తెలంగాణ ల్యాండ్ అండ్ సర్వే విభాగంలో పనిచేస్తున్న ఓ ఉన్నతాధికారి అక్రమాస్తుల వ్యవహారం రాష్ట్రవ్యాప్తంగా సంచలనంగా మారింది. మల్టీ జోన్-2 డిప్యూటీ డైరెక్టర్ సుంకరి నరహరి రావుపై అవినీతి నిరోధక శాఖ నిర్వహించిన సోదాల్లో కోట్ల రూపాయల నగదు, బంగారం, స్థిరాస్తుల పత్రాలు వెలుగులోకి వచ్చాయి. హైదరాబాద్తో పాటు పది ప్రాంతాల్లో ఏకకాలంలో జరిగిన దాడుల్లో అధికారులను సైతం ఆశ్చర్యపరిచే స్థాయిలో ఆస్తులు బయటపడ్డాయి. ఆదాయానికి మించిన ఆస్తులు కూడబెట్టినట్లు గుర్తించిన ఏసీబీ, ఇప్పటివరకు రూ.13 కోట్లకు పైగా విలువైన ఆస్తులను గుర్తించినా అధికారిక లెక్కల ప్రకారం ఆ మొత్తం 150 కోట్ల పైమాటే.
పది చోట్ల ఏకకాలంలో ఏసీబీ తనిఖీలు
ఏసీబీ డీఎస్పీ శ్రీధర్ ఆధ్వర్యంలో ప్రత్యేక బృందాలు ఈ దాడుల్లో పాల్గొన్నాయి. నరహరి నివాసం, కార్యాలయంతో పాటు నారాయణగూడలోని ఆయన బంధువులు, స్నేహితులు, ఆప్తుల ఇళ్లలో సోదాలు జరిగాయి. నరహరి గతంలో రంగారెడ్డి జిల్లా అసిస్టెంట్ డైరెక్టర్గా పనిచేసిన సమయంలో భూమి సర్వే, సరిహద్దు వివాదాల పరిష్కారం, భూసేకరణ వంటి కీలక బాధ్యతలను దుర్వినియోగం చేసి అక్రమాలకు పాల్పడినట్లు అధికారులు గుర్తించారు.
ఇల్లు నిండా నగదు, బంగారు ఆభరణాలు
ఈ సోదాలలో అధికారులు షాక్ అయ్యేలా భారీగా అక్రమాస్తులు బయటపడ్డాయి. నరహరి, ఆయన తమ్ముడి ఇళ్ల నుంచి దాదాపు 1.54 కోట్ల రూపాయల నగదును అధికారులు స్వాధీనం చేసుకున్నారు. వీటితో పాటు బ్యాంకు ఖాతాలలో 2.29 కోట్ల రూపాయల నిల్వలు, 5.04 కోట్ల రూపాయల విలువైన ఫిక్స్డ్ డిపాజిట్లు ఉన్నట్లు కనుగొన్నారు. తనిఖీల్లో సుమారు 1.3 కిలోల బంగారు ఆభరణాలు, 8 కిలోల వెండి వస్తువులను సీజ్ చేశారు.
బినామీల పేరిట విలాసవంతమైన భవనాలు
నగదు, బంగారం మాత్రమే కాకుండా భారీగా స్థిరాస్తుల పత్రాలను ఏసీబీ స్వాధీనం చేసుకుంది. గచ్చిబౌలి టీఎన్జీఓస్ కాలనీలో ఒక మూడు అంతస్తుల భవనం, చాత్రినాకలో రెండు అంతస్తుల ఇల్లు ఉన్నట్లు గుర్తించారు. రంగారెడ్డి జిల్లాలో ఐదు ఖాళీ ప్లాట్లు, మహేశ్వరంలో 1.24 ఎకరాల వ్యవసాయ భూమి ఉన్నాయి. పుప్పాలగూడ, నార్సింగి, రాజేంద్రనగర్ వంటి ఖరీదైన ప్రాంతాలలో పలు విలాసవంతమైన ఫ్లాట్లకు సంబంధించిన పత్రాలను స్వాధీనం చేసుకున్నారు.
పదమూడు కోట్ల అక్రమాస్తుల గుర్తింపు
నరహరి భార్య పేరిట ఉన్న రెండు బ్యాంకు లాకర్లను ఇంకా తెరవాల్సి ఉందని అధికారులు తెలిపారు. ప్రస్తుతం దొరికిన ఆస్తుల ప్రభుత్వ అధికారిక విలువ సుమారు 13.05 కోట్ల రూపాయలుగా లెక్కగట్టారు. మార్కెట్ విలువ ప్రకారం ఇవి వందల కోట్లలో ఉంటాయని అంచనా వేస్తున్నారు. అక్రమాస్తుల కేసులో డిప్యూటీ డైరెక్టర్ నరహరి రావును ఏసీబీ అధికారులు అధికారికంగా అరెస్ట్ చేశారు. నిందితుడిని నాంపల్లిలోని ఏసీబీ ప్రత్యేక కోర్టులో హాజరుపరిచి జ్యుడీషియల్ రిమాండ్కు తరలించారు.
