ఎర్రచందనం అక్రమ రవాణా ముఠాలకు సహకరించే వారిని ఎట్టి పరిస్థితుల్లోనూ ఉపేక్షించబోమని ఉప ముఖ్యమంత్రి పవన్ కళ్యాణ్ స్పష్టం చేశారు. ఎర్రచందనం స్మగ్లింగ్ను పూర్తిగా అరికట్టేందుకు మరింత కఠినమైన చర్యలు తీసుకుంటామని తెలిపారు. అటవీ సంపదను కాపాడటంలో ఎలాంటి రాజీ ఉండదని హెచ్చరించారు. రాష్ట్రవ్యాప్తంగా అమలు చేస్తున్న ‘ఆపరేషన్ అరణ్య’ పురోగతిని తాను ఎప్పటికప్పుడు సమీక్షిస్తానని వెల్లడించారు.
రూ.1.5 కోట్ల ఎర్రచందనం స్వాధీనం
కడప జిల్లా అవధూత కాశినాయన మండలం వరికుంట్ల గ్రామ సమీపంలోని జ్యోతి గుడి వద్ద జరిగిన భారీ పట్టివేతపై పవన్ కళ్యాణ్ అధికారులతో సమీక్ష నిర్వహించారు. ఈ ఆపరేషన్లో రూ.1.5 కోట్ల విలువైన 78 ఎర్రచందనం దుంగలను అధికారులు స్వాధీనం చేసుకున్నారు. అక్రమ రవాణాకు ఉపయోగించిన బొలెరో మ్యాక్స్ వాహనాన్ని కూడా స్వాధీనం చేసుకున్నారు. ఎర్రచందనం అక్రమ రవాణా నిరోధక దళం, స్టేట్ ఇంటెలిజెన్స్ బృందానికి అందిన కచ్చితమైన సమాచారం ఆధారంగా తెల్లవారుజామున తనిఖీలు నిర్వహించారు. ఇంటి సామగ్రి ముసుగులో ఎర్రచందనం దుంగలను తరలిస్తున్న హర్యానాకు చెందిన సన్నీ, రమేష్లను అదుపులోకి తీసుకున్నారు. వారిపై కేసు నమోదు చేసి విచారణ కొనసాగిస్తున్నట్లు అధికారులు వెల్లడించారు.
బీట్ ఆఫీసర్ పాత్రపై దర్యాప్తు
విచారణలో జ్యోతి ఫారెస్ట్ బీట్లో పనిచేస్తున్న బీట్ ఆఫీసర్ మల్లికార్జునుడు అక్రమ రవాణా ముఠాలకు సహకరిస్తున్నట్లు గుర్తించినట్లు అధికారులు తెలిపారు. వెంటనే అతడిని కూడా అరెస్టు చేసి విచారణ ప్రారంభించారు. ప్రభుత్వ ఉద్యోగి అక్రమాలకు పాల్పడటం అత్యంత తీవ్రమైన అంశమని భావిస్తున్నామని, అతడి పాత్రపై సమగ్ర దర్యాప్తు చేసి పూర్తి నివేదిక సమర్పించాలని పవన్ కళ్యాణ్ ఆదేశించారు. ఈ కేసు విచారణలో బెంగళూరు, హర్యానా, కోల్కతా ప్రాంతాలకు చెందిన మరికొందరు కీలక సూత్రధారుల పాత్ర వెలుగులోకి వచ్చినట్లు అధికారులు వివరించారు. వారిని గుర్తించి అరెస్టు చేయడానికి ప్రత్యేక బృందాలను వెంటనే రంగంలోకి దించాలని పవన్ కళ్యాణ్ ఆదేశించారు. ఎర్రచందనం అక్రమ రవాణా నెట్వర్క్ను పూర్తిగా ఛేదించడమే ప్రభుత్వ లక్ష్యమని స్పష్టం చేశారు.
‘ఆపరేషన్ అరణ్య’ మరింత ముమ్మరం
ఎర్రచందనం అక్రమ రవాణాను అరికట్టేందుకు రాష్ట్ర ప్రభుత్వం మరింత దూకుడుగా ముందుకు సాగుతుందని పవన్ కళ్యాణ్ తెలిపారు. అక్రమ రవాణాకు సహకరించే అధికారులు, మధ్యవర్తులు, స్మగ్లర్లు ఎవరైనా చట్టం ముందు తప్పించుకోలేరని హెచ్చరించారు. అటవీ సంపదను కాపాడటంలో కఠిన చర్యలు కొనసాగుతాయని, ‘ఆపరేషన్ అరణ్య’ ద్వారా స్మగ్లింగ్ ముఠాలపై నిరంతర నిఘా కొనసాగిస్తామని స్పష్టం చేశారు.
#PawanKalyan #RedSanders #RedSandalwood #OperationAranya #Kadapa #ForestProtection #SmugglingCrackdown #AndhraPradesh #APGovernment #CrimeNews
