వైయస్సార్ కాంగ్రెస్ పార్టీ అధికారంలోకి వచ్చిన తర్వాత రాబోయే ‘జగన్ 2.0’ పాలనలో పార్టీ కార్యకర్తలకు అత్యధిక ప్రాధాన్యం ఇస్తామని ఆ పార్టీ అధ్యక్షుడు, మాజీ ముఖ్యమంత్రి వైయస్ జగన్ మోహన్ రెడ్డి ప్రకటించారు. రాబోయే రోజుల్లో ప్రభుత్వ సంక్షేమ కార్యక్రమాలను కార్యకర్తల చేతుల మీదుగానే ప్రజలకు అందిస్తామని స్పష్టం చేశారు. గురువారం తాడేపల్లిలోని పార్టీ కేంద్ర కార్యాలయంలో రంపచోడవరం నియోజకవర్గ ప్రజాప్రతినిధులు, ముఖ్య నాయకులు, కార్యకర్తలతో ఆయన ప్రత్యేకంగా సమావేశమయ్యారు. ఈ సందర్భంగా ప్రతి ఒక్కరినీ వ్యక్తిగతంగా పలకరించి, ఆప్యాయంగా పరామర్శిస్తూ భవిష్యత్తు కార్యాచరణపై దిశా నిర్దేశం చేశారు.
ఐదేళ్ల పాలనపై ఇంటా బయటా చర్చ
రాష్ట్రంలో ప్రస్తుత కూటమి ప్రభుత్వం అధికారంలోకి వచ్చి రెండేళ్లు గడిచాయని, ఈ స్వల్ప కాలంలోనే ప్రభుత్వంపై ప్రజల్లో తీవ్ర వ్యతిరేకత మొదలైందని జగన్ పేర్కొన్నారు. గత తమ ఐదేళ్ల సంక్షేమ పాలనకు, ప్రస్తుత చంద్రబాబు రెండేళ్ల పరిపాలనకు ఉన్న తేడాపై ఇప్పుడు ప్రతి ఇంట్లోనూ చర్చ జరుగుతోందని చెప్పారు. నాడు ఎన్నికల మేనిఫెస్టోను భగవద్గీత, ఖురాన్, బైబిల్ లా భావించి 99 శాతం హామీలను నెరవేర్చిన ఘనత తమదేనన్నారు. నాడు సచివాలయ వ్యవస్థ, వాలంటీర్ల ద్వారా ఇంటి వద్దకే పథకాలు అందించామని, విద్య, వైద్యం, వ్యవసాయ రంగాల్లో విప్లవాత్మక మార్పులు తెచ్చామని గుర్తు చేశారు. జగన్ను దూరం చేసుకుని పెద్ద తప్పు చేశామని ఈరోజు ప్రజలు భావిస్తున్నారని వెల్లడించారు.
గిరిజన ప్రాంతాల ప్రగతికి ప్రత్యేక కృషి
తమ ప్రభుత్వ హయాంలో గిరిజన ప్రాంతాల అభివృద్ధికి మునుపెన్నడూ లేని విధంగా నిధులు ఖర్చు చేశామని జగన్ వివరించారు. రాష్ట్రవ్యాప్తంగా గిరిజనులకు 3.22 లక్షల ఎకరాల ఆర్ఓఎఫ్ఆర్ భూపట్టాలు పంపిణీ చేయగా, ఒక్క రంపచోడవరంలోనే 20 వేల మందికి 80 వేల ఎకరాల పట్టాలు ఇచ్చామని చెప్పారు. ఏజెన్సీ ప్రాంతాల్లోని పేదలకు వైద్యం అందించడానికి పాడేరు, పార్వతీపురం, నర్సీపట్నంలో మూడు మెడికల్ కాలేజీలు నిర్మించామన్నారు. కురుపాంలో గిరిజన ఇంజనీరింగ్ కాలేజీ, సాలూరులో ట్రైబల్ యూనివర్సిటీ ఏర్పాటు చేశామని పేర్కొన్నారు. సీతంపేట, రంపచోడవరం లాంటి ఐటీడీఏ కేంద్రాల్లో మల్టీ స్పెషాలిటీ ఆసుపత్రుల పనులు వేగంగా చేపట్టింది తమ ప్రభుత్వమేనని గర్వంగా ప్రకటించారు.
కూటమి ప్రభుత్వ వైఫల్యాలపై పోరాటం
ఎన్నికల ముందు చంద్రబాబు నాయుడు సూపర్ సిక్స్ హామీలతో ప్రజలను, నిరుద్యోగులను, మహిళలను దారుణంగా మోసం చేశారని జగన్ ధ్వజమెత్తారు. ఆడబిడ్డ నిధి, నిరుద్యోగ భృతి, ఉచిత గ్యాస్ సిలిండర్ల వంటి హామీలను అమలు చేయకుండా వేల కోట్ల రూపాయల బాకీ పడ్డారని విమర్శించారు. ప్రభుత్వం చేస్తున్న అన్యాయాలను ప్రశ్నిస్తే దొంగ కేసులు పెడుతూ, రెడ్ బుక్ రాజ్యాంగంతో వేధిస్తున్నారని మండిపడ్డారు. పోలవరం ముంపు బాధితులకు పరిహారం ఇవ్వడంలో కూడా తీవ్ర వివక్ష చూపిస్తున్నారని ఆరోపించారు. పార్టీ శ్రేణులంతా ప్రజల పక్షాన నిలబడి సమస్యలపై పోరాడాలని పిలుపునిచ్చారు. త్వరలోనే తాను పాదయాత్ర ప్రారంభిస్తానని, కార్యకర్తలందరినీ తాను స్వయంగా చూసుకుంటానని నమ్మకం ప్రకటించారు.
