బీకేర్‌ఫుల్… ప్రజల్లోకి వెళ్లండి.. వెనకబడిపోతున్నారు.. సీఎం క్లాస్

వివాదాల రాజకీయాలకు తావివ్వొద్దు.
మంత్రులకు తేల్చి చెప్పిన సీఎం.

ముఖ్యమంత్రి నారా చంద్రబాబు నాయుడు మంత్రులకు కీలక సూచనలు చేశారు. ప్రభుత్వం చేపడుతున్న సంక్షేమ, అభివృద్ధి కార్యక్రమాలను ప్రజల్లోకి బలంగా తీసుకెళ్లాలని ఆదేశించారు. ప్రభుత్వ విజయాలను ప్రజలకు సమర్థంగా వివరించడంలో కొంత వెనుకబడ్డారని అసంతృప్తి వ్యక్తం చేశారు. రెండేళ్ల పాలన పూర్తైన సందర్భంగా మీడియా సమావేశాలు నిర్వహించడం మాత్రమే సరిపోదని, ప్రతి గ్రామం, ప్రతి నియోజకవర్గంలో ప్రజలతో నేరుగా మమేకం కావాలని సూచించారు. ప్రజల విశ్వాసాన్ని మరింత బలోపేతం చేయాలంటే క్షేత్రస్థాయిలో చురుకుగా పనిచేయాలని మంత్రులకు స్పష్టం చేశారు.

వైసీపీపై విమర్శలు

మంత్రివర్గ సమావేశంలో వైఎస్‌ఆర్‌సీపీ తీరుపై చంద్రబాబు తీవ్ర విమర్శలు చేశారు. ప్రభుత్వ నిర్ణయాలపై ఉద్దేశపూర్వకంగా వివాదాలు సృష్టించే ప్రయత్నం చేస్తోందని ఆరోపించారు. మెగా డీఎస్సీ నియామకాలను ఢిల్లీలో జరుగుతున్న నీట్‌ ఉద్యమంతో ముడిపెట్టడం రాజకీయ ప్రయోజనాల కోసమేనని వ్యాఖ్యానించారు. ప్రజల్లో గందరగోళం సృష్టించడమే ప్రతిపక్ష లక్ష్యమని పేర్కొన్నారు. అలాంటి ప్రచారాన్ని మంత్రులు సమర్థంగా తిప్పికొట్టాలని సూచించారు.

శాఖలపై పూర్తి బాధ్యత తీసుకోండి

ప్రతి మంత్రి తన శాఖపై పూర్తి బాధ్యతతో పనిచేయాలని ముఖ్యమంత్రి ఆదేశించారు. శాఖల్లో పెండింగ్‌లో ఉన్న సమస్యలను వేగంగా పరిష్కరించాలని చెప్పారు. నిషేధిత జాబితా నుంచి భూములను తొలగించడం వంటి కీలక నిర్ణయాలను ప్రజలకు వివరించాలని సూచించారు. ప్రభుత్వం తీసుకునే ప్రతి నిర్ణయం వెనుక ఉన్న ఉద్దేశాన్ని ప్రజలకు అర్థమయ్యేలా చెప్పాలని ఎమ్మెల్యేలు, మంత్రులకు దిశానిర్దేశం చేశారు.

జిల్లాల్లో సమన్వయానికి ప్రాధాన్యం

జిల్లా ఇన్‌చార్జి మంత్రులు, కలెక్టర్లు సమన్వయంతో పనిచేయాలని చంద్రబాబు అన్నారు. సంయుక్తంగా క్షేత్రస్థాయి పర్యటనలు నిర్వహిస్తే స్థానిక సమస్యలకు త్వరగా పరిష్కారం లభిస్తుందని తెలిపారు. పాలనలో వేగం పెరగాలంటే అధికారులు, ప్రజాప్రతినిధుల మధ్య సమన్వయం తప్పనిసరి అని చెప్పారు. అభివృద్ధి పనుల అమలును ఎప్పటికప్పుడు పర్యవేక్షించాలని సూచించారు.

లోకేశ్‌ను ఆదర్శంగా చూపిన సీఎం

మంగళగిరిలో లబ్ధిదారులకు ఇంటి స్థలాల పట్టాలు స్వయంగా పంపిణీ చేసిన మంత్రి నారా లోకేశ్‌ను చంద్రబాబు అభినందించారు. ప్రతి మంత్రి, ప్రతి ఎమ్మెల్యే ఇలాంటి ప్రజాకేంద్రిత కార్యక్రమాల్లో ప్రత్యక్షంగా పాల్గొనాలని సూచించారు. ప్రజలతో ప్రత్యక్ష సంబంధం పెంచుకోవడం ద్వారా ప్రభుత్వంపై విశ్వాసం మరింత బలపడుతుందని పేర్కొన్నారు.

సాంకేతికతతో నేరాల నియంత్రణ

పలాసలో మాజీ మంత్రి సీదిరి అప్పలరాజు కుమారుడి రోడ్డు ప్రమాదం, తిరుపతిలో ఆంజనేయస్వామి విగ్రహం చోరీ ఘటనలను ప్రస్తావించిన చంద్రబాబు, సీసీటీవీ నిఘా ద్వారా నిందితులను వేగంగా గుర్తించగలిగామని చెప్పారు. పోలీసింగ్‌లో సాంకేతికత వినియోగం మరింత పెంచాలని సూచించారు. ప్రభుత్వం తీసుకుంటున్న ప్రతి నిర్ణయం ప్రజలకు చేరేలా చూడటంతో పాటు ప్రతిపక్షాల రాజకీయ విమర్శలకు వాస్తవాలతో సమాధానం ఇవ్వాలని మంత్రులకు చంద్రబాబు స్పష్టం చేశారు.