హైదరాబాద్ రాయదుర్గంలో ఇటీవల తెలంగాణ ప్రభుత్వం నిర్వహించిన భారీ భూముల వేలం ప్రక్రియ చట్టపరమైన చిక్కుల్లో పడింది. ఈ ప్రాంతంలోని నాలెడ్జ్ సిటీ సర్వే నంబర్ 83/1లో ఉన్న స్థలానికి తెలంగాణ పారిశ్రామిక మౌలిక సదుపాయాల సంస్థ… టీజీఐఐసీ ఈ-వేలం నిర్వహించింది. ఇందులో ఐదు ఎకరాల స్థలం తమదేనంటూ స్టేట్ బ్యాంక్ ఆఫ్ ఇండియా హైకోర్టును ఆశ్రయించింది. ఈ పిటిషన్ను విచారించిన న్యాయమూర్తి జస్టిస్ ఎన్వీ శ్రవణ్ కుమార్ నేతృత్వంలోని సింగిల్ బెంచ్ వేలం తదుపరి చర్యలపై మూడు వారాల పాటు మధ్యంతర స్టే విధిస్తూ సంచలన ఉత్తర్వులు జారీ చేసింది.
భూమి యాజమాన్యంపై బ్యాంకు వాదన
ఉమ్మడి ఆంధ్రప్రదేశ్ ప్రభుత్వం 2010లో రాయదుర్గంలోని ఐదు ఎకరాల స్థలాన్ని అప్పటి స్టేట్ బ్యాంక్ ఆఫ్ హైదరాబాద్, సంస్థకు రూ. 13.33 కోట్లకు కేటాయించిందని ఎస్బీఐ తన పిటిషన్లో పేర్కొంది. ఎస్బీహెచ్ బ్యాంకు ఎస్బీఐలో విలీనం అయిన తర్వాత ఈ ఆస్తి తమ ఖాతాలోకి వచ్చిందని తెలిపింది. ఈ భూమిని అభివృద్ధి చేయడానికి పర్యావరణ సంస్థలు, మునిసిపల్ విభాగం, విమానయాన సంస్థల నుండి అన్ని రకాల అనుమతులు పొందామని వివరించింది. అక్కడ తవ్వకం పనులు జరిపి తాత్కాలిక బ్రాంచ్, ఏటీఎంను కూడా ఏర్పాటు చేసి సేవలు అందిస్తున్నామని కోర్టుకు తెలిపింది.
నిబంధనల ఉల్లంఘనపై ఆగ్రహం
ఈ భూమిని ప్రభుత్వం తిరిగి స్వాధీనం చేసుకోవడానికి వీలు కల్పించే ఎలాంటి నిబంధనలు అసలు కేటాయింపు పత్రాలలో లేవని ఎస్బీఐ స్పష్టం చేసింది. గతంలో తాము ప్రాజెక్ట్ మేనేజ్మెంట్ కన్సల్టెంట్లను నియమించడంలో ఆలస్యం కావడం వల్ల ప్రభుత్వం కేటాయింపులను రద్దు చేయడానికి ప్రయత్నించిందని పేర్కొంది. అయితే 2022లో హైకోర్టు ఆ రద్దు ఉత్తర్వులను పక్కన పెట్టిందని గుర్తు చేసింది. ఆ తర్వాత కూడా 2024, 2025 సంవత్సరాల్లో తమ ప్రతిపాదనలను పరిశీలించాలని కోర్టు ఆదేశించినప్పటికీ అధికారులు ఏప్రిల్ 2026లో కొత్త నోటీసులు ఇచ్చి మే నెలలో వేలం వేయడం చట్టవిరుద్ధమని వాదించింది.
స్పందన కోరిన ఉన్నత న్యాయస్థానం
టీజీఐఐసీ నిర్వహించిన వేలంలో గౌరా వెంచర్స్ ప్రైవేట్ లిమిటెడ్ సంస్థ ఎకరాకు రూ. 237 కోట్ల నుండి రూ. 260 కోట్ల వరకు పలికిన ధరతో ఈ స్థలాన్ని దక్కించుకుంది. దీని ద్వారా ప్రభుత్వానికి రూ. 1490.73 కోట్ల ఆదాయం వచ్చింది. అయితే తమకు హక్కులు ఉన్న భూమిని వేలం వేయడం రాజ్యాంగ విరుద్ధమని ఎస్బీఐ అభ్యర్థించడంతో హైకోర్టు స్పందించింది. ఈ వివాదంపై మూడు వారాల్లోగా పూర్తి వివరాలతో కౌంటర్ అఫిడవిట్ దాఖలు చేయాలని టీజీఐఐసీని ఆదేశించింది. వేలంలో పాల్గొన్న గౌరా వెంచర్స్ సంస్థకు కూడా నోటీసులు జారీ చేస్తూ తదుపరి విచారణను వాయిదా వేసింది.
