నియోజకవర్గాల పెంపు అనివార్యం
పునర్విభజన ప్రజాస్వామ్య అవసరం
నియోజకవర్గాల పునర్విభజన, డీలిమిటేషన్ అంశంపై కాంగ్రెస్ ఎంపీ శశి థరూర్ చేసిన వ్యాఖ్యలకు ఆంధ్రప్రదేశ్ ఐటీ శాఖ మంత్రి, టీడీపీ జాతీయ ప్రధాన కార్యదర్శి నారా లోకేశ్ సోషల్ మీడియా వేదికగా ఘాటుగా బదులిచ్చారు. జనాభా ఆధారంగా లోక్సభ స్థానాల కేటాయింపు జరగాలని రాజ్యాంగంలోని ఆర్టికల్ 81 స్పష్టం చేస్తోందని ఆయన గుర్తు చేశారు. 1971 జనాభా లెక్కల ఆధారంగా అప్పట్లో విధించిన తాత్కాలిక నిబంధన గడువు ముగిసిందని వివరించారు. ఎలాంటి జోక్యం చేసుకోకుండా కేవలం కొత్త జనాభా లెక్కల ఆధారంగానే విభజన చేస్తే.. జనాభాను నియంత్రించిన దక్షిణాది రాష్ట్రాలు లోక్సభలో తమ స్థానాలను భారీగా కోల్పోయే ప్రమాదం ఉందని ఆందోళన వ్యక్తం చేశారు. గతంలో ఈ బిల్లును వ్యతిరేకించిన కాంగ్రెస్ పార్టీయే ఇందుకు బాధ్యత వహించాలని విమర్శించారు.
పెరిగిన జనాభాకు తగ్గట్టుగా ప్రాతినిధ్యం
భారతదేశ జనాభా 1971 లో కేవలం 55 కోట్లుగా ఉంటే.. ప్రస్తుతం అది దాదాపు 146 కోట్లకు చేరుకుందని లోకేశ్ పేర్కొన్నారు. జనాభా ఇంతగా పెరిగినప్పటికీ లోక్సభ స్థానాల సంఖ్య మాత్రం అలాగే ఉండిపోయిందని ఆవేదన వ్యక్తం చేశారు. దీనివల్ల నాడు ఒక ఎంపీ ప్రాతినిధ్యం వహించిన జనాభా కంటే.. ఇప్పుడు ఒక ఎంపీ దాదాపు రెండున్నర రెట్లు ఎక్కువ మంది పౌరులకు ప్రాతినిధ్యం వహించాల్సి వస్తోందని చెప్పారు. లోక్సభ స్థానాల సంఖ్యను పెంచడం అనేది ఒక రాజకీయ ఎంపిక కాదు, అది ప్రజాస్వామ్యానికి అత్యంత అవసరమైన ప్రక్రియ అని ఆయన స్పష్టం చేశారు.
దక్షిణాది రాష్ట్రాల ప్రయోజనాలకు రక్షణ
ప్రస్తుత జనాభాకు అనుగుణంగా లోక్సభ సీట్లను పెంచే సమయంలో.. అన్ని రాష్ట్రాల ప్రస్తుత నిష్పత్తి వాటాను అలాగే కొనసాగించడం చాలా సరైన పద్ధతి అని లోకేశ్ అభిప్రాయపడ్డారు. ఈ సమతుల్య విధానం వల్ల జనాభాను బాధ్యతాయుతంగా నియంత్రించిన దక్షిణాది రాష్ట్రాలకు ఎలాంటి అన్యాయం జరగదని, అదే సమయంలో దేశంలోని ప్రజలందరికీ సమాన ప్రాతినిధ్యం లభిస్తుందని వివరించారు. ఏ రాష్ట్రానికి కూడా ఒక ఓటరుకు ఎక్కువ ప్రాతినిధ్యం ఉండాలనే రాజ్యాంగ హక్కు లేదని, ప్రతి పౌరుడి ఓటుకు సమాన విలువ ఉండాలన్నదే రాజ్యాంగ ముఖ్య ఉద్దేశమని ఆయన స్పష్టం చేశారు.
కాంగ్రెస్ డబుల్ స్టాండర్ట్స్పై విమర్శలు
కాంగ్రెస్ పార్టీకి చెందిన సీనియర్ నాయకుడు, మాజీ రాష్ట్రపతి ప్రణబ్ ముఖర్జీ గతంలో దేశ ప్రజలకు మెరుగైన ప్రాతినిధ్యం అందించడానికి లోక్సభ సభ్యుల సంఖ్యను 1000 కి పెంచాలని స్పష్టంగా చెప్పిన విషయాన్ని లోకేశ్ గుర్తు చేశారు. నాడు ప్రణబ్ ముఖర్జీ చెప్పిన మాట తప్పు అని కాంగ్రెస్ భావిస్తోందా? లేదా దేశ ప్రయోజనాల కంటే రాజకీయాలకే కాంగ్రెస్ ఎక్కువ ప్రాధాన్యత ఇస్తూ తన నిర్ణయాన్ని మార్చుకుందా? అని ఆయన ప్రశ్నించారు. ఎన్డీఏ ప్రభుత్వం బాధ్యతాయుతంగా వ్యవహరించిన రాష్ట్రాలకు నష్టం జరగకుండా చూస్తోందని, నిష్పత్తి ప్రకారం సీట్లు పెరిగినప్పుడు ఎవరికీ అదనపు ప్రయోజనం ఉండదని లోకేశ్ స్పష్టం చేశారు.
