ప్రపంచానికి డబ్బుతో పని లేదా.. ఎప్పట్నుంచి? ప్రపంచ కుబేరుడు మస్క్ చెబుతున్న జోస్యం ?

2036లో డబ్బు అవసరమే ఉండదా?

ఎలాన్ మస్క్ సంచలన అంచనా

ప్రపంచంలోని అత్యంత ధనవంతుల్లో ఒకరైన ఎలాన్ మస్క్ మరోసారి సంచలన వ్యాఖ్యలు చేశారు. ప్రస్తుతం మనిషి జీవితంలో అత్యంత కీలకమైన డబ్బు.. 2036 నాటికి ప్రాధాన్యం కోల్పోతుందని ఆయన అభిప్రాయపడ్డారు. ఒక పాడ్‌కాస్ట్‌లో మాట్లాడిన మస్క్, కృత్రిమ మేధస్సు (AI), రోబోలు ప్రపంచ ఆర్థిక వ్యవస్థను పూర్తిగా మార్చేస్తాయని చెప్పారు. మరో పదేళ్లలో వస్తువులు, సేవలు అపారంగా అందుబాటులోకి వస్తే డబ్బు అవసరమే ఉండదని ఆయన పేర్కొన్నారు. మస్క్ అంచనా ప్రకారం భవిష్యత్తులో ఆహారం, ఇళ్లు, రవాణా, వినోదం వంటి దాదాపు అన్ని అవసరాలను AI వ్యవస్థలు, రోబోలు సమృద్ధిగా అందిస్తాయి. ఒక మనిషి వినియోగించగల దానికంటే ఎక్కువ వస్తువులు, సేవలు అందుబాటులో ఉంటే వాటిని కొనడానికి డబ్బు ఎందుకు అవసరమని ఆయన ప్రశ్నించారు. ఈ పరిస్థితి ఏర్పడితే ప్రపంచంలో అపారమైన సమృద్ధి నెలకొంటుందని ఆయన భావిస్తున్నారు.

మనిషిపై AI ఆధిపత్యమా?

అయితే ఈ భవిష్యత్తు పూర్తిగా సానుకూలంగా ఉండదని కూడా మస్క్ హెచ్చరించారు. మరో పదేళ్లలో AI మేధస్సు మనుషుల సమిష్టి మేధస్సును దాటిపోతుందని ఆయన అంచనా వేశారు. మనిషికి, AIకి మధ్య మేధస్సు వ్యత్యాసం.. చింపాంజీకి, మనిషికి మధ్య ఉన్నంత కంటే ఎక్కువైతే ప్రపంచ నియంత్రణ మన చేతుల్లో ఉండటం కష్టమవుతుందని వ్యాఖ్యానించారు. చివరికి నిర్ణయాధికారం కూడా బాట్ల చేతుల్లోకి వెళ్లే ప్రమాదం ఉందని ఆయన అభిప్రాయపడ్డారు. రాబోయే ఐదేళ్లలోనే AI సమిష్టి మానవ మేధస్సును అధిగమిస్తుందని మస్క్ తెలిపారు. మనుషులు చేయగలిగే దాదాపు ప్రతి పనిని AI మరింత సమర్థంగా చేయగలదని చెప్పారు. “మనిషిగా ఉండటం” తప్ప మిగతా అన్ని రంగాల్లో AI ముందంజలో ఉంటుందని ఆయన వ్యాఖ్యానించారు. అయితే డబ్బు స్థానంలో ఏ వ్యవస్థ వస్తుందనే అంశంపై మాత్రం ఆయన స్పష్టత ఇవ్వలేదు.\

టెక్ దిగ్గజాల హెచ్చరికలు

AI అభివృద్ధి వేగాన్ని ఇక ఆపడం చాలా కష్టమని మస్క్ అభిప్రాయపడ్డారు. ఒకవేళ దాన్ని నిలిపివేసే అవకాశం ఉన్నా కూడా అలా చేయాల్సిన అవసరం ఉండకపోవచ్చని తాత్వికంగా వ్యాఖ్యానించారు. సాంకేతిక పరిణామం సహజంగా ముందుకు సాగుతుందని, దానిని అడ్డుకోవడం సరైన మార్గం కాదని ఆయన అభిప్రాయం వ్యక్తం చేశారు. ఎలాన్ మస్క్ అభిప్రాయాలకు ఇతర AI దిగ్గజాల వ్యాఖ్యలు కూడా బలం చేకూరుస్తున్నాయి. ఓపెన్‌ఏఐ సీఈఓ సామ్ ఆల్ట్‌మన్ ఇప్పటికే ప్రపంచం “సింగ్యులారిటీ” దశలోకి ప్రవేశిస్తోందని పేర్కొన్నారు. గూగుల్ డీప్‌మైండ్ అధినేత డెమిస్ హసాబిస్ కూడా మానవాళి అదే దశకు చేరువలో ఉందని చెప్పారు. మరోవైపు ఆంత్రోపిక్ సంస్థ భవిష్యత్తులో AI వ్యవస్థలు తమకంటే శక్తివంతమైన కొత్త AIలను స్వయంగా రూపొందించే అవకాశం ఉందని హెచ్చరించింది. భద్రతా పరీక్షల్లో కొన్ని అధునాతన AI నమూనాలు మోసపూరిత ప్రవర్తన చూపిన సందర్భాలు నమోదయ్యాయని పరిశోధకులు వెల్లడించారు. దీంతో AI అభివృద్ధి ఎంతటి అవకాశాలు తీసుకువస్తుందో, అంతే స్థాయిలో కొత్త సవాళ్లను కూడా ముందుకు తెస్తోందనే చర్చ ప్రపంచవ్యాప్తంగా కొనసాగుతోంది.