లంచం ఆరోపణలతో ముగ్గురు కానిస్టేబుళ్లపై వేటు
చట్టాన్ని అమలు చేయాల్సిన చేతులే చట్టాన్ని వ్యాపారంగా మార్చుకుంటే ప్రజల్లో నమ్మకం ఎలా నిలుస్తుంది? కడప జిల్లా ప్రొద్దుటూరులో జరిగిన ఈ ఘటన అదే ప్రశ్నను ముందుకు తెచ్చింది. వ్యభిచారం నిర్వహిస్తున్న వారిపై చర్యలు తీసుకోవాల్సిన ముగ్గురు పోలీసు సిబ్బంది… కేసు పెడతామని బెదిరించి రూ.50 వేల లంచం తీసుకున్నారన్న ఆరోపణలు పోలీసు శాఖను కుదిపేశాయి. ఆరోపణలు ఉన్నతాధికారుల దృష్టికి వెళ్లడంతో విచారణ ప్రారంభమై, ప్రాథమిక ఆధారాలు లభించడంతో ముగ్గురు కానిస్టేబుళ్లపై శాఖాపరమైన చర్యలు తీసుకున్నారు. ఈ పరిణామం చట్ట పరిరక్షకుల బాధ్యత, పోలీసు వ్యవస్థలో పారదర్శకతపై మరోసారి చర్చకు దారి తీసింది.
లంచం కోసం చట్టం పేరు?
ప్రొద్దుటూరు పట్టణంలోని రామేశ్వరం బైపాస్ వద్ద వ్యభిచారం జరుగుతోందన్న సమాచారంతో వన్టౌన్ హెడ్ కానిస్టేబుల్ బాలదస్తగిరి రెడ్డి, కానిస్టేబుళ్లు శ్రీనివాసులు, సాయి కిషోర్ అక్కడికి వెళ్లారు. అక్కడ ఉన్న మహిళలను కేసు నమోదు చేసి జైలుకు పంపిస్తామని బెదిరించి, రూ.50 వేల లంచం తీసుకున్నట్లు ఆరోపణలు వచ్చాయి. ఈ ఆరోపణలు వెలుగులోకి రావడంతో పోలీసు వ్యవస్థలో కలకలం రేగింది. ఈ వ్యవహారం ఉన్నతాధికారుల దృష్టికి చేరడంతో ఏఎస్పీ విభుకృష్ణ వెంటనే విచారణ చేపట్టారు. ప్రాథమిక విచారణలో ఆరోపణలకు ఆధారాలు లభించినట్లు గుర్తించడంతో ముగ్గురు పోలీసు సిబ్బందిని కడప పోలీస్ హెడ్క్వార్టర్స్కు రిపోర్ట్ చేయాలని ఆదేశాలు జారీ చేశారు. పూర్తి విచారణ అనంతరం మరింత కఠినమైన శాఖాపరమైన చర్యలు తీసుకునే అవకాశం ఉందని సమాచారం.
సోషల్ యాంగిల్… బాధితులు ఎవరూ?
ఈ ఘటనలో మరోసారి సమాజంలోని బలహీన వర్గాల పరిస్థితి చర్చకు వచ్చింది. చట్టపరమైన చర్యల పేరుతో భయపెట్టి డబ్బులు వసూలు చేయడం నిజమైతే అది కేవలం అవినీతి మాత్రమే కాదు, అధికార దుర్వినియోగానికి కూడా ఉదాహరణగా నిలుస్తుంది. రక్షణ కోసం ఆశ్రయించాల్సిన వ్యవస్థే భయానికి కారణమైతే ప్రజల్లో పోలీసులపై విశ్వాసం దెబ్బతింటుంది.ప్రతి పోలీసు అధికారి తప్పు చేయడు. కానీ కొందరి చర్యలు మొత్తం వ్యవస్థ ప్రతిష్ఠను దెబ్బతీస్తాయి. అందుకే ఇలాంటి ఘటనల్లో వేగంగా, పారదర్శకంగా విచారణ జరిపి బాధ్యులపై కఠిన చర్యలు తీసుకోవడం పోలీసు శాఖ విశ్వసనీయతకు అత్యంత అవసరం. ఈ ఘటన కూడా అదే సందేశాన్ని మరోసారి గుర్తు చేస్తోంది.
మహేష్ పోసా
ప్రొద్దుటూరు
