రాష్ట్ర రాజకీయాల్లో వైఎస్సార్సీపీకి ఎదురైన ఘోర పరాజయం తర్వాత కూడా ఆ పార్టీ అధినేత వైఎస్ జగన్ వెనక్కి తగ్గే ప్రసక్తే లేదన్న సంకేతాలు ఇస్తున్నారు. ఒకప్పుడు రోడ్డెక్కితే జనసందోహంతో ట్రాఫిక్ స్తంభించే స్థాయిలో జనాకర్షణ కలిగిన నేతగా ఎదిగిన జగన్.. 2024 ఎన్నికల్లో పార్టీని కేవలం 11 అసెంబ్లీ స్థానాలకే పరిమితం చేయడం రాజకీయంగా సంచలనమే. అయితే ఓటమి తర్వాత కూడా వైఎస్సార్సీపీకి దాదాపు 40 శాతం ఓటు బ్యాంకు ఉండటం ఆ పార్టీకి ఉన్న అసలు బలం. అదే బలాన్ని స్థానిక సంస్థల ఎన్నికల్లో తిరిగి నిరూపించుకోవాలన్న లక్ష్యంతో జగన్ వ్యూహాలకు పదును పెడుతున్నట్లు కనిపిస్తోంది. అధికారం దూరమైనా.. పోరాటం మాత్రం ఆగదన్న సంకేతాన్ని తాజా పరిణామాలు స్పష్టం చేస్తున్నాయి.
నాయకులందరూ రోడ్డుపైకి రావాల్సిందే
ఇక పార్టీని కేవలం ప్రకటనలతో నడిపించే పరిస్థితి లేదని జగన్ ఇప్పటికే నేతలకు స్పష్టమైన సందేశం ఇచ్చినట్లు తెలుస్తోంది. దమ్ము, ధైర్యం ఉండాలి.. ప్రత్యర్థులను ఎదుర్కొనే సత్తా ఉండాలి.. ఒత్తిళ్లకు తలొగ్గకుండా పార్టీ కోసం నిలబడే నాయకత్వం కావాలన్నది ఆయన తాజా వైఖరిగా కనిపిస్తోంది. పార్టీకి కష్టకాలం వచ్చినప్పుడు పక్కకు తప్పుకునే వారికి చోటు లేదని, క్షేత్రస్థాయిలో నిలబడి పోరాడగలిగిన వారే ముందుండాలని జగన్ పదేపదే చెబుతున్నారు. అంటే స్థానిక పోరును ఆయన కేవలం ఎన్నికగా కాకుండా.. వైఎస్సార్సీపీ భవిష్యత్తుకు జరిగే రాజకీయ పరీక్షగా చూస్తున్నారన్నది స్పష్టమవుతోంది.
ఎన్నికలకు సన్నద్ధమన్న భావన
ఈ నేపథ్యంలో ఈనెల 25న తాడేపల్లి కేంద్ర కార్యాలయంలో జరగనున్న కీలక సమావేశానికి ప్రాధాన్యం పెరిగింది. మొత్తం 175 నియోజకవర్గాలకు చెందిన ముఖ్య నేతలు, 11 మంది ఎమ్మెల్యేలు, ఇంచార్జ్లు, కోఆర్డినేటర్లతో జగన్ నేరుగా భేటీ కానున్నారు. ఇప్పటికే కూటమి పక్షాలు స్థానిక సంస్థల ఎన్నికలపై తమదైన రీతిలో సమావేశాలు నిర్వహించుకుని వ్యూహాలను సిద్ధం చేసుకుంటున్నాయి. ఎవరి స్థాయిలో వారు స్వరం వినిపిస్తూ క్షేత్రస్థాయి సమీకరణాలపై దృష్టి పెట్టారు. ఇప్పుడు జగన్ నిర్వహించే సమావేశం ద్వారా వైఎస్సార్సీపీ కూడా తన ఎన్నికల యంత్రాంగాన్ని కదిలించేందుకు సిద్ధమవుతోంది. నియోజకవర్గాల వారీగా బలాబలాలు, అభ్యర్థుల ఎంపిక, ప్రత్యర్థులను ఎదుర్కొనే వ్యూహాలపై స్పష్టత వచ్చే అవకాశం ఉంది.
అన్ని చోట్ల బరిలోకి దిగాల్సిందే!
ఆరు నూరైనా అన్ని స్థానాల్లో పోటీ చేయాలన్న పట్టుదలతో వైఎస్సార్సీపీ ముందుకు సాగుతున్నట్లు తెలుస్తోంది. ఓటమి తర్వాత పార్టీ బలహీనపడిందన్న ప్రచారానికి స్థానిక ఎన్నికల ద్వారా సమాధానం చెప్పాలని జగన్ భావిస్తున్నారన్నది రాజకీయ వర్గాల అంచనా. 40 శాతం ఓటు బ్యాంకు కాగితాలపై ఉన్న సంఖ్య మాత్రమేనా.. లేక ఇప్పటికీ క్షేత్రస్థాయిలో జగన్కు ఉన్న రాజకీయ బలమా అన్నది తేల్చే తొలి పరీక్ష ఇదే. 175 నియోజకవర్గాల నేతలను ఒకే వేదికపైకి తీసుకురావడం ద్వారా జగన్ పార్టీకి ఒకటే సందేశం ఇవ్వబోతున్నట్లు కనిపిస్తోంది—అధికారం పోయినా పోరాటం పోదు.. సీట్లు తగ్గినా పట్టుదల తగ్గదు.. ప్రత్యర్థులు ఎంత బలంగా ఉన్నా వెనక్కి తగ్గేది లేదనే! స్థానిక పోరు వైఎస్సార్సీపీకి ఇప్పుడు కేవలం ఎన్నిక కాదు.. రాజకీయ పునరాగమనానికి తొలి అడుగు.
#YSJagan #JaganMohanReddy #YSRCP #AndhraPradeshPolitics #APPolitics #LocalBodyElections #APLocalElections #YSRCP #JaganStrategy #YSRCPComback #YSRCPLeaders #Tadepalli #175Constituencies #YSRCPVoteBank #PoliticalNews #APPoliticalNews #Jagan #YSRCP2026
