హైకోర్టు వ్యాఖ్యలు కాంగ్రెస్కు చెంపపెట్టు.
హైడ్రాపై కేటీఆర్ యుద్ధం.
హైడ్రాపై తెలంగాణ హైకోర్టు చేసిన వ్యాఖ్యలను బీఆర్ఎస్ వర్కింగ్ ప్రెసిడెంట్ కేటీఆర్ ప్రస్తావిస్తూ కాంగ్రెస్ ప్రభుత్వంపై తీవ్ర విమర్శలు చేశారు. హైడ్రా అనేది తొమ్మిది తలల విషసర్పమని హైకోర్టు వ్యాఖ్యానించిందని, అంతకంటే ముఖ్యమంత్రి రేవంత్ రెడ్డికి పెద్ద చెంపపెట్టు ఉండదని అన్నారు. ప్రజాస్వామ్యాన్ని గౌరవించాలంటే న్యాయస్థానాల వ్యాఖ్యలను గౌరవించాలని సూచించారు. బీఆర్ఎస్ ప్రభుత్వం మళ్లీ అధికారంలోకి వచ్చిన మొదటి రోజే హైడ్రాను ఎత్తి బంగాళాఖాతంలో పడేస్తామని ప్రకటించారు.
పేదల ఇళ్లే లక్ష్యమా?
ఢిల్లీలో మీడియాతో మాట్లాడిన కేటీఆర్, హైడ్రా చర్యలు పూర్తిగా ఎంపిక చేసిన లక్ష్యాలపైనే సాగుతున్నాయని ఆరోపించారు. పేదల ఇళ్లను మాత్రమే కూల్చేస్తున్నారని, అధికార పార్టీలోని పెద్దల అక్రమ నిర్మాణాలను మాత్రం ముట్టుకోవడం లేదన్నారు. రాష్ట్ర రెవెన్యూ మంత్రి పొంగులేటి శ్రీనివాస్ రెడ్డి చెరువు పరిధిలో ఉన్న నిర్మాణాలు, ముఖ్యమంత్రి కుటుంబ సభ్యుల ఇళ్లు, కాంగ్రెస్ నేతల భవనాలు, ప్రభావశీలుల నిర్మాణాలపై ఎందుకు చర్యలు తీసుకోవడం లేదని ప్రశ్నించారు. చట్టం అందరికీ ఒకేలా ఉండాలని డిమాండ్ చేశారు.
హైడ్రా కాదు.. బ్లాక్మెయిల్ సాధనం
హైడ్రా ఇప్పుడు ప్రభుత్వ సంస్థలా కాకుండా రాజకీయ ప్రత్యర్థులను భయపెట్టే ఆయుధంగా మారిందని కేటీఆర్ ఆరోపించారు. హైదరాబాద్లో వేలాది ఇళ్లను కూల్చివేసి ఒక్క కొత్త ఇల్లు కూడా నిర్మించలేదని విమర్శించారు. పెద్ద పెద్ద బిల్డర్ల అక్రమ నిర్మాణాలు కనిపించవని, సాధారణ ప్రజల ఇళ్లపై మాత్రం బుల్డోజర్లు నడుపుతున్నారని అన్నారు. హైడ్రా పేరుతో బ్లాక్మెయిల్, వసూళ్లు జరుగుతున్నాయనే ఆరోపణలు ప్రజల్లో వినిపిస్తున్నాయని వ్యాఖ్యానించారు. రాష్ట్రంలో నిషేధిత భూముల విస్తీర్ణం భారీగా పెరిగిందని కేటీఆర్ ఆరోపించారు. బీఆర్ఎస్ ప్రభుత్వం దిగిపోయే సమయానికి 16 లక్షల ఎకరాలే నిషేధిత జాబితాలో ఉండగా, ఇప్పుడు అది కోటి ఎకరాలకు చేరుకుందని చెప్పారు. దీనికి కారణం ఏమిటో ప్రభుత్వం సమాధానం చెప్పాలని డిమాండ్ చేశారు. భూములను భూహారతి పేరుతో మింగేస్తున్నది కాంగ్రెస్ ప్రభుత్వమేనని, భారీ కమిషన్ల కోసం భూదందాలు సాగుతున్నాయని విమర్శించారు.
యువత ఆగ్రహాన్ని తక్కువ అంచనా వేయొద్దు
నీట్ పేపర్ లీక్ వంటి ఘటనలు దేశ యువతలో తీవ్ర అసంతృప్తిని పెంచాయని కేటీఆర్ అన్నారు. ఇది ఒక్క పరీక్ష సమస్య కాదని, విద్య, ఉపాధి, అవకాశాలపై పేరుకుపోయిన ఆవేదనకు నిదర్శనమని పేర్కొన్నారు. యువత ఆగ్రహాన్ని చిన్నచూపు చూస్తే నేపాల్ తరహా భారీ ఉద్యమాలు భారత్లో కూడా వచ్చే అవకాశం ఉందని హెచ్చరించారు. పేపర్ లీకులపై కేంద్రం తీసుకొచ్చే చట్టాన్ని పరిశీలించి, పారదర్శకతకు ఉపయోగపడే సంస్కరణలకు బీఆర్ఎస్ మద్దతు ఇస్తుందని స్పష్టం చేశారు. ప్రజా భూములను కాపాడాలంటే ముందుగా అధికార పార్టీలోని నేతల అక్రమ నిర్మాణాలపైనే చర్యలు తీసుకోవాలని కేటీఆర్ సవాల్ విసిరారు. చట్టం పేదలకు శిక్ష, అధికారులకు రక్షణగా మారకూడదన్నారు. హైడ్రాను రాజకీయ కక్ష సాధింపు సాధనంగా ఉపయోగించడం మానుకుని, నిజమైన పరిపాలన అందించాలని ప్రభుత్వానికి సూచించారు. న్యాయం అందరికీ ఒకటే కావాలని, అదే ప్రజాస్వామ్యానికి అసలు అర్థమని కేటీఆర్ స్పష్టం చేశారు.
#KTR #HYDRAA #TelanganaPolitics #BRS #RevanthReddy #CongressTelangana #TelanganaHighCourt #HyderabadNews #HYDRAADemolitions #PoliticalNews #KTRNews #TelanganaGovernment #LandIssues #BRSvsCongress #TeluguNews
