భార్యను వదిలేసి ఇంకో పెళ్లా? ఐతే మీ జీతం కట్ అవుతుంది

ఉద్యోగులకు అస్సాం సీఎం ఫిటింగ్.
ప్రభుత్వ ఉద్యోగులకు స్ట్రాంగ్ వార్నింగ్.

భార్యకు విడాకులు ఇవ్వకుండానే మరో వివాహం చేసుకునే ప్రభుత్వ ఉద్యోగులపై అసోం ప్రభుత్వం కఠిన చర్యలకు సిద్ధమవుతోంది. ముఖ్యమంత్రి హిమంత బిస్వ శర్మ వెల్లడించిన వివరాల ప్రకారం.. మొదటి భార్యను చట్టబద్ధంగా విడిచిపెట్టకుండా మరో మహిళను వివాహం చేసుకున్న ఉద్యోగి జీతంలో 20 శాతం కోత విధించే ప్రతిపాదన పరిశీలనలో ఉంది. కోత విధించిన మొత్తాన్ని మొదటి భార్య బ్యాంకు ఖాతాలో నేరుగా జమ చేసే అవకాశం ఉంది. అయితే ఇందుకోసం బాధిత భార్య ప్రభుత్వం వద్ద దరఖాస్తు చేసుకోవాల్సి ఉంటుంది. ఇలాంటి ఘటనల్లో మొదటి భార్యకు న్యాయపరమైన పరిష్కారం వచ్చే వరకు ఆర్థిక ఇబ్బందులు ఎదురుకాకుండా చూడడమే ఈ ప్రతిపాదన ఉద్దేశమని సీఎం తెలిపారు. విడాకులు లేకుండా రెండో పెళ్లి చేస్తే జీతానికే గండి పడేలా కొత్త నిబంధనలు తీసుకురావాలన్న ఆలోచన ఇప్పుడు దేశవ్యాప్తంగా చర్చకు దారితీస్తోంది.

కోర్టు కేసు ఉన్నా కోత

మొదటి భార్యను వదిలేసి మరో వివాహం చేసుకున్న ఉద్యోగులపై కేవలం జీతం కోతతో ఆగకుండా చట్టపరమైన చర్యలు కూడా తీసుకుంటామని అసోం ప్రభుత్వం స్పష్టం చేసింది. ఇలాంటి అనేక ఘటనలు తమ దృష్టికి రావడంతో ఈ నిర్ణయాన్ని పరిశీలిస్తున్నట్లు హిమంత బిస్వ శర్మ చెప్పారు. కోర్టులో కేసు నడుస్తున్న సమయంలో కూడా జీతంలో 20 శాతం కోత కొనసాగించే అవకాశం ఉందన్నారు. దీంతో న్యాయ ప్రక్రియ పూర్తయ్యే వరకు మొదటి భార్యకు కనీస ఆర్థిక భద్రత కల్పించవచ్చని ప్రభుత్వం భావిస్తోంది. అసోంలో ఇప్పటికే బహుభార్యత్వాన్ని నిషేధించే నిబంధనలు అమల్లోకి వచ్చాయి. యూనిఫామ్ సివిల్ కోడ్ పరిధిలో బహుభార్యత్వంపై నిషేధం తీసుకొచ్చిన రాష్ట్రంగా అసోం ముందుకు సాగుతోంది. ప్రభుత్వ ఉద్యోగుల సర్వీస్‌ రూల్స్‌లోనూ రెండో వివాహంపై పరిమితులు ఉన్నాయని ప్రభుత్వం చెబుతోంది.

ప్రైవేట్ ఉద్యోగులపైనా నిఘా?

ప్రభుత్వ ఉద్యోగులతో పాటు ప్రైవేట్ రంగంలో పనిచేస్తున్న మహిళల రక్షణపైనా అసోం ప్రభుత్వం దృష్టి పెట్టింది. భర్త విడిచిపెట్టిన మహిళలకు ప్రైవేట్ రంగంలోనూ ఆర్థిక భద్రత కల్పించేలా ప్రత్యేక చట్టపరమైన చర్యలను పరిశీలిస్తున్నట్లు సీఎం సంకేతాలు ఇచ్చారు. ప్రస్తుతానికి ప్రభుత్వ ఉద్యోగుల విషయంలో చర్యలు తీసుకునే విధానంపై చర్చ జరుగుతోంది. భర్త విడాకులు తీసుకోకుండా మరో వివాహం చేసుకుంటే.. మొదటి భార్య కోర్టుల చుట్టూ తిరుగుతూ ఆర్థికంగా ఇబ్బంది పడకుండా చేయాలన్నదే ప్రతిపాదన వెనుక ఉద్దేశం. రెండో పెళ్లి చేస్తే ఇక కుటుంబ వివాదమే కాదు.. జీతానికీ లెక్క ఉంటుందన్న సంకేతాన్ని అసోం ప్రభుత్వం ఇస్తోంది. ఈ ప్రతిపాదన అమల్లోకి వస్తే దేశంలోని ఇతర రాష్ట్రాల్లోనూ ఇలాంటి నిబంధనలపై చర్చ మొదలయ్యే అవకాశం ఉంది.

#AssamGovernment #HimantaBiswaSarma #GovernmentEmployees #SecondMarriage #SalaryCut #Divorce #FirstWife #AssamUCC #PolygamyBan #ServiceRules #WomenProtection #AssamNews #IndiaNews #GovernmentRules #LegalNews