ఢిల్లీలో యువత ఆగ్రహ జ్వాలలు! ధర్మేంద్ర ప్రధాన్ రాజీనామా డిమాండ్

ఢిల్లీ జంతర్ మంతర్‌లో కాక్రోచ్ జనతా పార్టీ, సీజేపీ చేపట్టిన నిరసన రెండో రోజుకు చేరింది. పార్టీ వ్యవస్థాపకుడు అభిజీత్ దిప్కే నేతృత్వంలో విద్యార్థులు, యువత, మద్దతుదారులు పెద్ద సంఖ్యలో ఆందోళన కొనసాగిస్తున్నారు. కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేసే వరకు నిరసన విరమించబోమని స్పష్టం చేస్తున్నారు. ఢిల్లీ పోలీసులు నిరసన స్థలాన్ని ఖాళీ చేయాలని సూచించినప్పటికీ ఆందోళనకారులు వెనక్కి తగ్గడం లేదు.

నీట్ వివాదం… ప్రజలకు దిప్కే పిలుపు

నీట్-యూజీ ప్రశ్నాపత్రం లీక్ వివాదం తర్వాత దేశవ్యాప్తంగా విద్యార్థుల్లో అసంతృప్తి పెరిగింది. పరీక్షల నిర్వహణలో జరిగిన లోపాలపై బాధ్యులపై చర్యలు తీసుకోవాలని నిరసనకారులు డిమాండ్ చేస్తున్నారు. విద్యార్థుల భవిష్యత్తుతో ఆటలు ఆడుతున్నారని ఆరోపిస్తూ కేంద్ర ప్రభుత్వంపై విమర్శలు చేస్తున్నారు. ఈ నేపథ్యంలో ధర్మేంద్ర ప్రధాన్ పదవికి రాజీనామా చేయాలన్న డిమాండ్ ఉద్యమానికి కేంద్రబిందువుగా మారింది. అభిజీత్ దిప్కే దేశవ్యాప్తంగా రైతులు, విద్యార్థులు, తల్లిదండ్రులు, యువత ఈ ఉద్యమానికి మద్దతు ఇవ్వాలని పిలుపునిచ్చారు. రైతుల ఉద్యమ సమయంలో విద్యార్థులు అండగా నిలిచారని, ఇప్పుడు విద్యార్థుల కోసం రైతులు ముందుకు రావాలని కోరారు. నీట్ రీ-ఎగ్జామ్ పూర్తి చేసిన తర్వాత విద్యార్థులు కూడా జంతర్ మంతర్‌కు రావాలని విజ్ఞప్తి చేశారు.

పోలీసులతో ప్రతిష్ఠంభన

నిరసనకు ఇచ్చిన అనుమతి గడువు ముగిసిందని ఢిల్లీ పోలీసులు ప్రకటించారు. ఆందోళనకారులను అక్కడి నుంచి వెళ్లిపోవాలని కోరారు. అయితే ప్రత్యామ్నాయ స్థలం కేటాయిస్తే మాత్రమే అక్కడికి వెళ్తామని దిప్కే తెలిపారు. ధర్మేంద్ర ప్రధాన్ రాజీనామా చేసే వరకు తమ ఉద్యమం కొనసాగుతుందని స్పష్టం చేశారు. ఈ పరిస్థితి కారణంగా పోలీసులు భారీ భద్రతను ఏర్పాటు చేశారు. మరోవైపు నిరసన స్థలంలో నీరు, ఆహారం, మరుగుదొడ్ల వినియోగంపై కూడా వివాదం నెలకొంది. తొలుత పోలీసులు నీటి సరఫరా నిలిపివేశారని, విద్యుత్ దీపాలు ఆపేశారని సీజేపీ ఆరోపించింది. తర్వాత పరిస్థితి సాధారణమై నీటి సౌకర్యం పునరుద్ధరించబడిందని నిరసనకారులు తెలిపారు. అయినప్పటికీ ఉద్యమాన్ని అణచివేసే ప్రయత్నాలు జరుగుతున్నాయని ఆరోపించారు.

యువత భారీగా తరలివచ్చింది

జంతర్ మంతర్ వద్ద యువత పెద్ద సంఖ్యలో చేరింది. చేతుల్లో స్టీల్ ప్లేట్లు, స్పూన్లు పట్టుకుని “గో ప్రధాన్ గో” అంటూ నినాదాలు చేశారు. పరీక్షల అక్రమాలపై సమగ్ర విచారణ జరిపి బాధ్యులపై కఠిన చర్యలు తీసుకోవాలని డిమాండ్ చేశారు. విద్యా వ్యవస్థలో పారదర్శకత తీసుకురావాలని కోరారు. సోషల్ మీడియా వేదికగా ప్రారంభమైన కాక్‌రోచ్ జనతా పార్టీ ఇప్పుడు జాతీయ స్థాయిలో చర్చనీయాంశంగా మారింది. లక్షలాది మంది యువత మద్దతుతో ఈ ఉద్యమం విస్తరిస్తోంది. జంతర్ మంతర్‌లో కొనసాగుతున్న ఈ నిరసన విద్యా వ్యవస్థ, పరీక్షల పారదర్శకత, యువత భవిష్యత్తు వంటి అంశాలను మరోసారి దేశవ్యాప్తంగా చర్చకు తీసుకువచ్చింది. ప్రస్తుతం కేంద్ర ప్రభుత్వం స్పందనపై అందరి దృష్టి నిలిచింది.

#NEETUG #NEETControversy #JantarMantar #StudentProtest #CockroachJanataParty #CJP #AbhijeetDipke #DharmendraPradhan #EducationReforms #NEETPaperLeak #ExamTransparency #StudentMovement #YouthProtest #DelhiProtest #EducationSystem #StudentsRights #NationalTestingAgency #NTA #NEETReExam #DelhiPolice #PublicProtest #YouthVoice #ExamScam #EducationNews #IndiaNews #BreakingNews #LatestNews #JantarMantarProtest #StudentJustice #EducationPolicy