- నిర్వాసితులకు అండగా ఇందిరమ్మ ప్రభుత్వం
- అభివృద్ధిలో ప్రజలే భాగస్వాములు – డిప్యూటీ సీఎం భరోసా
హైదరాబాద్ నగరానికి మణిహారంగా భావిస్తున్న మూసీ నది పునరుజ్జీవన ప్రాజెక్టులో భాగంగా నివాసాలను కోల్పోయే నిర్వాసితులందరికీ ప్రభుత్వం అన్ని విధాలా అండగా ఉంటుందని ఉప ముఖ్యమంత్రి భట్టి విక్రమార్క స్పష్టం చేశారు. శుక్రవారం ప్రజా భవన్లో మధుపార్క్ రిడ్జ్ రెసిడెన్షియల్ అసోసియేషన్ ప్రతినిధులతో మంత్రులు భట్టి విక్రమార్క, శ్రీధర్ బాబు భేటీ అయ్యారు. ఈ సందర్భంగా ప్రాజెక్టుపై ప్రజల్లో ఉన్న అపోహలను, సందేహాలను మంత్రులు నివృత్తి చేశారు. నిర్వాసితులకు చట్టబద్ధంగా, న్యాయబద్ధంగా తగిన పరిహారం, పునరావాసం కల్పిస్తామని, ప్రభుత్వం అత్యంత సానుకూల దృక్పథంతో ఉందనే భరోసా ఇచ్చారు. ప్రజల జీవన ప్రమాణాలను మెరుగుపరచడమే లక్ష్యమని, ఈ బృహత్తర ప్రాజెక్టులో నగరవాసులు భాగస్వాములు కావాలని కోరారు.
సామాజిక బాధ్యతగా మూసీ ప్రక్షాళన
మూసీ పునరుజ్జీవనం కేవలం నదిని శుభ్రం చేయడం మాత్రమే కాదని, అది ఒక గొప్ప సామాజిక బాధ్యత అని కేబినెట్ సబ్ కమిటీ పేర్కొంది. అభివృద్ధి పేరుతో ప్రజలను దూరం చేయడం తమ ఉద్దేశం కాదని, ప్రజల ఆస్తులకు కనీస నష్టం కూడా కలగకుండా మానవీయ కోణంలో ప్రాజెక్టును ముందుకు తీసుకెళ్తామని అధికారులు స్పష్టం చేశారు. ఇందుకోసం అలైన్మెంట్లో మార్పులు చేసి, ఇప్పటికే ఉన్న నిర్మాణాలపై అతి తక్కువ ప్రభావం పడేలా ప్రణాళికలు సిద్ధం చేయాలని అధికారులను ఆదేశించారు. నగరవాసులకు స్వచ్ఛమైన గాలి, నీరు మరియు పచ్చదనాన్ని అందించడమే ఈ ప్రాజెక్టు పరమార్థమని, ప్రజల భాగస్వామ్యంతోనే ఇది సాకారం అవుతుందని ప్రభుత్వం విశ్వసిస్తోంది.
నిధుల సేకరణ, అభివృద్ధి దశలు
మొత్తం 55 కిలోమీటర్ల మేర ఐదు దశల్లో ఈ ప్రాజెక్టును అభివృద్ధి చేయనున్నారు. తొలిదశ (ఫేజ్-1) పనుల కోసం సుమారు ₹7,055 కోట్ల వ్యయం అంచనా వేశారు. ఇందుకోసం ఏషియన్ డెవలప్మెంట్ బ్యాంక్ నుంచి నిధులు సమకూర్చుకునేందుకు అవసరమైన ఆర్థిక, సాంకేతిక చర్చలు విజయవంతంగా ముగిశాయని అధికారులు మంత్రులకు వివరించారు. హిమాయత్ సాగర్ నుంచి బాపుఘాట్ వరకు, ఉస్మాన్ సాగర్ నుంచి బాపుఘాట్ వరకు ఉన్న 21 కిలోమీటర్ల పరిధిలో.. ఎటువంటి గృహనిర్మాణాలపై ప్రభావం లేని మొదటి ఐదు కిలోమీటర్ల పనులను వెంటనే ప్రారంభించాలని ప్రభుత్వం నిర్ణయించింది.
అత్యాధునిక సాంకేతికత – సుందరీకరణ
మూసీ సుందరీకరణలో భాగంగా నదిలోని వ్యర్థాలను తొలగించడం, రివర్ బెడ్ ప్రొఫైలింగ్ చేయడం, వరద నియంత్రణకు రిటైనింగ్ వాల్స్ నిర్మించనున్నారు. అలాగే నీటి నిల్వ కోసం నదిలో రబ్బర్ డ్యామ్లను ఏర్పాటు చేయనున్నారు. ఈ రబ్బర్ డ్యామ్ల వల్ల జలక్రీడలు, బోటింగ్ వంటి పర్యాటక సౌకర్యాలు అందుబాటులోకి వస్తాయి. నార్సింగి నుంచి గౌరెల్లి వరకు 55 కిలోమీటర్ల మేర ఎలివేటెడ్ కారిడార్ నిర్మాణానికి కూడా ప్రణాళికలు సిద్ధమయ్యాయి. 2026 ఆగస్టు నాటికి నిర్మాణ పనులను ప్రారంభించి, డిసెంబర్ 2027 నాటికి ప్రాజెక్టును పూర్తి చేయాలని ప్రభుత్వం లక్ష్యంగా పెట్టుకుంది. ఈ లోపు ప్రాజెక్టు ప్రయోజనాలను బస్టాండ్లు, థియేటర్ల ద్వారా ప్రజలకు విస్తృతంగా ప్రచారం చేయాలని అధికారులను ఆదేశించారు.
