అస్త్ర, శస్త్రలతో ప్రతిపక్షాలు సిద్ధం.
మోదీకి రాహుల్-ఖర్గే స్ట్రాంగ్ లెటర్ .
విరాళాల దర్యాప్తుపై యుద్ధం మొదలు .
పార్లమెంట్కు ముందే పెరుగుతున్న హీట్ .
అయోధ్య శ్రీరామ జన్మభూమి తీర్థక్షేత్ర ట్రస్ట్ ఆర్థిక వ్యవహారాలపై స్వతంత్ర, సమగ్ర దర్యాప్తు జరిపించాలని కాంగ్రెస్ అధ్యక్షుడు మల్లికార్జున ఖర్గే, లోక్సభ ప్రతిపక్ష నాయకుడు రాహుల్ గాంధీ ప్రధాని నరేంద్ర మోదీకి సంయుక్తంగా లేఖ రాశారు. రామాలయానికి భక్తులు సమర్పించిన నగదు, బంగారం, వెండి విరాళాల నిర్వహణపై పూర్తి విచారణ జరగాలని కోరారు. ఈ లేఖ పార్లమెంట్ వర్షాకాల సమావేశాలకు ముందురోజు విడుదల కావడం రాజకీయంగా ప్రాధాన్యం సంతరించుకుంది.
భక్తుల నమ్మకానికి దెబ్బ
శ్రీరాముడిపై విశ్వాసంతో లక్షలాది మంది భక్తులు సమర్పించిన విరాళాలు దుర్వినియోగానికి గురయ్యాయనే ఆరోపణలు తీవ్ర ఆందోళన కలిగిస్తున్నాయని కాంగ్రెస్ పేర్కొంది. భక్తుల కష్టార్జిత సొమ్ము భద్రంగా ఉండాల్సిన బాధ్యత ట్రస్ట్పై ఉందని గుర్తు చేసింది. ఈ వ్యవహారం సాధారణ నేరం కాదని, భక్తుల విశ్వాసంపై జరిగిన దెబ్బగా చూడాల్సిన అవసరం ఉందని లేఖలో పేర్కొంది. సుప్రీంకోర్టు ఆదేశాల మేరకు ట్రస్ట్ ఏర్పాటు జరిగినప్పటికీ, సభ్యుల ఎంపిక పూర్తిగా కేంద్ర ప్రభుత్వ ఆధ్వర్యంలో జరిగిందని కాంగ్రెస్ పేర్కొంది. ట్రస్ట్లోని పలువురు సభ్యులకు ఆర్ఎస్ఎస్, విశ్వహిందూ పరిషత్తో అనుబంధం ఉందని ఆరోపించింది. ఇలాంటి పరిస్థితుల్లో వెలుగుచూసిన భారీ ఆర్థిక అక్రమాలపై ప్రభుత్వం మౌనం పాటించడం సమంజసం కాదని విమర్శించింది. బాధ్యులెవరైనా చట్టం ముందు జవాబుదారీగా నిలవాలని డిమాండ్ చేసింది.
లెక్కలు బహిర్గతం చేయాలి
ట్రస్ట్ ఆదాయం, ఖర్చుల పూర్తి వివరాలను ప్రజలకు వెల్లడించాలని కాంగ్రెస్ డిమాండ్ చేసింది. విరాళాలు ఎలా వినియోగించారో ప్రతి భక్తుడికి తెలిసే హక్కు ఉందని స్పష్టం చేసింది. స్వతంత్ర విచారణ నివేదికను ప్రజల ముందుంచాలని కోరింది. దోషులపై వారి హోదా, ప్రభావం చూడకుండా కఠిన చర్యలు తీసుకోవాలని లేఖలో పేర్కొంది. పారదర్శకతే ప్రభుత్వ విశ్వసనీయతను నిలబెడుతుందని కాంగ్రెస్ అభిప్రాయపడింది. రామాలయ విరాళాల దొంగతనం వ్యవహారం జూన్ తొలి వారంలో వెలుగులోకి వచ్చింది. ఈ కేసులో ఇప్పటికే ఎనిమిది మందిని పోలీసులు అరెస్టు చేశారు. ట్రస్ట్కు చెందిన ఇద్దరు కీలక అధికారులు రాజీనామా చేశారు. జూన్ 25న ట్రస్ట్ ఫిర్యాదు ఆధారంగా ఎఫ్ఐఆర్ నమోదు చేసిన పోలీసులు దర్యాప్తు కొనసాగిస్తున్నారు. ఇప్పుడు కాంగ్రెస్ తాజా డిమాండ్తో ఈ వివాదం మరింత రాజకీయ వేడి రేపే అవకాశం కనిపిస్తోంది. పార్లమెంట్ సమావేశాల్లో కూడా ఈ అంశంపై తీవ్ర చర్చ జరిగే అవకాశాలు కనిపిస్తున్నాయి.
