నీట్ వివాదం దెబ్బ ధర్మేంద్ర ప్రధాన్ రాజీనామా!

దేశ రాజకీయాలను కుదిపేసిన నీట్-యూజీ 2026 వివాదం చివరకు కేంద్ర మంత్రివర్గాన్ని తాకింది. లక్షలాది మంది విద్యార్థుల భవిష్యత్తుపై అనుమానాలు రేకెత్తించిన ప్రశ్నపత్రం లీక్, పరీక్షల నిర్వహణలో జరిగిన అక్రమాలపై దేశవ్యాప్తంగా చెలరేగిన ఆగ్రహం ఇప్పుడు కీలక మలుపు తిరిగింది. జంతర్ మంతర్ వేదికగా విద్యార్థుల ఉద్యమం రోజురోజుకూ ఉధృతం కావడం, కేంద్ర విద్యాశాఖపై తీవ్ర ఒత్తిడి పెరగడం మధ్య కేంద్ర విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేస్తున్నట్లు ప్రకటించారు. దేశ ఐక్యత దెబ్బతినకూడదనే ఉద్దేశంతో, విద్యార్థుల భవిష్యత్తు న్యాయపరమైన చిక్కుల్లో పడకూడదనే బాధ్యతతో ఈ నిర్ణయం తీసుకున్నానని ఆయన వెల్లడించారు. ఒకవైపు ప్రభుత్వం ఇప్పటికే సీబీఐ దర్యాప్తు, పరీక్ష రద్దు, రీ-ఎగ్జామ్, కంప్యూటర్ ఆధారిత పరీక్షల వంటి చర్యలు చేపట్టినట్లు చెబుతుండగా, మరోవైపు ఉద్యమకారులు దీనిని తమ పోరాట విజయంగా ప్రకటించారు. ఈ రాజీనామా కేవలం ఒక మంత్రి వైదొలగడం మాత్రమే కాదు… దేశ విద్యా వ్యవస్థపై విశ్వాసాన్ని తిరిగి నిలబెట్టే పోరాటంలో కొత్త అధ్యాయానికి నాంది పలికిన కీలక పరిణామంగా మారింది.



కేంద్ర విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేశారు. ఎక్స్‌లో పోస్ట్ చేసిన లేఖ ద్వారా ఈ విషయాన్ని వెల్లడించారు. తన రాజీనామా లేఖను ప్రధానమంత్రి నరేంద్ర మోదీకి సమర్పించినట్లు తెలిపారు. దేశ ఐక్యత దెబ్బతినకూడదనే ఉద్దేశంతోనే ఈ నిర్ణయం తీసుకున్నానని స్పష్టం చేశారు.

నీట్ వివాదమే ప్రధాన కారణం

నీట్-యూజీ 2026 ప్రశ్నపత్రం లీక్, సీబీఎస్ఈ ఆన్‌స్క్రీన్ మూల్యాంకనంలో జరిగిన అక్రమాలపై దేశవ్యాప్తంగా తీవ్ర ఆందోళనలు కొనసాగుతున్నాయి. జంతర్ మంతర్ వద్ద కాక్రోచ్ జనతా పార్టీ ఆధ్వర్యంలో నిరసనలు ఉద్ధృతమయ్యాయి. పరీక్షల నిర్వహణలో సమూల సంస్కరణలు తీసుకురావాలని, విద్యార్థులకు న్యాయం చేయాలని ఆందోళనకారులు డిమాండ్ చేశారు. ఈ పరిణామాల మధ్య ధర్మేంద్ర ప్రధాన్ రాజీనామా రాజకీయంగా ప్రాధాన్యం సంతరించుకుంది.

లేఖలో ప్రధాన్ ఏమన్నారు?

గత నాలుగు దశాబ్దాలుగా విద్యార్థులు, ఉపాధ్యాయులు, విద్యా సంస్కరణల కోసం పనిచేస్తున్నానని ధర్మేంద్ర ప్రధాన్ పేర్కొన్నారు. దేశ భవిష్యత్తు విద్యార్థుల చేతుల్లోనే ఉందని, వారి భవిష్యత్తు కోర్టు కేసుల్లో చిక్కుకోకూడదనే ఉద్దేశంతోనే పదవి నుంచి తప్పుకుంటున్నానని వివరించారు. దేశ వ్యతిరేక శక్తులు పరిస్థితిని దుర్వినియోగం చేసుకునే అవకాశాన్ని నివారించాలనే ఆలోచన కూడా తన నిర్ణయానికి కారణమని చెప్పారు.

ప్రభుత్వ చర్యల ప్రస్తావన

మే 3న జరిగిన నీట్-యూజీ పరీక్షలో అక్రమాలు బయటపడిన వెంటనే కేంద్ర ప్రభుత్వం స్పందించిందని ప్రధాన్ గుర్తుచేశారు. దర్యాప్తును సీబీఐకి అప్పగించడం, పరీక్షను రద్దు చేయడం, జూన్ 21న రీ-ఎగ్జామ్ నిర్వహించడం వంటి చర్యలు తీసుకున్నామని చెప్పారు. వచ్చే ఏడాది నుంచి నీట్ పరీక్షను పూర్తిగా కంప్యూటర్ ఆధారిత విధానంలో నిర్వహించాలని ప్రభుత్వం నిర్ణయించిన విషయాన్ని కూడా వెల్లడించారు. తనపై విశ్వాసం ఉంచిన ప్రధానమంత్రి నరేంద్ర మోదీకి ధర్మేంద్ర ప్రధాన్ ప్రత్యేక కృతజ్ఞతలు తెలిపారు. మంత్రివర్గ సహచరులు, విద్యాశాఖ అధికారులు, సిబ్బందికి ధన్యవాదాలు చెప్పారు. పదవి లేకపోయినా దేశసేవే తన జీవిత లక్ష్యమని, ఒడిశా ప్రజలు, దేశ యువత ఆకాంక్షల సాధన కోసం ముందుకూ కృషి చేస్తానని పేర్కొన్నారు.

జంతర్ మంతర్‌లో సంబరాలు

ధర్మేంద్ర ప్రధాన్ రాజీనామా వార్త వెలువడగానే జంతర్ మంతర్ నిరసన శిబిరంలో సంబరాలు మొదలయ్యాయి. కాక్‌రోచ్ జనతా పార్టీ వ్యవస్థాపకుడు అభిజీత్ దీప్కే నిరసనకారులను ఉద్దేశించి “మనం సాధించాం… ధర్మేంద్ర ప్రధాన్ రాజీనామా చేశారు” అంటూ ప్రకటించారు. దీంతో అక్కడున్న విద్యార్థులు, ఉద్యమకారులు హర్షధ్వానాలతో తమ ఆనందాన్ని వ్యక్తం చేశారు. ప్రధాని నరేంద్ర మోదీ మాత్రం ఈ రాజీనామాపై ఇప్పటివరకు ఎలాంటి అధికారిక స్పందన చేయలేదు.