సభ ముందుకు డీలిమిటేషన్ బిల్లు.
ఎన్డీఏ పక్షాలకు వర్షాకాలం హీట్.
పార్లమెంట్ వర్షాకాల సమావేశాల్లో డీలిమిటేషన్ బిల్లు మరోసారి రాజకీయ చర్చకు కేంద్రబిందువుగా మారే అవకాశాలు కనిపిస్తున్నాయి. గత బడ్జెట్ సమావేశాల్లో రాజ్యాంగ సవరణ బిల్లుకు అవసరమైన మూడింట రెండొంతుల మెజారిటీ రాకపోవడంతో ప్రభుత్వం వెనక్కి తగ్గింది. ఇప్పుడు మారిన రాజకీయ సమీకరణాలతో అదే బిల్లును సవరణలతో మళ్లీ తీసుకురావడానికి కేంద్రం ప్రయత్నిస్తున్నట్లు సంకేతాలు వెలువడుతున్నాయి. మహిళా రిజర్వేషన్ అమలుకు అనుసంధానంగా డీలిమిటేషన్ ప్రక్రియను పూర్తి చేయాలన్నది ప్రభుత్వ లక్ష్యంగా ఉంది.
గతంలో ఏం జరిగింది?
లోక్సభలో మహిళలకు 33 శాతం రిజర్వేషన్ అమలు కోసం తాజా డీలిమిటేషన్ అవసరమని కేంద్రం భావిస్తోంది. ఇందుకోసం లోక్సభ గరిష్ఠ సభ్యుల సంఖ్యను 550 నుంచి 850కు పెంచే ప్రతిపాదనను గతంలో తీసుకొచ్చింది. అయితే జనాభా ఆధారంగా సీట్ల పునర్విభజన చేస్తే దక్షిణాది రాష్ట్రాలకు నష్టం జరుగుతుందని ప్రాంతీయ పార్టీలు తీవ్ర అభ్యంతరం వ్యక్తం చేశాయి. దీంతో బిల్లు అవసరమైన మెజారిటీ సాధించలేక నిలిచిపోయింది.
మోదీ ఇచ్చిన హామీ
దక్షిణాది రాష్ట్రాల ఆందోళనలను దృష్టిలో ఉంచుకుని ప్రధానమంత్రి నరేంద్ర మోదీ పార్లమెంట్లో కీలక హామీ ఇచ్చారు. మహిళల కోసం అదనంగా సీట్లు పెంచినా రాష్ట్రాలకు ప్రస్తుతం ఉన్న సీట్ల నిష్పత్తిలో మార్పు ఉండదని స్పష్టం చేశారు. ప్రతి రాష్ట్రానికి ఉన్న వాటా అలాగే కొనసాగుతుందని చెప్పారు. అయితే బిల్లులో ఆ హామీ స్పష్టంగా ప్రతిబింబించలేదనే అభిప్రాయం పలువురు వ్యక్తం చేస్తున్నారు. ఈసారి ఆ అంశంపై స్పష్టత ఇచ్చే అవకాశం ఉందని రాజకీయ వర్గాలు భావిస్తున్నాయి.
మారిన రాజకీయ లెక్కలు
బడ్జెట్ సమావేశాల తర్వాత రాజకీయ పరిస్థితులు గణనీయంగా మారాయి. ప్రతిపక్ష కూటమికి వరుస ఎదురుదెబ్బలు తగిలాయి. తృణమూల్ కాంగ్రెస్ నుంచి 20 మంది ఎంపీలు విడిపోయారు. శివసేన (యూబీటీ) నుంచి కూడా ఎంపీలు అధికార కూటమికి చేరువయ్యారు. వైఎస్సార్ కాంగ్రెస్ ఇప్పటికే డీలిమిటేషన్ బిల్లుకు మద్దతు ప్రకటించింది. ఎన్డీయే బలం గణనీయంగా పెరగడంతో ఈసారి ప్రభుత్వం మరింత ధైర్యంగా ముందుకు సాగుతోంది.
ప్రాంతీయ పార్టీలే కీలకం
ఎన్సీపీ (ఎస్పీ), శివసేన (యూబీటీ), డీఎంకే వంటి పార్టీలు తమ ఆందోళనలకు పరిష్కారం లభిస్తే బిల్లుకు మద్దతు ఇవ్వడానికి సిద్ధమనే సంకేతాలు ఇచ్చాయి. అన్ని రాష్ట్రాలకు సమాన శాతంలో సీట్లు పెరిగితే అభ్యంతరం ఉండదని కొందరు నేతలు పేర్కొన్నారు. తమిళనాడు సహా దక్షిణాది రాష్ట్రాల ప్రయోజనాలకు భరోసా కల్పిస్తే చర్చలకు అవకాశం ఉందని డీఎంకే నాయకత్వం కూడా స్పష్టం చేసింది.
తుది పరీక్ష పార్లమెంట్లోనే
అన్ని మద్దతులు లభించినా ప్రభుత్వం ఇంకా అవసరమైన సంఖ్యకు కొద్దిదూరంలోనే ఉంటుంది. అయితే రాజ్యాంగ సవరణ బిల్లుల విషయంలో సభలో హాజరై ఓటింగ్లో పాల్గొన్న సభ్యుల ఆధారంగానే మూడింట రెండొంతుల మెజారిటీ లెక్కిస్తారు. కొందరు సభ్యులు ఓటింగ్కు దూరంగా ఉంటే అవసరమైన సంఖ్య తగ్గే అవకాశం ఉంది. ఈ నేపథ్యంలో అధికార పక్షం మద్దతు విస్తరించేందుకు ప్రయత్నాలు ముమ్మరం చేసింది. మరోవైపు ప్రతిపక్షం కూడా సంఖ్యాబలం కాపాడుకునేందుకు కసరత్తు ప్రారంభించింది. దీంతో డీలిమిటేషన్ బిల్లు ఈ వర్షాకాల సమావేశాల్లో అత్యంత కీలక రాజకీయ పోరుగా మారే అవకాశాలు స్పష్టంగా కనిపిస్తున్నాయి.
