సర్ పేరిట దేశంలో ప్రజాస్వామ్యంపై తీవ్రమైన దాడి జరుగుతోందని టీపీసీసీ అధ్యక్షుడు మహేశ్ కుమార్ గౌడ్ ఆరోపించారు. హనుమకొండలో నిర్వహించిన వరంగల్ పశ్చిమ నియోజకవర్గ బూత్ లెవెల్ ఏజెంట్ల శిక్షణ కార్యక్రమంలో ఆయన మాట్లాడారు. గతంలో ఓట్లను ఓటర్ల జాబితాలో చేర్చే కార్యక్రమం జరిగితే, నేడు బీజేపీ హయాంలో ఓట్లను తొలగించే ప్రక్రియకు ప్రాధాన్యం ఇస్తున్నారని మండిపడ్డారు. పశ్చిమ బెంగాల్ రాష్ట్రంలో ఓట్లను దొంగిలించి అడ్డదారిన బీజేపీ విజయం సాధించిందని దుయ్యబట్టారు.
మీనాక్షి నటరాజన్ నామినేషన్ తిరస్కరణపై ఆగ్రహం
దేశంలో ప్రస్తుతం రాజ్యాంగం, ప్రజాస్వామ్యం ఎక్కడున్నాయని మహేశ్ కుమార్ గౌడ్ ప్రశ్నించారు. ఓట్ల చోరీ మాత్రమే కాకుండా సీట్ల చోరీకి కూడా బీజేపీ పాల్పడుతోందని విమర్శించారు. తెలంగాణ కాంగ్రెస్ వ్యవహారాల ఇన్ఛార్జ్ మీనాక్షి నటరాజన్ రాజ్యసభ నామినేషన్ను కావాలనే కుట్రపూరితంగా తిరస్కరించారని ఆరోపించారు. ప్రధాని నరేంద్ర మోదీ, కేంద్ర మంత్రి అమిత్ షా తమ సొంత ఎజెండాతో ముందుకు వెళ్తున్నారని, అందుకే ఈ వాస్తవాలను ప్రజలకు వివరించడానికి తాము ఇక్కడికి వచ్చామని చెప్పారు.
కేటీఆర్, బీఆర్ఎస్ పాలనపై తీవ్ర విమర్శలు
బీఆర్ఎస్ పాలనలో పదేళ్లపాటు రాష్ట్రంలో విచ్చలవిడి దోపిడీ జరిగిందని, ఇప్పుడు కేటీఆర్ అసత్యాలను ప్రచారం చేస్తున్నారని మహేశ్ కుమార్ గౌడ్ ఆగ్రహం వ్యక్తం చేశారు. గతంలో జరిగిన అవినీతిని ప్రజలు మరిచిపోయారనే భ్రమలో కేటీఆర్ బతుకుతున్నారని ఎద్దేవా చేశారు. స్వంత ఆస్తుల కోసం సొంత చెల్లిని బయటకు పంపేసిన కేటీఆర్ ఇక ప్రజలకు ఏం న్యాయం చేస్తారని నిలదీశారు. కాంగ్రెస్ పాలనలో అభివృద్ధి, సంక్షేమం జోడెద్దుల్లా సాగుతున్నాయని, రాష్ట్రంలో ఎన్నికలు ఎప్పుడు జరిగినా కాంగ్రెస్ పార్టీ వంద సీట్లు గెలవడం ఖాయమని ధీమా వ్యక్తం చేశారు.
#MaheshKumarGoud #TPCC #Congress #TelanganaCongress #Hanamkonda #WarangalWest #BoothLevelAgents #Democracy #Constitution #BJP #VoteDeletion #ElectionPolitics #MeenakshiNatarajan #RajyaSabha #NarendraModi #AmitShah #KTR #BRS #TelanganaPolitics #CongressVsBJP #CongressVsBRS #PoliticalNews #TelanganaNews #Warangal #PoliticalTraining
