తప్పుల తడకగా నివేదిక ఏఐతో పరువు పోగొట్టుకున్న పీడబ్ల్యూసీ

ప్రపంచంలోని ప్రముఖ కన్సల్టింగ్ సంస్థల్లో ఒకటైన పీడబ్ల్యూసీ (PwC) మరోసారి ఏఐ కారణంగా ఇబ్బందుల్లో పడింది. ఇటీవల విడుదల చేసిన నాలుగు ఏఐ నివేదికల్లో నకిలీ రిఫరెన్స్‌లు, పనిచేయని వెబ్ లింకులు, అసలు ఉనికిలో లేని పరిశోధన పత్రాల వివరాలు ఉన్నట్లు బయటపడింది. జీపీటీజీరో పరిశోధకుల విచారణలో ఈ లోపాలు వెలుగులోకి వచ్చాయి.

లేనిపోని ఆధారాలతో నివేదికలు

వ్యాపార సంస్థలు, ప్రభుత్వాలకు ఏఐ, ఆటోనమస్ ఏజెంట్లు, ఎలక్ట్రిక్ వాహనాల భవిష్యత్తుపై సలహాలు ఇచ్చే ఉద్దేశంతో ఈ నివేదికలు రూపొందించారు. అయితే అందులో పేర్కొన్న కొన్ని ఆధారాలను పరిశీలిస్తే అవి అసలు లేవని తేలింది. కొన్నిచోట్ల నకిలీ ఫుట్‌నోట్లు, ధృవీకరించలేని సమాచారం కనిపించింది. ఒక రిఫరెన్స్ లింక్‌లో “utm_source=chatgpt.com” అనే పదం కనిపించడం మరింత చర్చకు దారితీసింది. మరోచోట ఏఐ విజయగాథకు ఆధారంగా కొద్దిమంది అనుచరులు మాత్రమే ఉన్న ఓ యువ బ్లాగర్ వ్యాసాన్ని చూపించినట్లు పరిశోధకులు గుర్తించారు. దీంతో నివేదికల విశ్వసనీయతపై ప్రశ్నలు తలెత్తాయి.

గతంలో కేపీఎంజీ, ఈవైకూ ఇదే పరిస్థితి

ఇంతకుముందు కేపీఎంజీ, ఈవై సంస్థలు కూడా ఏఐ రూపొందించిన తప్పుదోవ పట్టించే సమాచారం కారణంగా నివేదికలను వెనక్కి తీసుకున్నాయి. ఇప్పుడు అదే జాబితాలో పీడబ్ల్యూసీ చేరింది. ఏఐ ఉపయోగంలో మానవ పర్యవేక్షణ ఎంత అవసరమో ఈ ఘటన మరోసారి స్పష్టం చేసింది. ఈ అంశంపై స్పందించిన పీడబ్ల్యూసీ, పరిమిత సంఖ్యలో ఉన్న రిఫరెన్స్‌లను సవరిస్తున్నామని తెలిపింది. తమ పరిశోధనల ఖచ్చితత్వానికి అత్యంత ప్రాధాన్యం ఇస్తామని వెల్లడించింది. అయినప్పటికీ ఖాతాదారులకు ఏఐ వినియోగంపై సలహాలు ఇచ్చే సంస్థలే ఏఐ తప్పిదాలకు బలవడం ఇప్పుడు ప్రపంచవ్యాప్తంగా చర్చనీయాంశంగా మారింది.

#PwC #PricewaterhouseCoopers #AI #ArtificialIntelligence #AIReports #AIErrors #AIHallucinations #FakeReferences #FakeCitations #BrokenLinks #GPTZero #AIConsulting #TechnologyNews #KPMG #EY #AIAccuracy #HumanOversight #BusinessNews #TechNews