పాక్ ప్రధానికి 21 మంది మాజీ కెప్టెన్ల లేఖ.
పాకిస్థాన్ మాజీ ప్రధాని, ప్రపంచకప్ విజేత కెప్టెన్ ఇమ్రాన్ ఖాన్ ఆరోగ్య పరిస్థితిపై అంతర్జాతీయ క్రికెట్ మాజీ కెప్టెన్లు స్పందించారు. ఇమ్రాన్కు సరైన వైద్య చికిత్స అందించడంతో పాటు ఆయన సంక్షేమాన్ని పరిరక్షించాలని పాకిస్థాన్ ప్రధాని షెహ్బాజ్ షరీఫ్ను కోరుతూ 21 మంది మాజీ కెప్టెన్లు లేఖ రాశారు. ఈ జాబితాలో భారత దిగ్గజాలు సునీల్ గవాస్కర్, కపిల్ దేవ్, దిలీప్ వెంగ్సర్కార్ ఉన్నారు. ఆస్ట్రేలియా మాజీ కెప్టెన్ గ్రెగ్ చాపెల్ ఈ ప్రయత్నానికి నేతృత్వం వహించారు. ఇమ్రాన్ ఖాన్ ప్రస్తుతం జైలులో ఉన్నారు.
స్వతంత్ర వైద్య పరీక్షలకు డిమాండ్
ఇమ్రాన్ ఖాన్ ఆరోగ్యంపై సుప్రీంకోర్టు ఆదేశించిన వైద్య బోర్డుతో స్వతంత్రంగా పరీక్షలు నిర్వహించాలని మాజీ కెప్టెన్లు కోరారు. ఆయనకు కుడి కంటిచూపు తగ్గినట్లు వస్తున్న వార్తల నేపథ్యంలో వ్యక్తిగత వైద్యులతో కూడిన వైద్య బృందాన్ని అనుమతించాలని విజ్ఞప్తి చేశారు. కుటుంబ సభ్యుల వారపు భేటీలను కూడా ఎలాంటి అంతరాయం లేకుండా కొనసాగించాలని కోరారు. వైద్య పరీక్షల్లో సూచించే చికిత్సను ఆలస్యం చేయకుండా అందించాలని లేఖలో స్పష్టం చేశారు. పాకిస్థాన్ అంతర్గత న్యాయ వ్యవహారాలపై తీర్పు చెప్పడం తమ ఉద్దేశం కాదని, కోర్టు ఆదేశించిన వైద్య ప్రక్రియను అమలు చేయడం మానవత్వానికి సంబంధించిన కనీస బాధ్యత అని మాజీ కెప్టెన్లు పేర్కొన్నారు.
#ImranKhan #ImranKhanHealth #ShehbazSharif #SunilGavaskar #KapilDev #DilipVengsarkar #GregChappell #Pakistan #PakistanCricket #CricketLegends #FormerCaptains #ImranKhanMedical #CricketNews #WorldCricket
