కొత్త ఇందిర‌మ్మ ఇళ్ల నుంచే.. వ‌చ్చే ఏడాది బోనాలు ఎత్తిస్తాం

16 నియోజకవర్గాల్లో తొలి దశ
ఒక్కో నియోజకవర్గంలో 500
సిటిలో 8 వేల ఇళ్ల నిర్మాణాలు
వివరాలు వెల్లడించిన పొంగులేటి

హైదరాబాద్‌లోని క్యూర్ పరిధిలో ఇందిరమ్మ ఇళ్ల నిర్మాణానికి రాష్ట్ర ప్రభుత్వం శ్రీకారం చుట్టింది. తొలి విడతలో 16 అసెంబ్లీ నియోజకవర్గాల్లో ఒక్కో నియోజకవర్గానికి 500 చొప్పున మొత్తం 8 వేల ఇళ్ల నిర్మాణం చేపడుతున్నట్లు రాష్ట్ర రెవెన్యూ, హౌసింగ్ శాఖ మంత్రి పొంగులేటి శ్రీనివాసరెడ్డి ప్రకటించారు. త్వరలో మరో 8 నియోజకవర్గాలకు కూడా ఈ పథకాన్ని విస్తరిస్తామని తెలిపారు. పేదల సొంతింటి కల నెరవేరే వరకు ఇందిరమ్మ ఇళ్ల కార్యక్రమం నిరంతరంగా కొనసాగుతుందని స్పష్టం చేశారు.

జూలై 21 నుంచి దరఖాస్తులు

ఇందిరమ్మ ఇళ్ల కోసం జూలై 21 నుంచి ఆగస్టు 10 వరకు దరఖాస్తులు స్వీకరిస్తామని మంత్రి వెల్లడించారు. మీ సేవా కేంద్రాలు, వాట్సాప్ నంబర్ 8096958096, అధికారిక వెబ్‌సైట్ ద్వారా దరఖాస్తు చేసుకోవచ్చని తెలిపారు. ఒక కుటుంబం నుంచి ఒకే దరఖాస్తు మాత్రమే స్వీకరిస్తామని చెప్పారు. కుటుంబ వార్షిక ఆదాయం రూ.6 లక్షల లోపు ఉండాలని, క్యూర్ పరిధిలో ఇప్పటికే ఇల్లు లేదా స్థలం ఉండకూడదని అర్హత నిబంధనలను వివరించారు.

ఒక్కో ఇంటికి రూ.11 లక్షల విలువ

ప్రతి ఇంటి నిర్మాణానికి సుమారు రూ.11 లక్షలు వ్యయం అవుతుందని మంత్రి తెలిపారు. ఇందులో ప్రభుత్వం రూ.5 లక్షలు సబ్సిడీగా అందిస్తుందని చెప్పారు. మిగిలిన రూ.6 లక్షలను లబ్ధిదారులు నాలుగు విడతల్లో చెల్లించే అవకాశం కల్పించారు. దరఖాస్తు సమయంలో చెల్లించే రూ.10 వేల మొత్తాన్ని చివరి చెల్లింపులో మినహాయిస్తామని వెల్లడించారు. ఇల్లు మంజూరు కాకపోతే ఆ డిపాజిట్ మొత్తాన్ని తిరిగి చెల్లిస్తామని హామీ ఇచ్చారు.

ఉచిత స్థలం.. మహిళ పేరుతో రిజిస్ట్రేషన్

పేదలకు 525 చదరపు అడుగుల విస్తీర్ణంలో ఒక బెడ్‌రూమ్, హాల్, కిచెన్‌తో కూడిన ఫ్లాట్లు నిర్మిస్తామని తెలిపారు. ఒక్కో ఇంటికి అనుబంధంగా రూ.40 నుంచి రూ.60 లక్షల విలువ చేసే స్థలాన్ని మహిళ పేరుతో ఉచితంగా రిజిస్ట్రేషన్ చేస్తామని వెల్లడించారు. ఆస్తిని పదేళ్ల వరకు విక్రయించేందుకు అనుమతి ఉండదని, అయితే బ్యాంకు రుణం కోసం తనఖా పెట్టుకునే అవకాశం ఉంటుందని చెప్పారు. ఎస్సీ, ఎస్టీ, బీసీ వర్గాలకు రిజర్వేషన్లు కూడా అమలు చేస్తామని స్పష్టం చేశారు.

లాటరీ ద్వారా ఎంపిక

దరఖాస్తులను 360 డిగ్రీల విధానంలో పరిశీలించి అర్హులను ఎంపిక చేస్తామని మంత్రి తెలిపారు. అర్హుల సంఖ్య ఎక్కువైతే అందరి సమక్షంలో బహిరంగ లాటరీ ద్వారా లబ్ధిదారులను ఎంపిక చేస్తామని వెల్లడించారు. రాజకీయాలకు అతీతంగా స్థానిక ప్రజాప్రతినిధులతో చర్చించి స్థలాలను ఎంపిక చేసినట్లు చెప్పారు. పారదర్శకతకు ప్రభుత్వం అత్యంత ప్రాధాన్యం ఇస్తోందని పేర్కొన్నారు.

వచ్చే బోనాలకు కొత్త ఇళ్లే లక్ష్యం

ప్రస్తుతం జరుగుతున్న బోనాల పండుగను పురస్కరించుకుని ఈ గృహ నిర్మాణ కార్యక్రమాన్ని ప్రారంభించామని మంత్రి పొంగులేటి తెలిపారు. వచ్చే ఏడాది బోనాల నాటికి క్యూర్ పరిధిలో నిర్మించే కొత్త ఇందిరమ్మ ఇళ్ల నుంచే బోనాలు ఎత్తేలా పనులను వేగంగా పూర్తి చేస్తామని హామీ ఇచ్చారు. రాష్ట్ర ఆర్థిక పరిస్థితి ఎలా ఉన్నా పేదల సంక్షేమంలో రాజీ ఉండదని స్పష్టం చేశారు. త్వరలో మధ్యతరగతి కుటుంబాల కోసం కూడా గృహాల విషయంలో ప్రత్యేక శుభవార్త ప్రకటిస్తామని వెల్లడించారు. ఈ పథకం ద్వారా హైదరాబాద్‌లో వేలాది పేద కుటుంబాలకు శాశ్వత గృహ వసతి కల్పించడమే ప్రభుత్వ ప్రధాన లక్ష్యమని మంత్రి పేర్కొన్నారు.