భారత్ను అవమానించేలా ద్రోహపు బుద్ధి
సరిహద్దుల విషయంలో అగ్రరాజ్యం కుట్రలు
కశ్మీర్ మ్యాప్తో చెత్తపని చేసిన అధికారులు
స్నేహమంటూనే ఇండియాకు ట్రంప్ వెన్నుపోటు
అమెరికా ప్రభుత్వం తమ అత్యంత కీలకమైన సైనిక విభాగానికి సంబంధించి ఒక పెద్ద నిర్ణయం తీసుకుంది. గత ఎనిమిదేళ్లుగా చలామణిలో ఉన్న ‘యూఎస్ ఇండో-పసిఫిక్ కమాండ్’ పేరును తిరిగి పాతపద్ధతిలోనే ‘యూఎస్ పసిఫిక్ కమాండ్’ గా మారుస్తూ రక్షణ శాఖ ఉత్తర్వులు జారీ చేసింది. గతంలో డొనాల్డ్ ట్రంప్ తన మొదటి విడత పదవీ కాలంలో 2018 సంవత్సరంలో ఈ విభాగానికి ఇండో-పసిఫిక్ కమాండ్ అని పేరు మార్చారు. హిందూ మహాసముద్రం, పసిఫిక్ మహాసముద్రాల మధ్య ఉన్న వ్యూహాత్మక బంధాన్ని గుర్తించి అప్పటి రక్షణ మంత్రి జేమ్స్ మాటిస్ ఆ మార్పును ప్రతిపాదించారు. అయితే ఇప్పుడు ఎనిమిదేళ్ల తర్వాత ఆ నిర్ణయాన్ని వెనక్కి తీసుకుంటూ పాత పేరును ఖరారు చేశారు.
చారిత్రక వారసత్వానికే ప్రాధాన్యత
ఈ పేరు మార్పుపై అమెరికా రక్షణ శాఖ ఒక అధికారిక ప్రకటన విడుదల చేసింది. రెండో ప్రపంచ యుద్ధం ముగిసిన తర్వాత 1947లో అప్పటి అమెరికా అధ్యక్షుడు హ్యారీ ట్రూమన్ ఈ విభాగాన్ని ఏర్పాటు చేశారని గుర్తు చేసింది. సుమారు డెబ్బై ఏళ్లకు పైగా ఈ విభాగం ‘యూఎస్ పీఏసీఓఎమ్’ పేరుతోనే చారిత్రక బాధ్యతలను నిర్వర్తించిందని పేర్కొంది. కొరియా యుద్ధం, వియత్నాం యుద్ధం వంటి ఎన్నో కీలక ఘట్టాలలో ఈ కమాండ్ చురుకైన పాత్ర పోషించింది. ఆనాటి సైనిక వారసత్వాన్ని, భాగస్వామ్య దేశాల సమిష్టి స్ఫూర్తిని గౌరవించేందుకే ఈ చారిత్రాత్మక నిర్ణయం తీసుకున్నట్లు రక్షణ శాఖ స్పష్టం చేసింది.
భారత సరిహద్దు మ్యాప్పై రేగిన వివాదం
అమెరికా తీసుకున్న ఈ నిర్ణయంతో పాటు ఒక కొత్త వివాదం కూడా తెరపైకి వచ్చింది. పేరు మార్పు ప్రకటన వెలువడిన వెంటనే యూఎస్ పసిఫిక్ కమాండ్ తన అధికారిక వెబ్సైట్లో భారతదేశానికి సంబంధించిన ఒక మ్యాప్ను ప్రదర్శించింది. ఆ మ్యాప్లో జమ్మూ కాశ్మీర్కు చెందిన కొన్ని ప్రాంతాలను పాకిస్తాన్ భూభాగంలో ఉన్నట్లుగా చూపించారు. దీనిపై భారత్లో తీవ్ర అభ్యంతరాలు, విమర్శలు వ్యక్తమవుతున్నాయి. పేరు మార్చడమే కాకుండా భారతదేశ ప్రాంతీయ సమగ్రతను దెబ్బతీసేలా మ్యాప్ను ఉంచడంపై తీవ్ర ఆగ్రహం వ్యక్తమవుతోంది. ఈ మ్యాప్ వివాదం ఇప్పుడు రాజకీయంగా చర్చనీయాంశంగా మారింది.
బాధ్యతలలో ఎటువంటి మార్పులు లేవు
పేరు మారినప్పటికీ ఈ కమాండ్ పనితీరులో గానీ, పరిధిలో గానీ ఎలాంటి మార్పులు ఉండవని అమెరికా స్పష్టం చేసింది. అమెరికా పశ్చిమ తీరం నుండి మొదలుకొని భారతదేశ పశ్చిమ సరిహద్దు వరకు ఈ విభాగానికి పాత బాధ్యతలే వర్తిస్తాయి. ప్రాంతీయ మిత్రదేశాలతో కలిసి స్వేచ్ఛా, పారదర్శక విధానాలను కాపాడటమే ఈ కమాండ్ ప్రధాన లక్ష్యమని అధికారులు తెలిపారు. కేవలం చారిత్రక గుర్తింపు కోసం మాత్రమే పేరు మార్చామని, క్షేత్రస్థాయిలో వ్యూహాత్మక పనులన్నీ యథాతథంగా కొనసాగుతాయని స్పష్టం చేశారు. ఈ పేరు మార్పు వ్యూహాత్మక దేశాలపై ఎలాంటి ప్రభావం చూపుతుందో వేచి చూడాలి.
