ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కళ్యాణ్కు ముంబైలోని ఓ ప్రముఖ ఆస్పత్రిలో భుజానికి విజయవంతంగా శస్త్రచికిత్స జరిగింది. ఈ విషయాన్ని డిప్యూటీ సీఎం కార్యాలయం అధికారికంగా వెల్లడించింది. ప్రపంచ ప్రఖ్యాత ఆర్థోపెడిక్ సర్జన్, స్పోర్ట్స్ మెడిసిన్ నిపుణుడు డాక్టర్ దిన్షా పార్థివాలా నేతృత్వంలోని వైద్య బృందం ఈ శస్త్రచికిత్స నిర్వహించింది. కుడి భుజానికి జరిగిన ఆపరేషన్ సుమారు మూడున్నర గంటల పాటు కొనసాగిందని, అనంతరం పవన్ కళ్యాణ్ను రికవరీ గదికి తరలించినట్లు అధికారులు తెలిపారు.
భుజం గాయాలు తీవ్రం కావడంతో నిర్ణయం
పవన్ కళ్యాణ్ రెండు భుజాల్లోనూ రోటేటర్ కఫ్ గాయాలు ఉన్నట్లు వైద్య పరీక్షల్లో తేలింది. కుడి భుజంలో అవల్షన్ ఫ్రాక్చర్ కూడా గుర్తించడంతో వెంటనే శస్త్రచికిత్స అవసరమైందని వైద్యులు సూచించారు. రెండు భుజాలకు ఒకేసారి శస్త్రచికిత్స చేస్తే కోలుకోవడానికి ఎక్కువ సమయం పడుతుందని భావించి, ముందుగా కుడి భుజానికి మాత్రమే ఆపరేషన్ చేశారు. ఆరోగ్యం మెరుగుపడిన తర్వాత ఎడమ భుజానికి శస్త్రచికిత్స నిర్వహించనున్నట్లు డిప్యూటీ సీఎం కార్యాలయం వెల్లడించింది.
విధులకే ప్రాధాన్యం ఇచ్చిన పవన్
2016లో ఏర్పడిన భుజం గాయాలు కాలక్రమేణా తీవ్రరూపం దాల్చినప్పటికీ, పవన్ కళ్యాణ్ ప్రజా కార్యక్రమాలు, రాజకీయ పర్యటనలు, అధికారిక బాధ్యతలను ఆపకుండా కొనసాగించినట్లు అధికారులు తెలిపారు. వైద్యులు ముందుగానే శస్త్రచికిత్స చేయించుకోవాలని సూచించినా, ముందుగా నిర్ణయించిన కార్యక్రమాలను పూర్తి చేసిన తర్వాతే ఆస్పత్రిలో చేరినట్లు పేర్కొన్నారు. ప్రస్తుతం ఆయన అనస్థీషియా ప్రభావం నుంచి కోలుకుంటూ వైద్యుల పర్యవేక్షణలో ఉన్నారు.
పవన్ ఆరోగ్యం కోసం ప్రత్యేక ప్రార్థనలు
పవన్ కళ్యాణ్ త్వరగా కోలుకోవాలని రాష్ట్రవ్యాప్తంగా అభిమానులు, జనసేన నాయకులు ప్రార్థనలు చేస్తున్నారు. తిరుపతిలోని అలిపిరి గరుడ సర్కిల్ వద్ద ఎమ్మెల్యే ఆరణి శ్రీనివాసులు కొబ్బరికాయలు కొట్టి ప్రత్యేక ప్రార్థనలు నిర్వహించారు. శ్రీవేంకటేశ్వర స్వామి ఆశీస్సులతో పవన్ కళ్యాణ్ త్వరగా కోలుకోవాలని కోరుకున్నారు. ఈ కార్యక్రమంలో జనసేన ఉమ్మడి చిత్తూరు జిల్లా అధ్యక్షుడు డాక్టర్ పసుపులేటి హరిప్రసాద్, నగర అధ్యక్షుడు రాజారెడ్డి, పార్టీ నాయకులు, కార్యకర్తలు పాల్గొన్నారు. పవన్ కళ్యాణ్ సంపూర్ణ ఆరోగ్యంతో త్వరలోనే ప్రజా సేవలోకి తిరిగి రావాలని అభిమానులు ఆకాంక్షిస్తున్నారు.
