రిజిస్ట్రేషన్ సేవల ప్రైవేటీకరణకు వ్యతిరేకంగా సమ్మె
జూలై 31 వరకు ఆందోళన కొనసాగింపు
సబ్ రిజిస్ట్రార్ కార్యాలయం ఎదుట నిరసన
రిజిస్ట్రేషన్ సేవల ప్రైవేటీకరణకు దారితీసే జీవో నెం.396ను ప్రభుత్వం వెంటనే ఉపసంహరించుకోవాలని ముమ్మిడివరం దస్తావేజు లేఖర్లు, సహాయకులు, టైపిస్టులు డిమాండ్ చేశారు. జీవోను వ్యతిరేకిస్తూ సోమవారం ముమ్మిడివరం సబ్ రిజిస్ట్రార్ కార్యాలయం ఎదుట సమ్మె ప్రారంభించారు. ఈ నెల 31వ తేదీ వరకు ఆందోళన కొనసాగిస్తామని ప్రకటించారు. దస్తావేజు లేఖర్ల లైసెన్సులను పునరుద్ధరించి, రిజిస్ట్రేషన్ సేవలను ప్రైవేటీకరించే నిర్ణయాన్ని వెనక్కి తీసుకోవాలని ప్రభుత్వాన్ని కోరారు. తరతరాలుగా సంపాదించిన అనుభవంతో ప్రజలకు వివాదరహితంగా రిజిస్ట్రేషన్ సేవలు అందిస్తున్నామని, బ్రిటిష్ కాలం నుంచి కొనసాగుతున్న వ్యవస్థను నిర్వీర్యం చేయడం సరికాదని పేర్కొన్నారు.
ప్రజలకు ఇబ్బందులు తప్పవని హెచ్చరిక
జీవో 396 అమలుతో రిజిస్ట్రేషన్ ప్రక్రియలో జాప్యం, అదనపు ఖర్చులు, ప్రజలకు అనవసర ఇబ్బందులు ఎదురయ్యే ప్రమాదం ఉందని దస్తావేజు లేఖర్లు ఆందోళన వ్యక్తం చేశారు. ప్రజా ప్రయోజనాలను దృష్టిలో ఉంచుకుని ప్రభుత్వం నిర్ణయాన్ని పునఃసమీక్షించాలని కోరారు. అనంతరం తమ డిమాండ్లతో కూడిన వినతిపత్రాన్ని ముమ్మిడివరం తహశీల్దార్ సుభాష్కు అందజేశారు. ఈ కార్యక్రమంలో చవటపల్లి వెంకటేశ్వరరావు, తాడాల వీరబాబు, సలాది చిట్టిబాబు, దొమ్మేటి గాంధీతో పాటు పలువురు దస్తావేజు లేఖర్లు, సహాయకులు, కంప్యూటర్ ఆపరేటర్లు పాల్గొని జీవోను తక్షణమే రద్దు చేయాలని ప్రభుత్వాన్ని డిమాండ్ చేశారు.
