ప్రభుత్వ మెడికల్ విద్యకు ఊతం.
ఆంధ్రప్రదేశ్లో ప్రభుత్వ మెడికల్ కళాశాలల్లో చేరాలనుకునే విద్యార్థులకు శుభవార్త అందింది. జాతీయ వైద్య కమిషన్ (ఎన్ఎంసీ) మరో 175 ఎంబీబీఎస్ సీట్లకు అనుమతి ఇచ్చింది. దీంతో ఈ ఏడాది కొత్తగా మంజూరైన ఎంబీబీఎస్ సీట్ల సంఖ్య 325కు చేరింది. రాష్ట్రంలో ప్రభుత్వ వైద్య విద్య విస్తరణకు ఇది కీలక అడుగుగా ప్రభుత్వం భావిస్తోంది.
పిడుగురాళ్లకు 100.. విజయవాడకు 75
ఎన్ఎంసీ తాజాగా పిడుగురాళ్ల ప్రభుత్వ వైద్య కళాశాలకు 2026–27 విద్యా సంవత్సరం నుంచి 100 ఎంబీబీఎస్ సీట్లను మంజూరు చేసింది. విజయవాడలోని సిద్ధార్థ మెడికల్ కళాశాలకు అదనంగా 75 సీట్లు కేటాయించింది. ఈ రెండు కళాశాలలకు సంబంధించిన అనుమతి పత్రాలను ఎన్ఎంసీ సోమవారం జారీ చేసింది. దీంతో వచ్చే విద్యా సంవత్సరం నుంచి కొత్త సీట్లలో ప్రవేశాలు చేపట్టనున్నారు. ఇప్పటికే కడప, నెల్లూరు, పాడేరు ప్రభుత్వ మెడికల్ కళాశాలలకు కూడా అదనపు ఎంబీబీఎస్ సీట్లను ఎన్ఎంసీ మంజూరు చేసింది. తాజాగా ప్రకటించిన 175 సీట్లతో కలిపి ఈ ఏడాది మొత్తం 325 కొత్త సీట్లు రాష్ట్రానికి లభించాయి. రాష్ట్ర ప్రభుత్వం చేసిన ప్రయత్నాలకు ఇది ఫలితమని వైద్య ఆరోగ్య శాఖ వెల్లడించింది.
విద్యార్థులకు భారీ ప్రయోజనం
టీడీపీ నేతృత్వంలోని ఎన్డీయే ప్రభుత్వం అధికారంలోకి వచ్చిన తర్వాత ఇప్పటివరకు మొత్తం 505 కొత్త ఎంబీబీఎస్ సీట్లు రాష్ట్రానికి లభించాయి. తాజా పెంపుతో ఆంధ్రప్రదేశ్లో మొత్తం ఎంబీబీఎస్ సీట్ల సంఖ్య 7,090కు చేరుకుంది. ప్రభుత్వ మెడికల్ కళాశాలల్లో మరిన్ని అవకాశాలు అందుబాటులోకి రావడంతో ఆర్థికంగా వెనుకబడిన కుటుంబాలకు చెందిన విద్యార్థులకు పెద్ద ఊరట లభించనుంది. కొద్దిపాటి ర్యాంకు తేడాతో గతంలో ప్రభుత్వ సీట్లు కోల్పోయిన వారికి కూడా ఇప్పుడు వైద్య విద్యలో ప్రవేశించే అవకాశం పెరగనుంది. దీంతో ఖరీదైన ప్రైవేట్ మెడికల్ కళాశాలలపై ఆధారపడాల్సిన అవసరం గణనీయంగా తగ్గే అవకాశముందని ప్రభుత్వం అభిప్రాయపడుతోంది.
