ఎడ్జ్బాస్టన్లో ఇంగ్లండ్తో జరుగుతున్న మూడో టెస్టులో పాకిస్థాన్ కెప్టెన్ బాబర్ ఆజమ్కు మరోసారి సెంచరీ చేజారింది. నాలుగేళ్లుగా టెస్టు శతకం కోసం ఎదురుచూస్తున్న బాబర్.. మూడో రోజు 76 పరుగుల వద్ద విచిత్రమైన షాట్తో వికెట్ పారేసుకున్నాడు. 103 బంతుల్లో 11 ఫోర్లు, ఒక సిక్సర్తో దూకుడుగా సాగిన అతడి ఇన్నింగ్స్.. జోష్ టంగ్ వేసిన షార్ట్బాల్తో ఒక్కసారిగా ముగిసింది. బంతి శరీరం వైపు రావడంతో బాబర్ ఆడిన ఫ్లాప్ షాట్ బ్యాట్ అంచును తాకి నేరుగా వికెట్ కీపర్ జోర్డాన్ కాక్స్ చేతుల్లోకి వెళ్లింది. సిరీస్లో ఇంగ్లండ్ బౌలర్లు బాబర్పై షార్ట్బాల్ వ్యూహాన్ని పదేపదే ప్రయోగిస్తుండగా.. అదే ఉచ్చులో అతడు మరోసారి చిక్కుకున్నాడు. రెండో టెస్టులోనూ ఇలాంటి షాట్తోనే వికెట్ కోల్పోవడం ఇప్పుడు చర్చనీయాంశంగా మారింది. జోష్ టంగ్కు బాబర్ నాలుగు ఇన్నింగ్స్ల్లో మూడోసారి వికెట్గా మారాడు. చివరిసారిగా 2022 డిసెంబర్లో న్యూజిలాండ్పై 161 పరుగులు చేసిన బాబర్కు.. అప్పటి నుంచి టెస్టు శతకం అందని ద్రాక్షగానే మిగిలింది. అయితే ఈ ఇన్నింగ్స్తో కెప్టెన్గా 2,000 టెస్టు పరుగుల మైలురాయిని అందుకున్నాడు. మొత్తంగా కెప్టెన్గా 7,029 పరుగులతో మిస్బా ఉల్ హక్ తర్వాత ఈ ఘనత సాధించిన రెండో పాకిస్థాన్ కెప్టెన్గా చరిత్ర సృష్టించాడు.
#BabarAzam #BabarAzam76 #BabarAzamVsEngland #EnglandVsPakistan #PakistanVsEngland #BabarAzamTest #BabarAzamCentury #JoshTongue #ShortBall #PakistanCricket #EnglandCricket #TestCricket #BabarAzamDismissal #BabarAzamRecords #PakistanCaptain #CricketNews
