ఏడేళ్ల తర్వాత ఢిల్లీకి చైనా అధ్యక్షుడు.
దౌత్యంతో వ్యాపారం బంధం బలపడేనా?
చైనా అధ్యక్షుడు షీ జిన్పింగ్ ఏడేళ్ల తర్వాత భారత్లో పర్యటించనున్న నేపథ్యంలో ఇరుదేశాల సంబంధాల్లో కొత్త మార్పులపై ఆసక్తి నెలకొంది. బ్రిక్స్ సదస్సు కోసం ఢిల్లీకి రానున్న షీతో ప్రధాని నరేంద్ర మోదీ భేటీ కీలకంగా మారనుంది. 1962 యుద్ధం నుంచి కొనసాగుతున్న అనుమానాలకు 2020 సరిహద్దు ఘర్షణ మరింత బలం చేకూర్చింది. అయితే ఇటీవలి కాలంలో ఇరుదేశాల మధ్య దౌత్య సంబంధాలు కొంత మెరుగయ్యాయి. సరిహద్దు ఉద్రిక్తత తగ్గించడం, అమెరికాతో మారుతున్న వ్యూహాత్మక పరిస్థితులు ఈ సాన్నిహిత్యానికి కారణాలుగా కనిపిస్తున్నాయి. అయినా రాజకీయ స్థాయిలో కనిపిస్తున్న పురోగతి వ్యాపార సంబంధాల్లో మాత్రం ఇంకా ప్రతిబింబించలేదని విశ్లేషకులు చెబుతున్నారు.
పెట్టుబడులకు ఇంకా అడ్డంకులే
2020 తర్వాత చైనా పెట్టుబడులపై భారత్ విధించిన ఆంక్షల్లో కొన్నింటిని మార్చిలో సడలించింది. ఎలక్ట్రానిక్స్, క్యాపిటల్ గూడ్స్, సౌర విద్యుత్ రంగాల్లో పెట్టుబడులకు మార్గం కొంత సులభమైంది. డిక్సన్ టెక్నాలజీస్, వివో మధ్య తయారీ భాగస్వామ్యానికి అనుమతి లభించింది. అయినా బీవైడీ, గ్రేట్ వాల్ మోటార్ వంటి కీలక చైనా సంస్థలు భారత్లో నిలిపివేసిన పెట్టుబడులను తిరిగి ప్రారంభించలేదు. అలీపేను భారత తక్షణ చెల్లింపుల వ్యవస్థతో అనుసంధానించే ప్రతిపాదనను జాతీయ భద్రతా కారణాలతో భారత్ ఆమోదించలేదు. షియోమీపై వ్యాపార నిబంధనల ఉల్లంఘన ఆరోపణలతో విచారణ అంశం కూడా కొనసాగుతోంది. మరోవైపు చైనా నుంచి సౌర, ఎలక్ట్రానిక్స్, మౌలిక వసతులకు అవసరమైన పరికరాల రాకలో ఆలస్యం సమస్యగా మారింది.
నమ్మకం పెరిగితేనే వాణిజ్య బంధం
చైనాలోని అధికారుల నుంచి కూడా భారత్కు కీలక సాంకేతికత, పోర్టు పరికరాలు, సౌర ప్యానెళ్లు, మొబైల్ తయారీ పరికరాల విక్రయంపై ఆంక్షలు ఉన్నాయనే ఆరోపణలు వినిపిస్తున్నాయి. కొన్ని భారీ మౌలిక వసతుల ప్రాజెక్టులకు అవసరమైన చైనా యంత్రాలు ఏడాదికి పైగా కస్టమ్స్లో నిలిచిపోయినట్లు భారత వర్గాలు చెబుతున్నాయి. గత ఏడాది ప్రత్యక్ష విమానాలు పునఃప్రారంభమైనా, కొందరు భారత వ్యాపారవేత్తలకు చైనా వీసాల విషయంలో ఇబ్బందులు ఎదురవుతున్నాయి. దీంతో ఇరుదేశాల మధ్య ‘నమ్మకం లోటు’ ఇంకా ప్రధాన సమస్యగానే ఉంది. షీ–మోదీ భేటీ సానుకూలంగా జరిగితే పెట్టుబడులు, వీసాలు, సాంకేతిక పరికరాలు, వాణిజ్య అడ్డంకులపై చర్చకు మార్గం తెరుచుకోవచ్చు. అయితే దౌత్య సంబంధాలు మెరుగుపడటం ఒక్కటే సరిపోదని, పరస్పర ఆర్థిక ప్రయోజనాలకు అనుగుణంగా నమ్మకాన్ని పునర్నిర్మిస్తేనే భారత్-చైనా వ్యాపార బంధం బలపడుతుందని నిపుణుల అభిప్రాయం.
#XiJinping #XiJinpingIndiaVisit #XiJinpingIndia #IndiaChina #IndiaChinaRelations #IndiaChinaTrade #IndiaChinaBusiness #NarendraModi #ModiXiMeeting #BRICS #BRICSSummit #ChinaIndiaDiplomacy #IndiaChinaBorder #BorderTensions #ChineseInvestments #IndiaInvestments #BYD #GreatWallMotor #Vivo #DixonTechnologies #Xiaomi #TradeRelations #EconomicRelations #TrustDeficit #IndiaNews #ChinaNews
