చీరాల – జూన్ 28(నాదేశం) : జిల్లాను సంపూర్ణ పోలియో రహితంగా కొనసాగించాలంటే సున్నా నుండి ఐదేళ్లలోపు ఉన్న ప్రతి చిన్నారికి తప్పనిసరిగా రెండు పోలియో చుక్కలు వేయించాలని బాపట్ల జిల్లా జాయింట్ కలెక్టర్ భావన వశిష్ట పేర్కొన్నారు. జిల్లా వైద్య ఆరోగ్య శాఖ అధికారిణి డాక్టర్ ఎస్. విజయమ్మ, డీసీహెచ్ఎస్ డాక్టర్ పద్మావతిలతో కలిసి ఆదివారం చీరాల ప్రభుత్వ ఏరియా ఆసుపత్రి నందు నిర్వహించిన పల్స్ పోలియో కార్యక్రమంలో చిన్నారులకు పోలియో చుక్కలు వేసి జిల్లా జాయింట్ కలెక్టర్ అధికారికంగా ప్రారంభించారు. ఈ సందర్భంగా జాయింట్ కలెక్టర్ భావన వశిష్ట మాట్లాడుతూ.. పోలియో అనేది చిన్నారులను శాశ్వత వైకల్యానికి గురిచేసే అత్యంత ప్రమాదకరమైన వ్యాధి అని హెచ్చరించారు. సకాలంలో పోలియో చుక్కలు వేయించడం ద్వారా పిల్లల్లో వ్యాధి నిరోధక శక్తి పెరిగి, ఈ మహమ్మారి నుంచి సంపూర్ణ రక్షణ లభిస్తుందని తల్లిదండ్రులకు సూచించారు. దేశ భవిష్యత్తు అయిన చిన్నారులను ఆరోగ్యవంతులుగా తీర్చిదిద్దేందుకు ప్రతి ఒక్కరూ బాధ్యతగా ఈ పల్స్ పోలియో కార్యక్రమాన్ని విజయవంతం చేయాలని పిలుపునిచ్చారు.
ఇప్పటికే సాధారణ టీకా పట్టిక ప్రకారం పోలియో చుక్కలు లేదా ఇంజెక్షన్లు వేయించుకున్న పిల్లలకు సైతం, ఈ ప్రత్యేక పల్స్ పోలియో కార్యక్రమంలో తప్పనిసరిగా మళ్లీ చుక్కలు వేయించాలని జేసీ స్పష్టం చేశారు. జిల్లావ్యాప్తంగా అన్ని ప్రాంతాల్లో ఏర్పాటు చేసిన పల్స్ పోలియో కేంద్రాలను తల్లిదండ్రులు సద్వినియోగం చేసుకోవాలన్నారు. ఐదేళ్లలోపు ఉన్న ఏ ఒక్క చిన్నారి కూడా మిస్ కాకుండా వంద శాతం లక్ష్యాన్ని పూర్తి చేయాలని అధికారులను ఆమె ఆదేశించారు.
#PulsePolio #PolioFreeIndia #PulsePolioCampaign #Chirala #Bapatla #BapatlaDistrict #ChildHealth #Vaccination #PolioDrops #PublicHealth #BhavanaVasishta #HealthDepartment #GovernmentHospital #Immunization #HealthyChildren #AndhraPradesh #BreakingNews #LatestNews #TeluguNews #HealthNews
