బంగాళాఖాతంలో ఏర్పడిన అల్పపీడనం వాయుగుండంగా బలపడటంతో తెలంగాణలో వచ్చే నాలుగు నుంచి ఐదు రోజుల పాటు విస్తారంగా వర్షాలు కురిసే అవకాశం ఉందని భారత వాతావరణ శాఖ వెల్లడించింది. ఉత్తర, తూర్పు తెలంగాణ జిల్లాలైన ఆదిలాబాద్, కుమురం భీం ఆసిఫాబాద్, నిర్మల్, మంచిర్యాల, జగిత్యాల, పెద్దపల్లి, ములుగు, భద్రాద్రి కొత్తగూడెం, ఖమ్మం, మహబూబాబాద్ జిల్లాల్లో ఉరుములు, మెరుపులతో కూడిన మోస్తరు నుంచి భారీ వర్షాలు కురిసే అవకాశం ఉందని తెలిపింది. నిజామాబాద్, కామారెడ్డి, సంగారెడ్డి, మెదక్, రంగారెడ్డి, సిద్ధిపేట, కరీంనగర్, హనుమకొండ, వరంగల్ సహా పలు జిల్లాల్లో విస్తారంగా వర్షాలు పడే అవకాశముందని పేర్కొంది. మిగతా ప్రాంతాల్లో తేలికపాటి నుంచి మోస్తరు వర్షాలు కురిసే సూచనలు ఉన్నాయని వెల్లడించింది.
భారీ వర్షాల కారణంగా లోతట్టు ప్రాంతాలు జలమయం కావడం, వాగులు, వంకలు పొంగిపొర్లడం, రహదారులపై నీరు నిలిచి రాకపోకలకు అంతరాయం ఏర్పడే అవకాశం ఉందని ఐఎండీ హెచ్చరించింది. అత్యవసర పరిస్థితులు మినహా వరద ప్రవాహాలు ఉన్న ప్రాంతాలకు వెళ్లవద్దని ప్రజలకు సూచించింది. ప్రస్తుతం వాయవ్య బంగాళాఖాతంలో ఏర్పడిన వాయుగుండం మరింత బలపడే అవకాశం ఉందని, జులై 31 వరకు రాష్ట్రవ్యాప్తంగా ఉరుములు, మెరుపులు, పిడుగులతో కూడిన వర్షాలు కొనసాగవచ్చని తెలిపింది. ఇదిలా ఉండగా జులై నెలలో రాష్ట్రంలో సాధారణంగా కురవాల్సిన 227.4 మిల్లీమీటర్ల వర్షపాతానికి బదులుగా 109.7 మిల్లీమీటర్లే నమోదై 43 శాతం లోటు వర్షపాతం నమోదైనట్లు హైదరాబాద్ వాతావరణ కేంద్రం వెల్లడించింది.
#TelanganaWeather #RainAlert #HeavyRains #BayOfBengal #WeatherForecast #IMD #TelanganaRainfall #Monsoon #HyderabadWeather #RainUpdate #FloodAlert #IndiaWeather #WeatherNews #BreakingNews #Telangana
