కూటమి రాజకీయాల్లో భూకంపం
తమిళనాడు రాజకీయాలు ఒక్కసారిగా వేడెక్కాయి. లోక్సభ ప్రతిపక్ష నాయకుడు రాహుల్ గాంధీపై ద్రావిడ మున్నేట్ర కజగం తీవ్రస్థాయిలో విమర్శల దాడికి దిగింది. రాహుల్ గాంధీని ఒక పెద్ద జోక్ అంటూ డీఎంకే ఐటీ వింగ్ సామాజిక మాధ్యమాల్లో ఘాటుగా ఎద్దేవా చేసింది. విపక్షాల ఇండియా కూటమిలో ఐక్యతను దెబ్బతీయడానికి రాహుల్ గాంధీ తీసుకుంటున్న అనాలోచిత నిర్ణయాలే కారణమని డీఎంకే అధికారిక పత్రిక ‘మురసోలి’ తన సంపాదకీయంలో ఆరోపించింది. కాంగ్రెస్ పార్టీ అనుసరిస్తున్న రాజకీయ విధానాలు పొత్తుల ధర్మానికి విరుద్ధంగా ఉన్నాయని స్పష్టం చేసింది.
ఎన్నికల ముగిశాక కాంగ్రెస్ ద్రోహం
తమిళనాడులో ఇటీవల జరిగిన అసెంబ్లీ ఎన్నికల్లో డీఎంకే నేతృత్వంలోని కూటమిలో భాగంగా కాంగ్రెస్ పోటీ చేసి ఐదు స్థానాలను గెలుచుకుంది. అయితే ఎన్నికల ఫలితాలు రాగానే కాంగ్రెస్ పార్టీ డీఎంకేకు పెద్ద హ్యాండ్ ఇచ్చింది. నటుడు విజయ్ నేతృత్వంలోని టీవీకే, ప్రభుత్వంలో భాగస్వామిగా చేరింది. కాంగ్రెస్ ఉనికి కోసం కొట్టుమిట్టాడుతున్న సమయంలో తాము భుజాలపై మోసి గెలిపిస్తే, కొత్త లాభం కనిపించగానే కూటమిని వీడి వెళ్లిపోయారని డీఎంకే మండిపడింది. ఈ స్వార్ధపూరిత నిర్ణయం కాంగ్రెస్ కేంద్ర నాయకత్వం పూర్తి ఆమోదంతోనే జరిగిందని డీఎంకే నాయకులు ఆగ్రహం వ్యక్తం చేస్తున్నారు.
ఇతర రాష్ట్రాల కూటమిలో అసంతృప్తి
కాంగ్రెస్ పార్టీ నైజం కేవలం తమిళనాడులోనే కాకుండా ఇతర రాష్ట్రాల్లోనూ కూటమి భాగస్వాములకు నష్టం చేకూర్చేలా ఉందని మురసోలి పత్రిక గుర్తుచేసింది. కేరళ ఎన్నికల ప్రచారంలో రాహుల్ గాంధీ అక్కడి ముఖ్యమంత్రి పినరయి విజయన్ను అరెస్ట్ చేయాలని డిమాండ్ చేయడం, ఎడమపక్షాలకు బీజేపీతో రహస్య ఒప్పందం ఉందని ఆరోపించడంపై కమ్యూనిస్ట్ నాయకులు తీవ్ర అభ్యంతరం వ్యక్తం చేశారు. కాంగ్రెస్ పార్టీకి దేశంలో ప్రధాన శత్రువైన బీజేపీని ఎదిరించడం కంటే తమ సొంత కూటమి భాగస్వాములను దెబ్బతీయడమే ఎక్కువ ఆసక్తిగా ఉందా అని లెఫ్ట్ పార్టీల నేతలు ప్రశ్నించిన విషయాన్ని డీఎంకే తన వ్యాసంలో ప్రత్యేకంగా ప్రస్తావించింది.
జాతీయ స్థాయి సమావేశాల బహిష్కరణ
ఈ ఘర్షణ వాతావరణం కారణంగా జాతీయ స్థాయిలో డీఎంకే, కాంగ్రెస్ మధ్య సంబంధాలు పూర్తిగా దెబ్బతిన్నాయి. ఇటీవల కాంగ్రెస్ ఆధ్వర్యంలో జరిగిన ఇండియా కూటమి సమావేశాన్ని డీఎంకే బహిష్కరించి తన నిరసనను తెలిపింది. కాంగ్రెస్ పిలిచిన సమావేశాలకు తాము హాజరుకాబోమని, అయితే ఇతర విపక్షాలు లేవనెత్తే ప్రజా సమస్యలకు తమ మద్దతు ఎప్పుడూ కొనసాగుతుందని డీఎంకే ప్రకటించింది. రాహుల్ గాంధీ ఒకవైపు విపక్షాల ఐక్యత గురించి పెద్ద పెద్ద ఉపన్యాసాలు ఇస్తూ, మరోవైపు వివిధ రాష్ట్రాలలో ప్రాంతీయ పార్టీల అధికార అవకాశాలను దెబ్బతీస్తున్నారని సమాజ్వాదీ పార్టీ, లెఫ్ట్ పార్టీల విమర్శలను ఉటంకిస్తూ డీఎంకే ఎండగట్టింది. ప్రతిపక్షాల కూటమిలో అమృతాన్ని అందిస్తారని ఆశిస్తే రాహుల్ గాంధీ తన రాజకీయ అపరిపక్వతతో విషాన్ని నింపుతున్నారని డీఎంకే తీవ్రమైన పదజాలంతో విమర్శించింది. డీఎంకే చేసిన ఈ ఘాటు ఆరోపణలపై కాంగ్రెస్ అధిష్టానం ఇంకా అధికారికంగా స్పందించలేదు.
