత్యవసర వైద్య సేవలు అందించడం అనే నాలుగు ముఖ్య సూత్రాల ఆధారంగా ప్రమాదాల నివారణకు కృషి చేస్తున్నాయని అధికారులు పేర్కొన్నారు.
నిపుణుల సూచనలు, మౌలిక వసతులు
కేవలం సమాచార నమోదు పెరగడం వల్లే ప్రమాదాలు పెరిగాయనే వాదనను రోడ్డు భద్రతా నిపుణులు పూర్తిగా అంగీకరించడం లేదు. రహదారులపై మౌలిక వసతుల లోపాలు కూడా దీనికి ప్రధాన కారణమని వారు విమర్శిస్తున్నారు. రోడ్లపై స్పష్టమైన మార్కింగ్లు లేకపోవడం, సరైన సైన్ బోర్డులు పెట్టకపోవడం, అస్తవ్యస్తమైన సిగ్నల్ వ్యవస్థల వల్ల వాహనదారులు ఇబ్బంది పడుతున్నారని తెలిపారు. పోలీసులు అన్ని జాతీయ రహదారులపై వాహనాల వేగాన్ని శాస్త్రీయంగా పరిశీలించి వేగ పరిమితులను మార్చాలని నిపుణులు సూచించారు. ముఖ్యంగా శంషాబాద్ ఔటర్ రింగ్ రోడ్డు ఓఆర్ఆర్, హైవేలపై ఒక వాహనాన్ని దాటి మరో వాహనం ముందుకు వెళ్లే క్రమంలోనే… ఓవర్టేకింగ్ ఎక్కువ ప్రమాదాలు జరుగుతున్నాయని, దీనిపై డ్రైవర్లలో అవగాహన పెంచాలని స్పష్టం చేశారు.
