రాష్ట్ర బీసీ, ఈడబ్ల్యూఎస్ సంక్షేమ, చేనేత, జౌళి శాఖ మంత్రి, కడప జిల్లా ఇంఛార్జి మంత్రి సవిత ఒక రోజు పర్యటన కోసం కడప జిల్లాకు చేరుకున్నారు. మంగళవారం సాయంత్రం కడప విమానాశ్రయానికి చేరుకున్న ఆమె అక్కడి నుంచి నేరుగా జమ్మలమడుగుకు వెళ్లారు. జమ్మలమడుగులోనే రాత్రి బస చేసిన మంత్రి, బుధవారం పలు అధికారిక కార్యక్రమాల్లో పాల్గొననున్నారు. జమ్మలమడుగు నియోజకవర్గం మైలవరం మండలం చిన్నకొమెర్లలో దాల్మియా సిమెంట్ లైన్-2 ప్లాంట్ విస్తరణ పనుల ప్రారంభోత్సవ కార్యక్రమంలో మంత్రి సవిత పాల్గొంటారు. రూ.3,478 కోట్ల వ్యయంతో చేపడుతున్న ఈ భారీ విస్తరణ ప్రాజెక్టుకు రాష్ట్ర విద్య, ఐటీ శాఖ మంత్రి నారా లోకేశ్ శంకుస్థాపన చేయనున్నారు. ఈ ప్రాజెక్టు ద్వారా జిల్లాలో పారిశ్రామికాభివృద్ధికి మరింత ఊతం లభిస్తుందని అధికారులు భావిస్తున్నారు. దాల్మియా సిమెంట్ ప్లాంట్ విస్తరణ పనుల శంకుస్థాపన అనంతరం మంత్రి సవిత ప్రొద్దుటూరుకు చేరుకుని అక్కడ జరిగే పలు అభివృద్ధి కార్యక్రమాల్లో పాల్గొంటారు. స్థానిక ప్రజాప్రతినిధులు, అధికారులు పాల్గొనే సమావేశాల్లో కూడా ఆమె హాజరుకానున్నారు. రోజంతా అధికారిక కార్యక్రమాలు పూర్తి చేసిన అనంతరం సాయంత్రం 5.30 గంటలకు కడప విమానాశ్రయానికి చేరుకుని అక్కడి నుంచి విజయవాడకు బయలుదేరుతారని మంత్రి కార్యాలయం విడుదల చేసిన ప్రకటనలో వెల్లడించింది.
