కర్ణాటకలోని బెళగావి జిల్లాలో ఒక భయంకరమైన హత్య ఉదంతం వెలుగులోకి వచ్చింది. కేవలం రూ. 2 కోట్ల ఇన్సూరెన్స్ సొమ్మును క్లెయిమ్ చేయడం కోసం ఒక మహిళ తన ప్రియుడు, ఆసుపత్రి సిబ్బందితో కలిసి భర్తను దారుణంగా హతమార్చింది. మృతుడు సందీప్ మంజరగి మాజీ సైనికోద్యోగి. ఈ దారుణమైన కుట్రకు పాల్పడిన మృతుడి భార్య సుమ మంజరగి, ఆమె ప్రియుడు పుండలీక్ దొంబార్తో సహా మొత్తం తొమ్మిది మందిని పోలీసులు అరెస్ట్ చేశారు. సాధారణ బైక్ ప్రమాదంగా భావించిన ఈ ఘటన చివరకు పక్కా ప్లాన్ ప్రకారం జరిగిన హత్యగా తేలింది.
సెలైన్ బాటిల్లో విషం కలిపి హత్య
సందీప్కు మార్చి 13న ఒక చిన్న రోడ్డు ప్రమాదం జరిగింది. చికిత్స కోసం అతని భార్య సుమ మొదట హుక్కేరి ప్రభుత్వ ఆసుపత్రిలో చేర్పించి, ఆ తర్వాత ఘటప్రభలోని జేజీ ఆసుపత్రికి మార్చింది. ఆసుపత్రిలో చికిత్స పొందుతున్న సమయంలో సుమ, పుండలీక్ అక్కడ పనిచేసే కొందరు సిబ్బందిని తమ వైపు తిప్పుకున్నారు. సందీప్కు ఎక్కించే సెలైన్ బాటిల్లో విషం కలపడంతో పాటు నిద్రమాత్రలు ఇచ్చి ఘోరంగా చంపేశారు. మార్చి 15న సందీప్ చనిపోగా, ఆసుపత్రి సిబ్బంది సహాయంతో దానిని గుండెపోటుగా రికార్డులలో నమోదు చేయించారు.
సోషల్ మీడియా పోస్ట్తో దొరికిపోయిన నిందితులు
సందీప్ మరణం తర్వాత శవపరీక్ష నివేదికలో కూడా ఎలాంటి విషం లేదని, గుండెపోటు వల్లే చనిపోయాడని తప్పుడు నివేదికలు సృష్టించారు. సందీప్కు పెద్దగా గాయాలు లేకపోయినా అకస్మాత్తుగా ఎలా చనిపోయాడనే అనుమానం పోలీసులకు వచ్చింది. ఈ లోపు సుమ ప్రియుడు పుండలీక్ సోషల్ మీడియాలో ఒక వింత పోస్ట్ పెట్టాడు. ప్రమాదానికి గురైన వ్యక్తి వెంటనే ఎలా చనిపోతాడంటూ, తనకు ఈ కేసు గురించి లోపలి విషయాలు తెలుసనేలా పోస్ట్ చేయడంతో పోలీసులకు అనుమానం వచ్చి అతడిని విచారించారు. విచారణలో మొత్తం కుట్ర బయటపడింది.
తప్పుడు నివేదికల కోసం లక్షల లంచం
పుండలీక్, సందీప్ కలిసి హోటల్ వ్యాపారం ప్రారంభించిన సమయంలో సుమతో పుండలీక్కు వివాహేతర సంబంధం ఏర్పడింది. సందీప్ పేరిట ఉన్న రూ. 2 కోట్ల ఇన్సూరెన్స్ డబ్బు కోసం వీరిద్దరూ హత్యకు ప్లాన్ చేశారు. శవపరీక్ష నివేదికలను మార్చడానికి, విషం ఉన్నట్లు బయటకు తెలియకుండా ఉండటానికి ల్యాబ్ సిబ్బందికి, ప్రభుత్వ అధికారులకు రూ. 3 లక్షలకు పైగా లంచం ఇచ్చినట్లు విచారణలో తేలింది. పోలీసులు నిందితుల నుండి విషపు డబ్బాలు, సిరంజీలు, మొబైల్ ఫోన్లను స్వాధీనం చేసుకున్నారు. తెలంగాణలోని కామారెడ్డిలో కూడా ఇటీవల ఇలాగే భర్తను చంపి ప్రమాదంగా చిత్రీకరించిన ఘటనను పోలీసులు గుర్తుచేస్తున్నారు.
