ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ పార్టీ బలోపేతం కోసం ఒక కీలక నిర్ణయం తీసుకున్నారు. జనసేన పార్టీలో చేరికలను సమన్వయం చేయడానికి ఒక ప్రత్యేక జాయినింగ్స్ కమిటీని ఏర్పాటు చేశారు. ఇతర పార్టీల నాయకులు, విద్యావంతులు, సామాజికవేత్తలు, తటస్థులు జనసేనలో చేరడానికి ఆసక్తి చూపిస్తున్నారు. అలాంటి వారందరినీ పార్టీలోకి ఆహ్వానించడానికి, వారితో మాట్లాడటానికి ఈ కమిటీ పని చేస్తుంది.
14 మందితో జాయినింగ్స్ కమిటీ
ఈ ప్రత్యేక కమిటీలో మొత్తం 14 మంది సభ్యులను నియమించారు. ఇందులో ప్రముఖ ఎమ్మెల్యేలు బొలిశెట్టి శ్రీనివాస్, వంశీకృష్ణ శ్రీనివాస్, పంతం నానాజీ ఉన్నారు. వీరితో పాటు ఎంపీ లింగమనేని రమేశ్, మాజీ మంత్రి బాలినేని శ్రీనివాసరెడ్డి, మాజీ ఎమ్మెల్యేలు కిలారి రోశయ్య, సామినేని ఉదయభాను సభ్యులుగా ఉంటారు. సీనియర్ నాయకులు కొటికలపూడి చినబాబు, డాక్టర్ హరిప్రసాద్, డాక్టర్ పెదపూడి విజయ్ కుమార్, కొరికాన రవికుమార్, వంపూరు గంగులయ్య, టీసీ వరుణ్, ఆరణి మదన్ ఈ కమిటీలో భాగస్వామ్యులయ్యారు.
ఢిల్లీ పర్యటన తర్వాత దిశానిర్దేశం
తన ఢిల్లీ పర్యటన ముగిసిన తర్వాత ఈ కమిటీ సభ్యులతో పవన్ కల్యాణ్ ఒక ప్రత్యేక సమావేశాన్ని ఏర్పాటు చేయనున్నారు. ఆ సమావేశంలో పార్టీ చేరికల ప్రక్రియపై నాయకులకు ఆయన దిశానిర్దేశం చేస్తారు. ఆంధ్రప్రదేశ్ తరహాలోనే రాబోయే రోజుల్లో తెలంగాణలో కూడా జాయినింగ్స్ కమిటీని నియమించడానికి సన్నాహాలు చేస్తున్నట్లు పవన్ కల్యాణ్ స్పష్టం చేశారు. ఈ నిర్ణయం పార్టీ శ్రేణుల్లో కొత్త ఉత్సాహాన్ని నింపింది.
