దేశంలో రహదారి మౌలిక వసతులను మరింత బలోపేతం చేసే దిశగా కేంద్ర మంత్రివర్గం రెండు కీలక ప్రాజెక్టులకు ఆమోదం తెలిపింది. మొత్తం రూ.14,115 కోట్ల వ్యయంతో ఢిల్లీలో 8.1 కిలోమీటర్ల ఆరు లేన్ల సొరంగ మార్గం, ఉత్తరప్రదేశ్లో 117.7 కిలోమీటర్ల గ్రీన్ఫీల్డ్ హైవే నిర్మాణానికి గ్రీన్ సిగ్నల్ ఇచ్చింది. ఈ రెండు ప్రాజెక్టులు పూర్తయితే ప్రయాణ సమయం గణనీయంగా తగ్గడంతో పాటు సరకు రవాణా వేగవంతం కానుంది. పెట్టుబడులు పెరగడంతో కొత్త ఉపాధి అవకాశాలు కూడా ఏర్పడతాయని ప్రభుత్వం అంచనా వేస్తోంది.
ఢిల్లీలో ఆరు లేన్ల సొరంగ మార్గం
ఢిల్లీలో నిర్మించనున్న ఆరు లేన్ల సొరంగ మార్గం ద్వారకా ఎక్స్ప్రెస్వేను నెల్సన్ మండేలా మార్గ్తో అనుసంధానిస్తుంది. దీని ద్వారా ద్వారకా, ఐజీఐ విమానాశ్రయం, వసంత్ కుంజ్, దక్షిణ ఢిల్లీ మధ్య నిరంతర ప్రయాణ సౌకర్యం అందుబాటులోకి రానుంది. మహిపాల్పూర్ ఎలివేటెడ్ కారిడార్తో అనుసంధానం కారణంగా నోయిడా, ఘాజియాబాద్, తూర్పు ఢిల్లీ వైపు రాకపోకలు కూడా సులభమవుతాయి. రూ.6,969.67 కోట్ల వ్యయంతో నిర్మించే ఈ ప్రాజెక్టు నిర్మాణ దశలో లక్షలాది ఉపాధి దినాలను సృష్టిస్తుందని ప్రభుత్వం వెల్లడించింది.
యూపీకి గ్రీన్ఫీల్డ్ హైవే వరం
ఉత్తరప్రదేశ్లో కాన్పూర్-కబ్రాయ్ మధ్య నిర్మించే 117.7 కిలోమీటర్ల యాక్సెస్ కంట్రోల్డ్ గ్రీన్ఫీల్డ్ హైవేకు రూ.7,145.14 కోట్లు కేటాయించారు. ఈ మార్గం భోపాల్-కాన్పూర్ ఆర్థిక కారిడార్లో కీలక భాగంగా మారనుంది. జాతీయ రహదారులు, బుందేల్ఖండ్ ఎక్స్ప్రెస్వే, కాన్పూర్ రింగ్ రోడ్డుతో అనుసంధానం ఏర్పడుతుంది. ప్రస్తుతం మూడున్నర గంటలు పడుతున్న కాన్పూర్-కబ్రాయ్ ప్రయాణం కేవలం 90 నిమిషాలకు తగ్గే అవకాశం ఉంది. దీనివల్ల పరిశ్రమలు, గనులు, వ్యవసాయ రంగాలకు సరకు రవాణా మరింత వేగవంతం కానుంది.
ఆర్థికాభివృద్ధికి కొత్త దిశ
నిపుణుల అభిప్రాయం ప్రకారం ఈ ప్రాజెక్టులు కేవలం రహదారుల నిర్మాణంతో ముగిసేవి కావు. మెరుగైన రవాణా సౌకర్యం వల్ల గృహ నిర్మాణ రంగం, గిడ్డంగుల ఏర్పాటు, లాజిస్టిక్స్, రిటైల్, హోటల్ రంగాల్లో పెట్టుబడులు పెరిగే అవకాశం ఉంది. మెరుగైన అనుసంధానం కారణంగా భూముల విలువలు పెరగడంతో పాటు కొత్త పారిశ్రామిక కేంద్రాలు కూడా ఏర్పడే అవకాశాలు కనిపిస్తున్నాయి. గత దశాబ్దంగా జాతీయ రహదారులపై కేంద్రం భారీగా పెట్టుబడులు పెడుతోంది. రవాణా వ్యయాన్ని తగ్గించడం, సరఫరా వ్యవస్థను బలోపేతం చేయడం, కొత్త ఆర్థిక కేంద్రాలను అభివృద్ధి చేయడం లక్ష్యంగా ఈ ప్రాజెక్టులు ముందుకు తీసుకువెళ్తున్నట్లు ప్రభుత్వం పేర్కొంది. ఢిల్లీ-ఎన్సీఆర్కు ట్రాఫిక్ సమస్యల నుంచి ఉపశమనం లభించనుండగా, బుందేల్ఖండ్ ప్రాంతానికి ఈ హైవే అభివృద్ధి మార్గంగా నిలుస్తుందనే అంచనాలు వ్యక్తమవుతున్నాయి.
