రాష్ట్రంలో 22ఏ నిషేధిత భూముల పేరుతో భారీగా అక్రమాలు జరుగుతున్నాయని కేంద్ర మంత్రి కిషన్ రెడ్డి ఆరోపించారు. హైదరాబాద్లో మీడియాతో మాట్లాడిన ఆయన భూభారతి పోర్టల్ వ్యవహారంపై సిట్టింగ్ జడ్జితో విచారణ జరిపించాలని డిమాండ్ చేశారు. గత బీఆర్ఎస్ ప్రభుత్వం వేలాది ఎకరాలను నిషేధిత జాబితాలో చేర్చి అక్రమాలకు పాల్పడిందని, కాంగ్రెస్ పాలనలో ఈ భూముల సంఖ్య లక్షల ఎకరాలకు చేరిందని విమర్శించారు. దశాబ్దాలుగా పన్నులు చెల్లిస్తున్న ప్రైవేట్ భూములను కూడా రాత్రికి రాత్రే 22ఏ జాబితాలో చేరుస్తున్నారని ఆరోపించారు. భూముల విషయంలో ప్రజలను వేధిస్తూ, రియల్ ఎస్టేట్ సంస్థలను బెదిరించి వాటాలు తీసుకుంటున్నారని కిషన్ రెడ్డి తీవ్ర వ్యాఖ్యలు చేశారు. ధరణి స్థానంలో తీసుకొచ్చిన భూభారతి వ్యవస్థ ప్రజల్లో నమ్మకం కోల్పోయిందని అన్నారు. ప్రైవేట్ భూముల్లో భారీగా కమీషన్లు అడుగుతున్నారని, ప్రభుత్వ భూములను ఎందుకు విక్రయిస్తున్నారో ప్రభుత్వం సమాధానం చెప్పాలని డిమాండ్ చేశారు.
బీజేపీ అధికారంలోకి వస్తే రివ్యూ
22ఏ భూముల వ్యవహారంలో రాజకీయ ఒత్తిళ్లు ఉన్నాయని కిషన్ రెడ్డి ఆరోపించారు. ఎమ్మెల్యేకు ఇష్టం లేకపోతే భూమిని 22ఏ జాబితాలో చేర్చే పరిస్థితి ఉందని విమర్శించారు. హైదరాబాద్ చుట్టుపక్కల ఉన్న ఓపెన్ భూములపై కూడా కన్నేశారని ఆరోపించారు. భూములపై జరుగుతున్న వివాదాల్లో ప్రజలకు సహాయం చేసేందుకు బీజేపీ లీగల్ సెల్ పనిచేస్తోందని తెలిపారు. బీజేపీ అధికారంలోకి వస్తే 22ఏ జాబితాలో ఉన్న భూములపై మళ్లీ సమగ్ర పరిశీలన చేపడతామని హామీ ఇచ్చారు. భూభారతి పోర్టల్పై పూర్తి స్థాయి విచారణ ద్వారా అసలు వాస్తవాలు బయటకు రావాలని కోరారు. ఇదే సమయంలో ముఖ్యమంత్రుల విదేశీ పర్యటనలకు రాజకీయ అనుమతులు ఇచ్చే విషయంలో ప్రాధాన్యతను బట్టి నిర్ణయం తీసుకుంటారని, కాంగ్రెస్ హయాంలో ఉన్న నిబంధనలే ప్రస్తుతం కొనసాగుతున్నాయని కిషన్ రెడ్డి స్పష్టం చేశారు.
#KishanReddy #22ALands #BhuBharati #Telangana #TelanganaPolitics #LandIrregularities #22AProperties #SittingJudgeProbe #BhuBharatiPortal #Dharani #TelanganaBJP #BJP #Congress #LandDisputes #PoliticalNews
