ఇథనాల్‌కి షుగర్ ధరలకు లింకేంటి? ఈ 20..కేంద్రంపై కాంగ్రెస్ ఫైర్

పెట్రోల్ పాలసీపై రివ్యూ డిమాండ్
వాహనం ఖర్చా.. వంటింటి ఖర్చా?

దేశంలో ఈ 20 పెట్రోల్ విధానంపై కాంగ్రెస్ మరోసారి కేంద్ర ప్రభుత్వాన్ని టార్గెట్ చేసింది. ఈ 20 విధానాన్ని వెంటనే సమీక్షించాలి, వినియోగదారులకు నాన్-ఎథనాల్ పెట్రోల్ ఎంపికను అందుబాటులో ఉంచాలని కాంగ్రెస్ డిమాండ్ చేసింది. పార్టీ కమ్యూనికేషన్స్ ఇన్‌ఛార్జ్ జైరాం రమేశ్ ఈ అంశంపై స్పందిస్తూ ప్రజలు రవాణా ఖర్చుతో పాటు ఆహార ధరల రూపంలోనూ భారం మోస్తున్నారని ఆరోపించారు. ఎథనాల్ తయారీ కోసం చెరకు, ఆహార ధాన్యాలను మళ్లించడం వల్ల ఆహార ధరలపై ప్రభావం పడుతోందని ఆయన పేర్కొన్నారు. ఒకవైపు వంటింటి ఖర్చులు పెరుగుతున్నాయి.. మరోవైపు వాహనాల మైలేజీ తగ్గుతోందన్న ఆందోళన ఉంది అని కాంగ్రెస్ వాదిస్తోంది. ముఖ్యంగా ఈ 20కు అనుకూలంగా డిజైన్ చేయని పాత వాహనాల్లో మైలేజీ, ఇంజిన్ అనుకూలతపై సమస్యలు రావచ్చని జైరాం రమేశ్ పేర్కొన్నారు.

చెరకు నుంచి ఎథనాల్.. ధరలపై ప్రభావమా?

ఈ 20 విధానం వల్ల చక్కెర ఉత్పత్తికి ఉపయోగించాల్సిన చెరకులో కొంత భాగం ఎథనాల్ తయారీ వైపు మళ్లుతోందని కాంగ్రెస్ ఆరోపించింది. జైరాం రమేశ్ ప్రస్తావించిన గణాంకాల ప్రకారం సుమారు 25 లక్షల టన్నుల చెరకు చక్కెర తయారీ నుంచి ఎథనాల్ ఉత్పత్తికి మళ్లించారని పేర్కొన్నారు. గత మూడు నెలల్లో చక్కెర ధర కిలో రూ.48 నుంచి రూ.67కు, బెల్లం ధర రూ.50 నుంచి రూ.65కు పెరిగిందని ఆయన తెలిపారు. అయితే ఈ ధరల పెరుగుదలకు ఈ 20 ఒక్కటే కారణమని చెప్పడం సరికాదన్న వాదన కూడా ఉంది. మరోవైపు అంతర్జాతీయంగా ముడి చమురు ధరలు తగ్గినా పెట్రోల్ ధరల్లో వినియోగదారులకు తగిన ప్రయోజనం కనిపించడం లేదని కాంగ్రెస్ ప్రశ్నించింది. పెట్రోల్‌లో ఎథనాల్ కలపడం వల్ల ప్రభుత్వానికి ఖర్చు తగ్గితే ఆ ప్రయోజనం వినియోగదారులకు ఎందుకు అందడం లేదని జైరాం రమేశ్ ప్రశ్నించారు.

పాత వాహనాలకు ఈ 10 ఇవ్వాలన్న సూచన

ఈ 20పై విమర్శలు పెరుగుతున్న సమయంలో ప్రభుత్వ ప్రధాన ఆర్థిక సలహాదారు వి. అనంత నాగేశ్వరన్ కూడా పాత వాహనాల కోసం ఈ 10 పెట్రోల్ అందుబాటులో ఉంచాలని సూచించారు. ఆహారం కోసం ఉపయోగించే పంటలు, ఇంధనం కోసం ఉపయోగించే పంటల మధ్య సమతుల్యత అవసరమని ఆయన అభిప్రాయపడ్డారు. కాంగ్రెస్ వర్కింగ్ కమిటీ కూడా ఈ 20 వల్ల మైలేజీ తగ్గడం, పాత వాహనాల అనుకూలత, వినియోగదారుల ఎంపిక తగ్గడం, పర్యావరణ ప్రభావం వంటి అంశాలపై ఆందోళన వ్యక్తం చేసింది. ఇంధన విధానం వల్ల వాహనం ఖర్చు పెరగకూడదు.. వంటింటి ఖర్చు కూడా పెరగకూడదన్నదే కాంగ్రెస్ ప్రధాన వాదన. మరోవైపు ఈ 20 వల్ల కాలుష్య నియంత్రణ, ఇంధన దిగుమతులపై ఆధారపడటం తగ్గడం వంటి ప్రయోజనాలను కేంద్రం ప్రోత్సహిస్తోంది. దీంతో ఇప్పుడు దేశంలో చర్చ కేవలం పెట్రోల్ ధరలపై కాకుండా ఆహారం వర్సెస్ ఇంధనం, వినియోగదారుడి ఎంపిక, వాహనాల అనుకూలత చుట్టూ సాగుతోంది.

#E20 #EthanolPolicy #SugarPrices #JairamRamesh #Congress #CongressOnE20 #EthanolBlending #Sugarcane #SugarPriceHike #PetrolPolicy #E10 #NonEthanolPetrol #OldVehicles #PetrolMileage #FoodPrices #FuelPolicy #IndiaNews #CentralGovernment