హైడ్రా చీఫ్ రంగనాథ్‌పై ఈటల విసుర్లు

• పేదల ఇళ్ల కూల్చివేతలపై వార్నింగ్
• అస్మత్‌పేటలో బాధితులకు ఎంపీ పరామర్శ

హైడ్రా కమిషనర్ రంగనాథ్‌ను లక్ష్యంగా చేసుకుని మల్కాజ్‌గిరి ఎంపీ, బీజేపీ సీనియర్ నేత ఈటల రాజేందర్ తీవ్రస్థాయిలో విమర్శలు గుప్పించారు. ముఖ్యమంత్రి అండ ఉందనే ధైర్యంతో ప్రజల ఇళ్లను ఇష్టానుసారంగా కూల్చేస్తున్నారని ఆరోపించారు. ప్రజల ఆవేదన, శాపం ఒకరోజు తప్పకుండా తాకుతుందని హెచ్చరించారు. కోర్టులు పలుమార్లు ఆదేశాలు ఇచ్చినా, శనివారాలనే కూల్చివేతలు చేపట్టడం వెనుక ఉద్దేశం ఏమిటని ఈటల ప్రశ్నించారు. న్యాయస్థానాల పట్ల హైడ్రా అధికారులకు గౌరవం ఉందా లేదా అని నిలదీశారు. మానవత్వం ఉన్న ఏ అధికారి కూడా పేదల ఇళ్లను ఈ విధంగా కూల్చివేయరని వ్యాఖ్యానించారు.

“పేదలపైనే ప్రతాపమా?”

భూకబ్జాదారులు, అవినీతి అధికారులపై చర్యలు తీసుకునే ధైర్యం హైడ్రాకు లేదని ఈటల ఆరోపించారు. రాజకీయ నాయకుల పేర్లు చెప్పే సాహసం చేయకుండా, నోరులేని పేద ప్రజల ఇళ్లపైనే ప్రతాపం చూపుతున్నారని మండిపడ్డారు. హైడ్రా వ్యవహారశైలి బయటి దేశం నుంచి వచ్చిన దాడి దళంలా ఉందని విమర్శించారు. ఇందిరమ్మ రాజ్యం పేరుతో పేదల ఇళ్లను కూల్చడమే ప్రభుత్వ లక్ష్యమా అని ఈటల ప్రశ్నించారు. గతంలో కూడా ఇలాంటి ప్రభుత్వం ఉండి ఉంటే హైదరాబాద్‌లో బస్తీలు, పేదలకు గూళ్లు ఉండేవి కావని అన్నారు. పేదల ఆవేదనను విస్మరిస్తే ప్రభుత్వం తీవ్ర రాజకీయ మూల్యం చెల్లించుకోవాల్సి వస్తుందని హెచ్చరించారు.

భూయాజమాన్యంపై స్పష్టత కావాలి

అస్మత్‌పేట సర్వే నంబర్-1లోని భూమిని కొందరు పురావస్తు శాఖ భూమిగా, మరికొందరు ప్రభుత్వ భూమిగా, ఇంకొందరు ప్రైవేటు భూమిగా చెబుతున్నారని ఈటల అన్నారు. అసలు అది ఎవరి భూమో తేల్చాల్సిన బాధ్యత రెవెన్యూ శాఖదేనని పేర్కొన్నారు. విచారణ పూర్తికాకముందే ఇళ్లను కూల్చివేయడం అన్యాయమని విమర్శించారు. ప్రభుత్వ భూమి అయితే లేఅవుట్ చేసినవారు ఎవరు, అమ్మిన బ్రోకర్లు ఎవరు, సహకరించిన అధికారులు, రాజకీయ నాయకులు ఎవరో గుర్తించి వారిపై చర్యలు తీసుకోవాలని డిమాండ్ చేశారు.

హైడ్రా లక్ష్యం మారిపోయిందా?

హైడ్రా ఏర్పాటైనప్పుడు చెరువులు, మురికి కాలువలు, వరద కాలువలు కాపాడుతుందని ప్రజలు భావించారని ఈటల చెప్పారు. భూకబ్జాదారులపై చర్యలు తీసుకుంటుందని ఆశించామని అన్నారు. కానీ ఇప్పుడు పేదలే లక్ష్యంగా మారారని ఆరోపించారు. భూకబ్జాదారులు, అధికారులపై చర్యలు తీసుకునే ధైర్యం లేక పేదల ఇళ్లను కూల్చివేస్తున్నారని మండిపడ్డారు. రాజకీయ నాయకుల పేర్లు ప్రస్తావించే సాహసం కూడా హైడ్రాకు లేదని విమర్శించారు.

#EtelaRajender #HYDRA #Hyderabad #Asmathpet #Telangana #BJP #HouseDemolition #PoorPeople #HydraCommissioner #Ranganath #TelanganaPolitics #Encroachment #GovernmentLand #PoliticalNews #HyderabadNews #BreakingNews #LatestNews #TeluguNews #BJPNews #Malkajgiri