ప్రపంచ నగరాల్లో భారత్ దూసుకెళ్లింది…ఢిల్లీ రెండో స్థానం… ముంబై నాలుగో స్థానంలో

ప్రపంచంలో జనాభా అత్యధికంగా ఉన్న నగరాల తాజా జాబితాలో ఆసియా మరోసారి ఆధిపత్యం చాటుకుంది. ప్రపంచ జనాభా సమీక్ష (World Population Review) అంచనాల ఆధారంగా ఆర్క్‌డైలీ విడుదల చేసిన నివేదిక ప్రకారం 2026లో అత్యధిక జనాభా కలిగిన నగరంగా చైనా షాంఘై నిలిచింది. భారతదేశానికి చెందిన ఢిల్లీ రెండో స్థానంలో నిలవగా, ముంబై నాలుగో స్థానాన్ని దక్కించుకుంది. ప్రపంచంలోని అగ్ర నాలుగు నగరాల్లో రెండు భారత నగరాలు చోటు సంపాదించడం విశేషంగా మారింది.

ఢిల్లీ, ముంబైకు ఘన గుర్తింపు

షాంఘై జనాభా 2.47 కోట్లకు చేరగా, ఢిల్లీ జనాభా 2.33 కోట్లుగా అంచనా వేశారు. డీఆర్‌ కాంగోలోని కిన్షాసా మూడో స్థానంలో నిలిచింది. ముంబై 2.17 కోట్ల జనాభాతో నాలుగో స్థానాన్ని దక్కించుకుంది. ఈ జాబితా నగరాల పరిధిలోని జనాభా ఆధారంగా రూపొందించబడింది. మెట్రోపాలిటన్ ప్రాంతాల లెక్కలు ఇందులో పరిగణనలోకి తీసుకోలేదు.

టాప్-10 నగరాల జాబితా

జనాభా పరంగా ప్రపంచంలోని తొలి పది నగరాల్లో షాంఘై, ఢిల్లీ, కిన్షాసా, ముంబై, బీజింగ్, కరాచీ, షెన్‌జెన్, గ్వాంగ్‌జౌ, కానో, చెంగ్డూ ఉన్నాయి. ఈ జాబితాలో చైనాకు చెందిన నాలుగు నగరాలు ఉండటం గమనార్హం. భారత్ రెండు నగరాలతో అగ్రస్థానాల్లో నిలవడం దేశంలో వేగంగా పెరుగుతున్న పట్టణీకరణకు నిదర్శనంగా నిలిచింది.

భారత్‌కు మరో బలమైన స్థానం

అగ్ర పది నగరాలకే పరిమితం కాకుండా బెంగళూరు 12వ స్థానంలో నిలిచింది. కోల్‌కతా 13వ స్థానాన్ని దక్కించుకోగా, చెన్నై 17వ స్థానంలో నిలిచింది. దీంతో ప్రపంచంలో అత్యధిక జనాభా కలిగిన నగరాల జాబితాలో భారత్‌కు ఐదు నగరాలు తొలి 20 స్థానాల్లో చోటు దక్కించుకున్నాయి. ఇది దేశంలో పట్టణాల విస్తరణ వేగాన్ని స్పష్టంగా చూపిస్తోంది.

పట్టణీకరణతో కొత్త సవాళ్లు

ప్రపంచ జనాభాలో ఇప్పటికే సగానికి పైగా ప్రజలు నగరాల్లోనే నివసిస్తున్నారు. 2050 నాటికి ఈ సంఖ్య దాదాపు 70 శాతానికి చేరుకునే అవకాశం ఉందని నివేదిక పేర్కొంది. జనాభా పెరుగుదలతో గృహాలు, రవాణా, మౌలిక వసతులు, ప్రజా సేవలు, పర్యావరణ పరిరక్షణపై ప్రభుత్వాలపై భారీ ఒత్తిడి పెరుగుతోంది. భవిష్యత్తులో స్థిరమైన పట్టణాభివృద్ధి, సమర్థవంతమైన నగర ప్రణాళికే ప్రధాన సవాల్‌గా మారనున్నట్లు నిపుణులు అభిప్రాయపడుతున్నారు.