కొత్త రాజకీయ సందేశం?
కొత్త రాజకీయ పార్టీ ప్రకటనకు సిద్ధమవుతున్న విజయసాయిరెడ్డి.. రేపు రాజమండ్రి పర్యటనతో మరోసారి ఏపీ రాజకీయాల్లో హీట్ పెంచబోతున్నారా? పది ఏళ్ల రియాన్ష్ రెడ్డి కుటుంబాన్ని విషాద ఘటనలో కోల్పోయిన బాలుడిని పరామర్శించేందుకు స్వయంగా ఇంటికి వెళ్లనున్నారు. బాలుడికి అండగా నిలిచే పర్యటనగా ప్రకటించినప్పటికీ.. కొత్త పార్టీ ఆవిర్భావానికి కొద్ది రోజుల ముందు ఈ అడుగు వేయడం రాజకీయంగా ఆసక్తిని పెంచుతోంది. ఇప్పటికే ‘లవ్ జీహాద్’ అంశంపై సాయిరెడ్డి చేసిన వ్యాఖ్యలు చర్చకు దారితీశాయి. ఇప్పుడు బాధిత కుటుంబాన్ని నేరుగా కలవబోతుండటంతో ఆయన పర్యటనపై రాజకీయ వర్గాల్లో ఉత్కంఠ నెలకొంది. ఈ పర్యటన ద్వారా సాయిరెడ్డి తన కొత్త రాజకీయ ప్రయాణానికి ఎలాంటి సంకేతం ఇవ్వబోతున్నారు? ఎలాంటి అంశాలను తన అజెండాగా ముందుకు తెస్తారు? అన్నదే ఇప్పుడు హాట్ టాపిక్గా మారింది.
పరామర్శకు ముందు పొలిటికల్ హైప్
పది ఏళ్ల రియాన్ష్ రెడ్డికి అండగా నిలిచేందుకు మాజీ ఎంపీ విజయసాయిరెడ్డి ఆగస్టు 24న రాజమండ్రి వెళ్లనున్నారు. తల్లి సౌజన్య, తండ్రి జగదీశ్రెడ్డి, నానమ్మ, తాతను కోల్పోయిన రియాన్ష్ను పరామర్శించి ధైర్యం చెప్పేందుకు బాలుడు ప్రస్తుతం ఉంటున్న ఇంటికి వెళ్తున్నట్లు ఆయన సోషల్ మీడియా వేదికగా వెల్లడించారు. కుటుంబ విషాదంతో చిన్న వయసులోనే ఒంటరిగా మిగిలిన బాలుడికి సంఘీభావం తెలిపి, అతడి పరిస్థితిని తెలుసుకోవడమే తన పర్యటన ఉద్దేశమని సాయిరెడ్డి తెలిపారు. ఈ ఘటనపై ఇప్పటికే పోలీసులు కేసు నమోదు చేసి జిమ్ ట్రైనర్ సాదిక్ ఖాన్ను అరెస్టు చేసిన నేపథ్యంలో సాయిరెడ్డి వ్యాఖ్యలు ప్రాధాన్యం సంతరించుకున్నాయి.
రాజకీయాలకు గుడ్బై.. మళ్లీ ఎంట్రీ
గతేడాది రాజకీయాలకు గుడ్బై చెబుతున్నట్లు ప్రకటించిన విజయసాయిరెడ్డి ఇప్పుడు మళ్లీ రాజకీయ రంగంలోకి అడుగుపెడుతున్నారు. త్వరలో కొత్త రాజకీయ పార్టీ ప్రకటించేందుకు సిద్ధమవుతున్న ఆయన, పార్టీ ప్రకటనకు ముందే ప్రజల్లో చర్చకు దారితీసే అంశాలను ఎంచుకుంటున్నారన్న అభిప్రాయాలు వ్యక్తమవుతున్నాయి. ఇటీవల గోదావరిలో దూకి మృతి చెందిన పంచాయతీరాజ్ శాఖ ఏఈ నూకరాజు కుటుంబాన్ని పరామర్శించేందుకు కూడా ఆయన సిద్ధమయ్యారు. తాజాగా రియాన్ష్ కుటుంబాన్ని కలవనున్నట్లు ప్రకటించడం ద్వారా బాధిత కుటుంబాల పక్షాన నిలిచే రాజకీయ సందేశాన్ని ఇవ్వాలని ప్రయత్నిస్తున్నారన్న చర్చ మొదలైంది. కొత్త పార్టీ ప్రకటించనున్న సమయంలో వరుసగా సామాజిక అంశాలపై స్పందించడం ఆయన రాజకీయ పునరాగమనానికి ప్రత్యేక గుర్తింపును తీసుకొచ్చే అవకాశం ఉంది.
‘లవ్ జీహాద్’ అంశంతో కొత్త రాజకీయ లెక్కలు
రియాన్ష్ కుటుంబ ఘటనను విజయసాయిరెడ్డి ‘లవ్ జీహాద్’ అంశంతో ముడిపెట్టి విమర్శలు చేయడం ఇప్పుడు రాజకీయంగా చర్చనీయాంశంగా మారింది. మత మార్పిడికి ఒత్తిడి చేశారనే ఆరోపణలపై సాదిక్ ఖాన్పై కేసు నమోదై అరెస్టు జరిగిన నేపథ్యంలో ఆయన ఈ అంశాన్ని రాజకీయ చర్చలోకి తీసుకొస్తున్నారు. రియాన్ష్ ఇంటికి వెళ్లడం ద్వారా బాధిత కుటుంబానికి సంఘీభావం తెలపడమే కాకుండా, తన కొత్త పార్టీ రాజకీయ దిశపై సంకేతాలు ఇస్తున్నారన్న ప్రచారం సాగుతోంది. ముఖ్యంగా బీజేపీ రాజకీయ అజెండాలో ప్రాధాన్యం ఉన్న ‘లవ్ జీహాద్’ అంశం, వైసీపీకి సాంప్రదాయంగా అనుకూలంగా భావించే రెడ్డి సామాజిక వర్గం వంటి రెండు రాజకీయ కోణాలపై ఆయన దృష్టి పెట్టే అవకాశం ఉందన్న అంచనాలు వినిపిస్తున్నాయి. అయితే ఇవి ప్రస్తుతం రాజకీయ వర్గాల్లో జరుగుతున్న విశ్లేషణలే తప్ప, సాయిరెడ్డి అధికారికంగా ప్రకటించిన పార్టీ వ్యూహంగా నిర్ధారించలేం.
