విగ్రహ ధ్వంసంపై తీవ్ర ఆగ్రహం
బాధ్యులపై కఠిన చర్యలు కోరిన ఇస్కఫ్
భారతదేశ బహుళత్వం, ప్రజాస్వామ్య విలువలు, సాంస్కృతిక వారసత్వంపై వరుసగా జరుగుతున్న దాడులు తీవ్ర ఆందోళన కలిగిస్తున్నాయని భారత సాంస్కృతిక స్నేహ సహకార సంఘం (ఇస్కఫ్) ఆంధ్రప్రదేశ్ రాష్ట్ర కార్యవర్గం పేర్కొంది. పశ్చిమ బెంగాల్లోని రాణిగంజ్లో మహాపండిత్ రాహుల్ సాంకృత్యాయన్ విగ్రహ ధ్వంసం కేవలం ఒక విగ్రహాన్ని కూల్చివేయడం మాత్రమే కాదని, భారత రాజ్యాంగ స్ఫూర్తి, శాస్త్రీయ దృక్పథం, ప్రగతిశీల ఆలోచనలపై జరిగిన దాడిగా అభివర్ణించింది. ఇలాంటి ఘటనలు దేశ సామాజిక సామరస్యానికి విఘాతం కలిగిస్తాయని హెచ్చరించిన ఇస్కఫ్, బాధ్యులపై తక్షణ చర్యలు తీసుకుని సాంస్కృతిక వారసత్వ పరిరక్షణకు ప్రభుత్వం కట్టుదిట్టమైన చర్యలు చేపట్టాలని డిమాండ్ చేసింది.
రాహుల్ సాంకృత్యాయన్ విగ్రహ ధ్వంసం ఖండన
పశ్చిమ బెంగాల్లోని రాణిగంజ్లో మహాపండిత్ రాహుల్ సాంకృత్యాయన్ విగ్రహాన్ని ధ్వంసం చేయడం భారత సాంస్కృతిక వారసత్వంపై జరిగిన దాడిగా భారత సాంస్కృతిక స్నేహ సహకార సంఘం (ఇస్కఫ్) ఆంధ్రప్రదేశ్ రాష్ట్ర కార్యవర్గం తీవ్రంగా ఖండించింది. రాష్ట్ర అధ్యక్షుడు కాగితాల రాజశేఖర్ మాట్లాడుతూ రాహుల్ సాంకృత్యాయన్ కేవలం రచయిత మాత్రమే కాకుండా స్వాతంత్ర్య సమరయోధుడు, మార్క్సిస్టు మేధావి, బౌద్ధ తత్వవేత్త, చరిత్రకారుడు, భాషా శాస్త్రవేత్తగా దేశానికి విశిష్ట సేవలు అందించారని గుర్తు చేశారు. అలాంటి మహనీయుడి విగ్రహాన్ని ధ్వంసం చేయడం రాజ్యాంగం ప్రతిష్ఠించిన లౌకిక, ప్రజాస్వామ్య, శాస్త్రీయ విలువలపై దాడి చేసినట్టేనని పేర్కొన్నారు. సాంస్కృతిక విధ్వంసాన్ని ప్రజాస్వామ్య శక్తులన్నీ ఐక్యంగా ప్రతిఘటించాలని ఆయన పిలుపునిచ్చారు.
విచారణ, పునర్నిర్మాణానికి డిమాండ్
ఇస్కఫ్ రాష్ట్ర నాయకులు సనపల నరసింహులు, తుంగ శ్రీధర్రావు, ఎం.ఏ. మాధవరావు, కాండ్రేగుల సత్యాంజనేయ మాట్లాడుతూ 1994లో కార్మిక సంఘాల సహకారంతో నిర్మించిన ఈ విగ్రహం ప్రజాస్వామ్య విలువలకు ప్రతీకగా నిలిచిందన్నారు. దీనిని ధ్వంసం చేయడం ఒక వ్యక్తిపై దాడి మాత్రమే కాకుండా దేశ ప్రగతిశీల చరిత్ర, కార్మిక ఉద్యమాలు, శాస్త్రీయ దృక్పథంపై జరిగిన దాడిగా అభివర్ణించారు. ఈ ఘటనపై సమగ్ర విచారణ జరిపి బాధ్యులను వెంటనే అరెస్టు చేసి కఠినంగా శిక్షించాలని, ధ్వంసమైన విగ్రహాన్ని ప్రభుత్వం తక్షణమే పునర్నిర్మించి యథాస్థానంలో ప్రతిష్ఠించాలని డిమాండ్ చేశారు. దేశంలోని రచయితలు, కళాకారులు, మేధావులు, యువత, కార్మికులు, రైతులు ప్రజాస్వామ్య, లౌకిక సంప్రదాయాల పరిరక్షణ కోసం ఐక్యంగా ముందుకు రావాలని ఇస్కఫ్ రాష్ట్ర కార్యవర్గం పిలుపునిచ్చింది.
