రాహుల్ ఆస్తుల కేసుపై దర్యాప్తు విచారణ సంస్థలపై సుప్రీం ఆగ్రహం

సీరియస్ అయితే ఇంతకాలం ఎందుకు?

కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీపై నమోదైన అక్రమాస్తుల ఆరోపణల కేసులో సుప్రీంకోర్టు కీలక వ్యాఖ్యలు చేసింది. ఈ వ్యవహారం నిజంగా అంత తీవ్రమైనదైతే.. దర్యాప్తు సంస్థలు ఇంతకాలం ఏం చేస్తున్నాయని ధర్మాసనం ప్రశ్నించింది. ప్రధాన న్యాయమూర్తి జస్టిస్‌ సూర్యకాంత్, జస్టిస్‌ జాయ్‌మాల్య బాగ్చీ, జస్టిస్‌ వి.మోహనా ధర్మాసనం సోమవారం రాహుల్ గాంధీ దాఖలు చేసిన పిటిషన్‌పై విచారణ జరిపింది. ఈ కేసులో అలహాబాద్ హైకోర్టు తదుపరి విచారణను ముందుకు తీసుకెళ్లకుండా సుప్రీంకోర్టు సూచించింది. అలాగే సీబీఐ, ఈడీలు తమ దర్యాప్తు నివేదికలను ఎలాంటి అధికార సంస్థకు, అలహాబాద్ హైకోర్టుకు కూడా సమర్పించవద్దని ఆదేశించింది. ఆగస్టు 20న అలహాబాద్ హైకోర్టులో జరగాల్సిన విచారణను కూడా తదుపరి ఉత్తర్వుల వరకు వాయిదా వేయాలని పేర్కొంది.

సీబీఐ, ఈడీపై ధర్మాసనం ఆగ్రహం

రాహుల్ గాంధీ తరఫున సీనియర్ న్యాయవాది కపిల్ సిబల్ వాదిస్తూ.. ఈ కేసు చట్టపరమైన ఆధారం లేని “విచ్ హంట్” ప్రక్రియగా అభివర్ణించారు. ఫిర్యాదుదారు హైకోర్టును ఆశ్రయించే అర్హతపైనా ఆయన ప్రశ్నలు లేవనెత్తారు. సీబీఐ ఇప్పటివరకు ఫిర్యాదును పరిశీలించడం తప్ప మరేమీ చేయలేదని కోర్టుకు తెలిపారు. కేంద్ర దర్యాప్తు సంస్థల తరఫున అదనపు సొలిసిటర్ జనరల్ ఎస్‌.వి. రాజు స్పందిస్తూ.. ప్రస్తుత దశలో తమకు ప్రత్యక్ష పాత్ర లేదన్నారు. ఆరోపణల్లో గుర్తించదగిన నేరం ఉన్నట్లు తేలితే మాత్రం అది తీవ్రమైన అంశమని పేర్కొన్నారు. ఈ సమయంలో ధర్మాసనం “అంత తీవ్రమైన కేసు అయితే మీ సంస్థ ఇంతకాలం ఎందుకు మౌనంగా ఉంది?” అని ప్రశ్నించింది. స్వయంగా దర్యాప్తు ప్రారంభించారా? కోర్టు ఆదేశం కోసం ఎదురు చూస్తున్నారా? అంటూ న్యాయమూర్తి జాయ్‌మాల్య బాగ్చీ ప్రశ్నించారు.

హైకోర్టు ఆదేశాలపై సుప్రీం బ్రేక్

రాహుల్ గాంధీపై అక్రమాస్తుల ఆరోపణలకు సంబంధించి దర్యాప్తు చేయాలని గతంలో అలహాబాద్ హైకోర్టు ఆదేశాలు ఇచ్చింది. ఈ వ్యవహారంలో సీబీఐ, ఈడీలు ఆరోపణలను పరిశీలించాలని హైకోర్టు సూచించింది. జూలై 20న లక్నో బెంచ్ సీబీఐ దర్యాప్తు పురోగతిపై అసంతృప్తి వ్యక్తం చేసి.. సంస్థలోని సీనియర్ అధికారి స్వయంగా కొత్త అఫిడవిట్ దాఖలు చేయాలని ఆదేశించింది. ఈ నేపథ్యంలో రాహుల్ గాంధీ హైకోర్టు ఆదేశాలను సవాలు చేస్తూ సుప్రీంకోర్టును ఆశ్రయించారు. సోమవారం విచారణలో సుప్రీం ధర్మాసనం హైకోర్టు తదుపరి చర్యలకు తాత్కాలికంగా బ్రేక్ వేసింది. అయితే ఆరోపణలు నిజమా? కాదా? అన్న అంశంపై సుప్రీంకోర్టు తుది నిర్ణయం ఇవ్వలేదు. దర్యాప్తు సంస్థలు ఇప్పటివరకు ఎందుకు చర్యలు తీసుకోలేదన్న ప్రశ్న మాత్రం ఈ కేసులో కీలకంగా మారింది.

#RahulGandhi #RahulGandhiAssetsCase #DisproportionateAssets #SupremeCourt #CBI #ED #AllahabadHighCourt #JusticeSuryaKant #KapilSibal #Congress #RahulGandhiNews #LegalNews #CourtHearing #PoliticalNews #IndiaPolitics