ముఖ్యమంత్రి రేవంత్ రెడ్డి ఎల్ బీ నగర్ నియోజకవర్గంలో నిర్వహించిన బహిరంగ సభలో బీఆర్ఎస్ నాయకులపై, ముఖ్యంగా హరీశ్ రావు విమర్శలపై తీవ్ర స్థాయిలో విరుచుకుపడ్డారు. ఈ సందర్భంగా ఆయన మాట్లాడుతూ ఎల్ బీ నగర్ నియోజకవర్గం అంటే తనకు ఎంతో ప్రత్యేకమైన అభిమానం ఉందని చాటుకున్నారు. రాజకీయం అంటేనే ఎత్తుపల్లాలు ఉంటాయని గుర్తు చేశారు. గత 2018 శాసనసభ ఎన్నికలలో రాజకీయ కుట్రల వల్ల తాను కొడంగల్లో ఓడిపోయిన సమయంలో చాలా మంది విపక్ష నేతలు తన రాజకీయ భవిష్యత్ ముగిసిపోయిందని అవహేళన చేస్తూ నవ్వుకున్నారని రేవంత్ రెడ్డి ఆవేదన వ్యక్తం చేశారు. ఆ క్లిష్ట సమయంలో కాంగ్రెస్ అగ్రనేతలు సోనియా గాంధీ, రాహుల్ గాంధీ తనకు అండగా నిలబడి మల్కాజ్గిరి పార్లమెంట్ స్థానం నుండి పోటీ చేసే అవకాశం కల్పించారని గుర్తు చేసుకున్నారు. అప్పట్లో ఈ ప్రాంత కాంగ్రెస్ కార్యకర్తలు, ప్రజలు కష్టపడి గెలిపిస్తే కొందరు నాయకులు మంత్రి పదవుల కోసం, కార్పొరేషన్ చైర్మన్ పదవుల కోసం ఆశపడి ఓటర్లను మోసం చేసి వెళ్లిపోయారని మండిపడ్డారు. ఎంపీగా పోటీ చేసిన సమయంలో ఎల్ బీ నగర్ ప్రజలు తనకు 30 వేల ఓట్ల భారీ మెజార్టీ ఇచ్చి పార్లమెంట్లో ప్రశ్నించే గొంతుకగా నిలబెట్టారని కొనియాడారు. లోక్సభలో పార్టీ తరపున, ప్రజల సమస్యల తరపున గట్టిగా నిలబడి పోరాడటాన్ని గుర్తించి అధిష్ఠానం పీసీసీ అధ్యక్షుడిగా అవకాశం ఇచ్చిందన్నారు. పీసీసీ చీఫ్గా మూడేళ్ల పాటు అలుపెరగని పోరాటం చేసి, లక్షలాది మంది ప్రజల ఆశీర్వాదంతో రాష్ట్రంలో ప్రజా పాలనను స్థాపించుకున్నామని చెప్పారు.
ఫ్యూచర్ సిటీ నిర్మాణంపై ధీమా
తాము రాబోయే తరాల ప్రయోజనాల కోసం 30 వేల ఎకరా భారీ విస్తీర్ణంలో అత్యంత ఆధునిక సాంకేతికతతో ‘భారత్ ఫ్యూచర్స్ సిటీ’ని నిర్మిస్తుంటే బీఆర్ఎస్ నాయకులు వద్దు అంటున్నారని సీఎం రేవంత్ రెడ్డి దుయ్యబట్టారు. అక్కడ కేవలం పాత పద్ధతిలోనే ఫార్మా కంపెనీలే ఉండాలని, ఆధునిక ఫ్యూచర్ సిటీ వద్దంటూ హరీశ్ రావు వంటి నేతలు విమర్శలు చేయడం సిగ్గుచేటన్నారు. తెలంగాణలో బీఆర్ఎస్ పార్టీ భవిష్యత్తును రాష్ట్ర ప్రజలు ఎప్పుడో రద్దు చేశారని ఎద్దేవా చేశారు. రాజకీయంగా అసలు ఫ్యూచరే లేని వాళ్లంతా ఈరోజు ఫ్యూచర్ సిటీ గురించి మాట్లాడటం హాస్యాస్పదంగా ఉందన్నారు. హరీశ్ రావును ఉద్దేశించి మాట్లాడుతూ ‘ముందు ముందు సిద్ధిపేటలో ఆయన మళ్లీ గెలిస్తే కదా మాట్లాడటానికి’ అంటూ వ్యంగ్యాస్త్రాలు సంధించారు. కాలుష్యాన్ని పెంచే ఫార్మా కంపెనీలను మళ్లీ ఇక్కడే పెట్టుకుందామా అని ప్రజలను ప్రశ్నించారు. గతంలో సిరిస్ కంపెనీ కాలుష్యాన్ని వదిలించుకోవడానికి ఈ ప్రాంత ప్రజలు ఎంతో కష్టపడ్డారని గుర్తు చేశారు. అభివృద్ధిని అడ్డుకుంటూ ఫ్యూచర్ సిటీ ప్రాజెక్టు వద్దంటున్న వారికి ప్రజలే తగిన బుద్ధి చెప్పాలన్నారు. తాము నిర్మించబోయే భారత్ ఫ్యూచర్ సిటీలో పర్యావరణ పరిరక్షణకు అత్యధిక ప్రాధాన్యత ఇస్తున్నామని, అందుకోసం 15 వేల ఎకరాలలో అడవులను (ఫారెస్ట్) అభివృద్ధి చేస్తున్నామని వెల్లడించారు. ఈ ప్రాజెక్టు పరిధిలో 60 శాతం కేవలం పచ్చదనం ఉండేలా ప్రణాళికలు రూపొందించామని చెప్పారు. ఈ మహా ప్రాజెక్టును ఎలాగైనా అడ్డుకోవాలనే కుట్రతో కొందరు హైకోర్టులో, గ్రీన్ ట్రిబ్యునల్ (ఎన్జీటీ)లో తప్పుడు కేసులు వేస్తున్నారని మండిపడ్డారు. మూసీ రివర్ డెవలప్మెంట్ కార్పొరేషన్ కోసం గతంలో అమ్ముడుపోయిన వారు కూడా ఈరోజు నీతులు మాట్లాడుతున్నారని ధ్వజమెత్తారు. మూసీ నదిలో ఉన్న కాలుష్యం కంటే కల్వకుంట్ల కుటుంబ సభ్యుల కడుపుల్లోనే ఎక్కువ కాలుష్యం, ఈర్ష్య నిండి ఉన్నాయని ఘాటుగా విమర్శించారు. మూసీ కాలుష్యం వల్ల నల్గొండ జిల్లా ప్రజలు దశాబ్దాలుగా అనేక కష్టాలు పడుతున్నారని, అక్కడ పుట్టబోయే బిడ్డల కాళ్లు వంకర్లు పోతుండటంతో ఆవేదనతో ప్రజలు వలసలు పోతున్నారని గుర్తు చేశారు. నల్గొండ జిల్లా ప్రజలు ఎల్లకాలం ఆ విషపు నీటిలోనే బతకాలా? మురికిలోనే మురిగిపోవాలా? అని విపక్షాలను ప్రశ్నించారు. ఎవరు ఎన్ని అడ్డంకులు సృష్టించినా మూసీ ప్రక్షాళన చేసి తీరుతామని సీఎం రేవంత్ రెడ్డి స్పష్టం చేశారు. గండిపేట నుండి గౌరెల్లి వరకు 55 కిలోమీటర్ల మేర అంతర్జాతీయ ప్రమాణాలతో మూసీ నదిని సరికొత్తగా అభివృద్ధి చేస్తామని ప్రతిజ్ఞ చేశారు. ప్రభుత్వ చెరువులు, నాలాలు ఆక్రమిస్తే ఎంతటి వారికైనా తోళ్లు తీస్తామని గట్టిగా హెచ్చరించారు. గుర్రంగూడ ఎకో పార్క్ అభివృద్ధికి ప్రభుత్వం నుండి ఎన్ని నిధులైనా మంజూరు చేస్తామని, ఈ ప్రాంతాన్ని పర్యాటక కేంద్రంగా తీర్చిదిద్దే పూర్తి బాధ్యత తనదేనని హామీ ఇచ్చారు. రాజకీయ ప్రత్యర్థులు ఎంతగా ఏడ్చినా, కుట్రలు చేసినా తెలంగాణ ప్రతిష్టను పెంచేలా ‘భారత్ ఫ్యూచర్ సిటీ’ని నిర్మించి తీరుతానని సీఎం ధీమా వ్యక్తం చేశారు. రాబోయే రోజుల్లో ప్రపంచ ప్రసిద్ధ అంతర్జాతీయ కంపెనీలను ఫ్యూచర్ సిటీకి తీసుకువస్తానని, భవిష్యత్తు తరాలు గర్వంగా చర్చించుకునేలా ఆ నగర నిర్మాణం ఉంటుందని రేవంత్ రెడ్డి స్పష్టం చేశారు.
మూసీ ప్రక్షాళన, బీఆర్ఎస్ కుట్రలు
దేశ రాజధాని ఢిల్లీ నగరం నేడు కాలుష్య కోరల్లో చిక్కుకుని గాలి, నీరు పూర్తిగా విషపూరితంగా మారాయని సీఎం రేవంత్ రెడ్డి ఆందోళన వ్యక్తం చేశారు. అక్కడి పాలకులు సకాలంలో కాలుష్యాన్ని నియంత్రించకపోవడం వల్లే ఢిల్లీకి ఈ దుస్థితి దాపురించిందని విమర్శించారు. అలాగే ముంబయిలో కొద్దిపాటి వర్షం వస్తే 24 గంటల పాటు ప్రజలు బయటకు రాలేని పరిస్థితి ఉందని, బెంగళూరులో తీవ్ర ట్రాఫిక్ జామ్ల సమస్య ఉందని పేర్కొన్నారు. వీటన్నింటినీ దృష్టిలో ఉంచుకుని హైదరాబాద్ నగరాన్ని అంతర్జాతీయ ప్రమాణాలతో కూడిన విశ్వ నగరంగా మార్చడానికి తాము శ్రమిస్తున్నామని చెప్పారు. అయితే తాము మూసీ నది ప్రక్షాళన చేపడుతుంటే బీఆర్ఎస్ నాయకులు రాజకీయ స్వార్థంతో అడ్డుపడుతున్నారని ధ్వజమెత్తారు. గతంలో మూసీ నది పరివాహక ప్రాంతంలో నివసించిన నిరుపేదలను నందనవనం కాలనీ కట్టించి అక్కడికి తరలించారని, నేడు ఆ కాలనీ ఎంతో కీలకంగా మారిందని గుర్తు చేశారు. నాడు హైదరాబాద్ నగరంలో గత పాలకులు హైటెక్ సిటీ, ఔటర్ రింగ్ రోడ్డు, అంతర్జాతీయ విమానాశ్రయం, ఐటీ సంస్థలను నిర్మించకపోతే నగరానికి ఈరోజు అంతర్జాతీయ స్థాయిలో గుర్తింపు వచ్చేది కాదన్నారు. శంషాబాద్ అంతర్జాతీయ విమానాశ్రయ భూసేకరణ ప్రక్రియలో దివంగత నేత దేవేందర్ గౌడ్ చేసిన కృషి మరువలేనిదని కొనియాడారు. గతంలో సిరిస్ కంపెనీ రసాయన వ్యర్థాల దెబ్బకు ఎల్ బీ నగర్ ప్రాంతంలో భూగర్భ జలాలు పూర్తిగా కలుషితమై భూముల విలువలు పడిపోయాయని గుర్తు చేశారు. మూసీ నది కాలుష్యం వల్ల ఈ ప్రాంత ప్రజలు అనేక ఆరోగ్య, ఆర్థిక ఇబ్బందులు పడ్డారని ఆవేదన వ్యక్తం చేశారు. అందుకే తమ ప్రభుత్వం మూసీ ప్రక్షాళన చేయడానికి, చెరువులను కబ్జాల నుండి విడిపించడానికి గట్టిగా ప్రయత్నిస్తోందని వివరించారు.
స్థానిక సమస్యలు, హైడ్రా ప్రాధాన్యత
ఎల్ బీ నగర్ నియోజకవర్గ పరిధిలో నల్గొండ, రంగారెడ్డి, మహబూబ్ నగర్ జిల్లాలకు చెందిన వలస ప్రజలు అధికంగా నివసిస్తుంటారని సీఎం తెలిపారు. గతంలో ఇక్కడ భారీ వర్షాలు వచ్చి కాలనీలు మునిగిపోయినప్పుడు తాను ఎంపీగా స్వయంగా పర్యటించి బాధితులను పరామర్శించానని గుర్తు చేశారు. తన సొంత ఊరైన కొండారెడ్డిపల్లికి వెళ్తే ఎలాంటి ఆత్మీయ అనుభూతి కలుగుతుందో, ఎల్బీ నగర్ ప్రాంతానికి వచ్చినప్పుడు కూడా తనకు అలాంటి అనుభూతే కలుగుతుందన్నారు. ఇక్కడి ప్రజలు తనను సొంత మనిషిగా భావించి ‘మా వాడు రేవంత్ రెడ్డి ముఖ్యమంత్రి అయ్యాడు’ అని ఎంతో అభిమానంతో పలకరిస్తారని సంతోషం వ్యక్తం చేశారు. గత పాలకుల నిర్లక్ష్యం వల్ల రంగారెడ్డి జిల్లాలో కేవలం ఒక వైపు మాత్రమే అభివృద్ధి కేంద్రీకృతమైందని విమర్శించారు. ఎల్ బీ నగర్, బీఎన్ రెడ్డి నగర్, వనస్థలిపురం, గుర్రంగూడ వంటి ఉపాంత ప్రాంతాలు తీవ్ర నిర్లక్ష్యానికి గురయ్యాయని దుయ్యబట్టారు. ఈ ప్రాంతాల ప్రగతి కోసం నిధులు కేటాయించాలని గత పాలకులు ఎన్నడూ ఆలోచించలేదని ఆరోపించారు. తమ ప్రభుత్వం ఈ ప్రాంత అభివృద్ధికి కట్టుబడి ఉందంటూ రూ. 2400 కోట్లతో 240 ఎకరాల విస్తీర్ణంలో అంతర్జాతీయ స్థాయి ఫ్రూట్ మార్కెట్ను నిర్మిస్తున్నట్లు ప్రకటించారు. గతంలో గుర్రంగూడ ఎకో పార్క్ స్థలాలను కొందరు ప్రైవేట్ భూములుగా చూపిస్తూ లేఅవుట్లు చేసి అమ్ముకోవాలని కుట్రలు పన్నారని ఆగ్రహం వ్యక్తం చేశారు. తాము సుప్రీంకోర్టులో ఉద్దండులైన న్యాయవాదులను పెట్టి గట్టిగా పోరాడి ఆ కేసు గెలిచామని వెల్లడించారు. గుర్రంగూడలోని 424 ఎకరాల స్థలాన్ని నేషనల్ పార్క్గా మార్చి ఇక్కడి ప్రజలకే అంకితం చేశామని స్పష్టం చేశారు. చెరువులు, నాలాలు ఆక్రమణకు గురై కాలనీలు ముంపునకు గురికావద్దనే ఉద్దేశంతోనే కబ్జాదారుల కోరలు పీకడానికి ‘హైడ్రా’ (HYDRAA) సంస్థను తీసుకువచ్చినట్లు స్పష్టం చేశారు. కొంతమంది స్వార్థపరులు హైడ్రాను ఒక బూతంగా చూపిస్తూ పేద ప్రజల్లో భయాందోళనలు సృష్టించే కుట్ర చేస్తున్నారని విమర్శించారు. సొంత స్థలాలలో నిబంధనల ప్రకారం ఇళ్లు కట్టుకునే సామాన్యుల జోలికి హైడ్రా ఎట్టిపరిస్థితుల్లోనూ వెళ్లదని సీఎం హామీ ఇచ్చారు. ప్రభుత్వ పార్కులు, చెరువులు, నాలాలను కబ్జా చేసి అక్రమ కట్టడాలు నిర్మించిన వారి వీపులు చదవడం ఖాయమని హెచ్చరించారు. వనస్థలిపురంలో గుడి స్థలాన్ని కబ్జా చేస్తే హైడ్రా రంగంలోకి దిగి ఆ భూమిని విడిపించిందని ఉదహరించారు. కొద్దిమంది కబ్జాదారుల స్వార్థం వల్ల వేలాది మంది సామాన్య ప్రజలు ముంపునకు గురవుతూ తీవ్ర కష్టనష్టాల పాలువుతున్నారని ఆవేదన వ్యక్తం చేశారు. కబ్జాదారులు ఎంతటివారైనా, ఎంతటి రాజకీయ నేపథ్యం ఉన్నా ప్రభుత్వం వదిలిపెట్టే ప్రసక్తి లేదన్నారు.
